Ezequiel 16

Yu Jerusalem nde yul’yul’

1 Me non SOMOL ngog bayay. 2 Ni ga’ar, "Fak e girdi’, mup’ nga owchen yu Jerusalem e pin’en nib sunsonogor nike ngongliy. 3 Mog ngak yu Jerusalem e n’en ni be yog SOMOL ni Th’abi Tolang ngak:

"Nni gargel nigem u lan e nam nu Kanaan. Chitamam e be’ nu Amor, ma chitinam e be u Hitt. 4 Nap’an nni gargel nigem ma dariy be’ ni th’ab e biy rom fa luk nigem fa faley dowam ko sol ara bachiy e mad ngom. 5 Dariy be’ ni runguyem nge rin’ e pin’ey ngom. Nap’an nni gargelegem, ma dariy be’ ni gab t’uf rok. Non’em ngalan bang i tafelfel’.

6 "Ma aram mu gub u to’obem mug guyem ni ga be pigpig u fithik’ i racha’em. Nike mada e racha’ u dowam, machane dag pagem nga mum’. 7 Mu gu chothowliyem ngam ilal ni bod bake gek’iy nib dammal. Mu ilal ngam n’uw ngam rugod. Me yib thuthum ni rib fel’ i chamey, ma ke n’un’uw piyan lolugem, machane dariy e upong u dakenam.

8 "Ma nap’an ni gub gu wan bayay u to’obem, mug guy nike taw nga nap’an ni ngam adag be’. Mug upunguy dowam ni bay u tamilang ko thal ni wuru’ e mad rog mug micheg ngom ni nggu t’ufegnem. Magdow m’ag e mabgol rodow, ni aram e nge milfam ngog." Irera’ e n’en ni be yog SOMOL ni Th’abi Tolang.

9 "Ma aram mu gu l’ing e ran nggu maluknag e racha’ u dowam. Mu gu lifem ko gapgep ni olive. 10 Mu gon’ e bin th’abi fel’ e mad ni kan sisyunag nga dakenam nge sus rom ni gu pi’ nni ngongliy ko bin th’abi fel’ e keru’ e garbaw, nge ba te’eliyaw nlifeth ko mad ni wech, nga ba wuru’ e man nib mur’mur’ downgin. 11 Mu gu nunuw nagem ko bachal nge churwa’. 12 Mu gu pi’ e talbuch ni fen p’ethngum nge telim nge ba te’eliyaw nrib fel’usun ni ngam tay nga lolugem. 13 Nunuw rom e gol nge silber, ma gubin ngiyal’ ni ga ma yin’ e mad ni kan sisyunag nib wech nge mad nib mur’mur’ downgin. Ma ga ma kay e flowa ni kan ngongliy ko bin th’abi fel’ e flour, ma bay e honey nge gapgep ni olive ni ganam. Ri gab m’ug u fanam pidorang, ma ga mang reb e queen. 14 Mub mu gilbugwan u fithik’ e pi nam ni bochan fanam pidorang, ma bochan e gag e gu tem ni ngarim pidorang." Irera’ e n’en ni be yog SOMOL ni Th’abi Tolang.

15 "Machane I pagan’um nga fanam pidorang nge bugwam ma ga par ni daki mutrug rom. 16 Um fana’ boch e mad rom ngam nunuwnag e yung ni ga ma meybil riy, ma ga par ni bod rogon be’ nma chuway ngak, ni yug demurgug e en ke yib ma ga pi’em ngak. 17 Kam fek fapi silber nge gol ni kug pi’ ngom ga be ngongliy ya’an e pumo’on riy, ngu’um ngongliy e ngongol ko darngol ngorad. 18 Ma ga be fek fapi mad ni kan sisyunag ni fafalel’ ni kug pi’ ngom ga be yin’ nga daken fapi ya’an e pumo’on, ma ga be pi’ e gapgep ni olive ngorad nge incense ni gu pi’ ngom. 19 Gu pi’ e ggan ngom ni tin nib th’abi fel’ e flour, nge gapgep ni olive nge honey machane kam pi’ ni maligach ya ngam fel’ u laniyan’ fapi liyos." Irera’ e n’en ni be yog SOMOL ni Th’abi Tolang.

20 "Ma aram ma ga fek pifakam ni pumo’on nge ppin nim diyen nagrad rog ngam pi’rad ni maligach ko liyos. Dawori gaman gelngin e kireb riy ni da mur yul’yul’ ngog, 21 ni ngkum fek pifakag ngam miligach nagrad ko liyos? 22 Nap’an e yafos rom ni sunsonogor ni ga ma falchuway’ ngom, ma dariy bingyal’ ni yib ngan’um salpem ni kagab bitir — fa ngiyal’ i n’em ni dariy e upong u dakenam, ni um leapleap u fithik’ e racha’ rom."

