EZEKIEL 17

Ba fanathin u lagruw i arche’ ni eagle nge ba ke grape

1 I non SOMOL ngog. 2 Ni ga’ar, "Fak e girdi’, mog ko girdi’ nu Israel ba fanathin 3 ngar nanged ko mang e gu be yog ngorad I Gag SOMOL ni Th’abi Tolang: Immoy ba arche ni eagle nib ga’ ni rib fel’ ya’an wulan ma gathi ba’achig pon, nma pithig nib ga’ radan. I changag nge yan ko burey nu Lebanon me t’ar tamaligin bake gek’iy ni cedar, 4 nge fek i yan ngab nam nib tasiyobay, nge yan i tay ngalan bbinaw ko pi’in ma falchuway’. 5 Ma aram me fek bochi awoch ko binaw nu Israel nge yan i yung ngalan bangi flang nib yung’ol, ni bay e ran riy ni dar ma m’ay ni nge tugulnag. 6 Me tugul fa chike gek’iy nge ga’ ni bake grape nge wagay u rom u but’ i yan. Me for papa’ngin nge sor ko fare eagle ngalang, me yan lik’ngin nga’ar. Me yo’or papa’ngin me dub’ag yuwan.

7 "Miki immoy reb e eagle nib ga’ ma ba gel pon ma ba dub’ag wulan. Ma fare ke grape e chiygog lik’ngin me pig yuwan nge sor ko gin bay e re eagle ney riy, ni be athapeg ni gomang e yigi pi’ e ran nib yo’or boch ko fare gi milay’ nni yung riy. 8 Machane fare ke grape e kan mu’ i yung ko gin nib yong’ol e but’ riy, ma bfel’ rogon e ran ni bay riy nrayag ni dub’agnag yuwan me yo’ornag wom’ngin me par nib ke grape nib dammal.

9 "Ere I Gag SOMOL ni Th’abi Tolang e gu fith ni lungug: Gur ra ke grape ney e ra par nge tugul? Gur bin som’on e arche’ ni eagle e dabi pug nge machwo’ lik’ngin, me nguduy wom’ngin, me tet’ar papa’ngin nge pag nge mroray? Gathi rbu’uw gelngin be’ ara ba nam nra pug. 10 Arogon, kan yung, gur ra tugul nge ga’? Gur dabi mroray ko nifngin e ngek? Ma gur dabi mroray ko gin be tugul riy?"

Fare fanathin nni weliy fan

11 I ga’ar SOMOL ngog, 12 "Mu fith e pi tatogopluw ney ko yad manang fan fare fanathin fa dangay? Mog ngorad ni pilung nu Babylon e yib nga Jerusalem nge fek e pilung riy nge pi tayugang’ nga Babylon. 13 Me fek be’ ko tabinaw rok fare pilung, nge fal’eg ba tha’ u thilrow me suruy nge mow ni be micheg ni ngi i par nib yul’yul’ ngak. Me fek boch e pumo’on ni kub ga’ e liw rorad ni kalbus 14 nge tay fare nam ndab kiyag e sak’iy rorad bayay me guy ni nge par fare tha’ u gil’. 15 Machane fare pilung nu Judah e togopluw me pi e damit nge yan nga Egypt ngar feked e os nge barba’ i salthaw nib ga’. Gur, rayag rok? Ma gur rayag ni thay ni dab ni kol ko binem? Dabyag ni nge th’ab fare tha’ me par ni dab ni gechignag.

16 Me ga’ar SOMOL ni Th’abi Tolang, "Bod feni bmich ni Gag Got ni gu be par ni gub fos. Ra yim’ e re pilung ney nu Judah u lan yu Babylon ni bochan e ke th’ab fare michmich nge fare tha’ nra m’agew e pilung nu Babylon, ir e tay ni nge mang pilung. 17 Mus ko fa raba’ i salthaw nib gel rok fare pilung nu Egypt e dabyag rorad ni ngar ayweged ko mael ko ngiyal’ i n’en nike yib yu Babylon ra ubungiyed e but’ ni tawo’ ko mael miyad ker e lra’ ni nge yag nni li’ e girdi’ nib yo’or. 18 I th’ab fare mow nge fare tha’ ni ngongliy. I rin’ urngin e pin’ey ere chiney e dabkiyag ni nge mil."

19 I SOMOL ni Th’abi Tolang e ga’ar, "Bod feni mich ni Gag Got ni gu be par ni gub fos, e bay gu gechignag ni fan e ke th’ab fare tha’ ni fa’ani mow u fithingag nra tay u tagil’. 20 Bay gu k’iyag bang i nug ni nge aw ngay. Mu gu fek nga Babylon ngan gechignag u rom, ni bochan e de yul’yul’ ngog. 21 Tin th’abi falu’ ko salthaw rok e bay ni li’rad u fithik’ e mael, ma tin ndar m’ad e yad ra wear u gubin yang. Ma aram e bay mu nang ni Gag SOMOL e kugog e pi thin ney."

N’en ni micheg Got ni nge l’agan’uy ngay

22 Irera’ e n’en ni be yog SOMOL ni Th’abi Tolang,

"Bay gu fek mal’gun bake gek’iy ni cedar nib n’uw

mug t’ar e pa’ nike for riy ni kab mrerey;

mug yung nga daken ba burey nib tolang,

23 u daken e re burey nth’abi tolang nu Israel.

Ra sum papa’ngin me k’uf ngeb wom’ngin

me par nib ke gek’iy ni cedar ni bfel’ ya’an.

Gubin mit e arche’ nra toy tafen nga ran’

miyad pir’eg e taglul’ u fithik’ i pa’ngin.

24 Gubin kaen e gek’iy u lan fare nam nra nang

ni Gag fare SOMOL.

E kug th’ab nga but’ e yuke gek’iy nib n’uw kaen

nge yag ni n’uw e tin nib achig e gek’iy.

Bay gu mroraynag e gek’iy nib galunglung

mug galunglungnag e gek’iy nike mroray.

I Gag SOMOL e kugog e pi thin ney. Gu ra rin’ e n’en ni kugog ni bay gu rin’."