Par rok yu Jerusalem ni bod be’ nma falchuway’ ngak

23 I SOMOL ni Th’abi Tolang e be ga’ar, "Gafgow gur! Rigafgow! Kam rin’ urngin fatinef e kireb, ma aram 24 kam toy yungi n’en u charen gubin pa’ e kanawo ni ngu’um tayfan e liyos riy mu’um pi’em riy ni chuway’. 25 Pidorang rom e kam girengiy u fithik’ e rungdu’. Ga be pi’em ngak gubin e pi’in be yib ni daki mutrug, ma ga be pi’em ni chuway’ ni be almirin i yan u gubin e rran. 26 Kam pag e pi bbuguliyoror rom ni darngal ni piyu Egypt kar’uned ngom nga chob, ngonglem ni ga be chuway’ ngom e be k’aring e damumuw ngog.

27 "Chiney e kug pug pa’ag ngalang ni nggu gechig nagem nggu fek e birom e f’oth ni gu pi’. Kug pi’em nga pa’ piyu Filistia, ni yad ba fananikem ma yad ba sonogor ngonglem ni kireb.

28 "Ni bochan e damur chum’er ko pi’in um pired, mag yan ngu’um lol’oeg yu Assyria. Um pi’em ngorad ni chuway’, machane ku deyag nra chum’er niged gur. 29 Ku mu falchuway’ ngom ngak piyu Babylon, ni fare nam nib tasiyobay, machane ku deyag nra chum’er niged gur."

30 Irera’ e n’en ni be yog SOMOL ni Th’abi Tolang: "Kam rin’ urngin e pin’ey ni bod be’ nib ta pi’ ir nchuway’ ni dakir tamra’. 31 U daken gubin e yupa’ i kanawo’ e kam toy yungi tagil’ ni ngu’um tayfan e pi liyos riy mu’um pi’em riy nchuway’. Machane gathi ga be rin’ ni bochan e salpiy ni bod boch e pi’in yad ma falchuway’ ngorad. 32 Ga bod be’ ni bpin ni yad be par e milekag ma ke pag figirngin ni de t’uf rok. 33 Be’ nma falchuway ngak e ma fek puluwon, machane gur e ga be pi’ e pi tow’ath ngak urngin pi elingem, ni puluwon ni ngarbad u gubin yang ni ngar moleged gur. 34 I gur e yigab thil u fithik’ e pi’in nma falchuway’ ngak, ndariy be’ ni matgel ngom ni ngam mang reb. Damur fek puluwon; i gur e ga be pi’ pulworad! Aram rogon, gur e yiggab mit."

Pufthin rok Got nga daken yu Jerusalem

35 Jerusalem, i gur e re gathar! Mu telim ko tin be yog SOMOL.

36 Irera’ e n’en ni be yog SOMOL ni Th’abi Tolang: "Kam luf e mad u dakenam, ni bod be’ nma falchuway’ ngak, ga be pi’em ngak pi ilingem nge ngak gubin e pi liyos rom nib sunsonogor, mag be li’ pifakam ni nge mang maligach ngak e pi liyos. 37 Bochan e ran’ey ma bay gu kunuy gubin pi ilingem kafram — ni pi’in ga ba’adag dakenrad nge pi’in ni gab fananikay. Bay gu fekrad ngar cholngabiyed gur, ma aram mu gu luf e mad u dakenam ngar guyed downgim u tamilang. 38 Bay gu gechig nigem ni fan e damur yul’yul’ ko mabgol rom ma ga ma thang e pogofan, ma u fithik’ e damumuw rog nib gel e bay gu gechig nagem riy ngamum’. 39 Bay gu pi’em nga pa’rad, ma bay ra gathayed fa yungi tagil’ ni um pi’em riy ni chuway’ ma ga be tayfan e liyos riy. Bay ra feked e mad rom nge pi churwa’ nge nunuw u dowam min pagem u tamilang.

40 "Bay ra k’arnged e girdi’ ni yo’or ngar malang nigem gur, mar th’eth’abed gur ni yoch yang ko saydon rorad. 41 Bay ra urfiyed e pi naun rom nga but’ me mu’ulung e pi’in ppin ngar guyed e gechig ni yibe tay ngom. Bay gu gagiyeg nagem ngam pag e falchuway’ ni ga be tay ngom mug taleg e pi tow’ath ni ga ma pi’ ngak pi ilingem. 42 Ma aram e bay i m’ay e damumuw rog, mug gapas. Bay dab kug damumuw ara gu talyeg bi’id. 43 Kam pag talin rogon ni ug chothowliyem ko ngiyal ni kagab bitir, me gur e mu k’aring e damumuw ngog ko pin’en ni um rin. Arfan ni kug gagiyegnag ni ngam lebguy taban ni gubin. Mang ni kam chagiy ngongolen e darngal ko urngin e tin sonogor ni ga be rin’?" I SOMOL ni Th’abi Tolang e keyog e pi thin ney.

Fare pin ni fak e dariy e thilthil rorow e chitiningin

44 Me ga’ar SOMOL, "Jerusalem, girdi’ e bay u rogned e bug i thin ney nib sor fan ngom: ‘Fare pin ni fak e bod e chitiningin.’ 45 Ri gabfil e chitinam. Nib fananikay figirngin nge pifak. Ma kag bod pi walagem ni ppin ni yad ba fananikay e figirngirad nge pifakrad. Gur nge pi binaw ni walagem ni ppin e be’ nu Hitt e chitiningmed ma be’ nu Amor e chitamangimed.

46 "Bin nganni’ e bpin ni walagem e Samaria, ni fare binaw ko lel’och rom nge pifak ni ppin ni fa yochi binaw nib chuchugur ngak, ma bin wen i walagem ni bpin e Sodom ni bay ko yimuch rom ni yad pifak ni ppin. 47 Mog bfel’ u wun’um ni ngam lek lowan ayrow ma ga falwok ko ngongol rorow nib sunsonogor? Danga’, machane ri de n’uw nap’an mag ngongol nib gel e kireb riy ko gubin e tin ur rin’ew."

48 Be ga’ar SOMOL ni Th’abi Tolang, "Bod feni rriyul’ ni Gag fare Got ni gu be par ni gub fos, fare pin ni walagem ni Sodom nge pi nochi binaw ni pifak e dawor rrin’ed e kireb ni bod e tin kamrin’ed e tirom e binaw. 49 Ir nge pifak nib ppin e yad ba ufanthin ni bochan e bo’or garad miyad ma par u fithik’ e gapas nib math gulungrad, machane darir ayweged e pi’in gafgow nge pi’in ba t’uf e ayuw rorad. 50 Yad ba ufanthin ma yad ba gelan’ ma kar ngongliyed e tin ni gub fananikay ere kug thirifrad u but’, ni gur ma gamnang.

51 "Denen rok Samaria e de chuchugur ni nge gaman baley ko tin kam rin’. Gafarig rom e ba gel e galong riy ko tin i rin’. Gelngin e kireb rom e ran papulweg e kireb romed ma gal walagem ni ppin e gowa dariy e kireb rorow. 52 Ere chiney e dabisiy ni ngam tamra’ mag lubeg e yaeth nge thiyar ni kamta’. Denen rom e kab gel e kireb riy ko tin i rin’ gal walagem ni ppin ni gowa dariy thibngirow u chirem. Chiney e kemun row nga owchem ni kam tamra’ ngom, ni bochan ngonglem e tay ni gal walagem ni ppin e gowa yow ba machalbog u charem.

Sodom nge Samaria ni bay kun fulweg row nga rogon ni urmew

53 Me ga’ar SOMOL ngak Jerusalem, "Bay gu gagiyegnag nge fel’ rogrow bayay — Sodom nge yochi binaw rok nge Samaria nge yochi binaw rok. Arrogon, kug ra fal’eg rogom boch. 54 Bay um tamra’ ngom, ma yaeth ni kam tay e ra gagyel ngak gal walagem ni ppin ni yow bfel’ ngom. 55 Bayi fel’ rogrow bayay, me gur nge pi binaw rom e yira fulweg nga rogon bayay. 56 Gathi ku’um gosgosnag murung’agen Sodom ko fapi rran ni gab uf uf 57 u m’on ni yib i gagyal e kireb ni um ngongliy? Chiney, e kari ta’reb rogom ngak — ni kam mang ba gosgos ngak piyu Edom, nge piyu Filistia, nge boch e pi’in gimed bbuguliyoror ni daburad gur. 58 Thingar mu gafgow ni fan ko kireb rom, nge ngongol rom ni sunsonogor." I SOMOL e keyog e pi thin ney.

Ba M’ag ni dabi m’ay biid

59 I SOMOL ni Th’abi Tolang e be ga’ar, "Rogon e n’en ni bay gu rin’ ngom e ba m’ag nga rogon ni nge aw ngom, ni bochan e mu furuy e tin gu michmicheg mag th’ab fare m’ag. 60 Machane bay gu tayfan fare m’ag ni gu ngongliy u thildow u nap’an ni kagab bitir, bay gu ngongliy ba m’ag u thildow nib manemus. 61 Bay i yib ngan’um e gafarig rom, ma bay mu tamra’ ngay ko ngiyal ni bay i sul gal walagem ni ppin ni en ni nganni’ nge bin wen. Bay gu tay row ni bod fakam ni ppin, ni yug aray rogon ni gathi bang ko m’ag u thildow. 62 Bay gu be’echnag e m’ag u thildow, ma aram e bay mu nang ni Gag SOMOL. 63 Mu gu n’ag fan u wun’ug e kireb ni kam rin’, machane bay i yib ngan’um nge gelnag e tamra’ rom ni mus nga langam ma dakiyag nim pithig." I SOMOL ni Th’abi Tolang e keyog e pi thin ney.