EZEKIEL 22

Jerusalem ni i th’ab e pi motochiyel

1 I non SOMOL ngog 2 ni ga’ar, "Fak e girdi’, kam faleg rogom ni ngam pufthinnag e re binaw nike suguy e pi’in tathang e pogofan? Mu tamilangnag ngak gubin e pin’en nib sunsonogor nike ngongliy. 3 Mog ko fare nam e n’en ni gu be yog I Gag SOMOL ni Th’abi Tolang: Bochan ni kam thang e pogofan ko girdi’ rom ni pire’ ma ga be alit nagem ko pi liyos ni ga be tayfan e aram e nge gonowrug u puluwom. 4 Gur e bbuch e rom ko pi pogofan nem ma ke alit nigem e pi liyos ni kam ngongliy, ere gur e ke taw ko nep’ rom, kam mu’! Aramfan ni kug pag e pi nam yad be minmin ngom miyad be girig ngom. 5 Tin ba chugur e binaw nge tin ba palog rom e yad be girig ngom ya ridamur dum’. 6 Urngin e tayugang’ nu Israel e ke pagan’rad nga gelingrad yad be thang e pogofan. 7 Dakriy bigmed u lan binaw nma liyor ngak e gallibthir rok. Gimed be sasalap ko milekag ma kemang i ta’ ngomed ni gimed be gafgownag e pi’in keyim’ figirnginrad nge bitir ni kanim’ rorad. 8 Ke ma’fan e yungi n’en nib thothup u wun’med, ma damur tedfan fare Sabbath. 9 Boch e girdi’ romed e be gathibthibnag ma be t’ar e thin nga daken boch e girdi’ ya ngan thang e pogofan rorad. Ma bochi yad e be kay e pin’en ni kanpi’ ni maligach ko liyos. Ma boch i gimed e gubin ngiyal’ ni yad be gay e chum’er, ni nge gamen e tin yad be ar ar nag. 10 Bochi gimed e be moleg le’engin e chitamngin. Ma bochi gimed e be kol e ppin u yargel ngar moleged yad ko ngiyal ni yad ba ta’ay. 11 Ma bochi gimed e yad be par e ppin ni gathi le’engirad nge pi le’engin pifakrad ni pumo’on ara pi walagrad ni ppin ni ta’reb e chitamangirad. 12 Boch e girdi’ romed e be fek puluwon ni nge thang e pogofan. Ma boch i yad e be pi’ e salpiy ni ku ran fulweg, me yin’ e pasent ngay nib pag oren nike mangita’ ngorad kefel’ rograd riy. Ma kar paged talig." I SOMOL ni Th’abi Tolang e be non.

13 "Bay gu pag ba tug nga daken e pi’ romed nma moro’ro’ u fithik’ e yargel nge pi tamathang pogofan. 14 Gimed be leamnag nra gu mu’ i rin’ e tin gu be leamnag ngomed, ma kabay bigmed ni kab falu’ ma kabay gelngin ni ku rayag ni fal pa’ ngog? I Gag SOMOL e gu be non, ni thin rog e gu ra tay u gil’. 15 Bay gu wereg e girdi’ romed u gubin e binaw nge nam ma bay gu museg ngongolmed ni kireb. 16 Ma aram e bayi darifan nagmed boch e nam migmed thiyear, machane bay mu nanged ni Gag SOMOL."

Jerusalem e thingar ni machalbognag

17 Me ga’ar SOMOL ngog, 18 "Fak e girdi’, piyu Israel e dakriy farad ngog. Kar boded e chabung ni alit ko wasey ni copper, kobre, iron, nge lead nike magey ko gini ku’un urfiy e silber riy. 19 Ere chiney e Gag SOMOL ni Th’abi Tolang, e gu be yog ngorad ni dakuriy farad ni bod e pin’em. Ma bay gu kunuyrad nga ta’bang u Jerusalem 20 ni bod rogon e chabung ni alit ko silber, nge copper, iron, lead, nge kobre’ nike magey u tomuren ni kan dulnguy e nguwachag riy u mit e nifiy makan ki’eg kan fek e tin ke be’ech. Damumuw rog nib gel e bayi ranran nagrad ni bod rogon e nifiy ni ranrannag chabungen nge chuw. 21 Arrogon, bay gu kunuyrad ngalan yu Jerusalem, nggu k’eg e nifiy nga tanggirad nggu ranran nagrad ko damumuw rog. 22 Bay ra ranrangad u lan yu Jerusalem ni bod rogon e silber ni yima ranrannag u lan e gin yima tanfiynag riy, ma aram e bay ra nanged ni damumuw rok SOMOL e yad be thamiy."

Denen rok e pi tayugang’ nu Israel

23 Miki non SOMOL ngog bayay, 24 ni ga’ar, "Fak e girdi’, mog ngak yu Israel ni but’ rorad e de thothup, ni aram e nggu gechignag u fithik’ e damumuw rog. 25 Pi tolang e kar boded e gamanman ni layon ni yad be gowol nga daken e gamanman ni kar li’ed. Yad e yad ma li’ e girdi’ ngar feked e salpiy rorad nge tin nib milfan ngorad ban’en, miyad pag e ppin nib pire’ ni dakriy figirngirad. 26 Pi prist e kar th’abed e motochiyel rog ma dakrir tedfan e n’en nib thothup. Ma dakrir gagyel niged e thil ko tin nib thothup nge tin nde thothup. Ma dakrir machib niged e thil ko tin nde ta’ay nge tin nib ta’ay. Kar feked yathin e Sabbath. Ke yan i aw ni girdi’ nu Israel e dakrir liyorgad ngog. 27 Ma pi tamal’gun e am nu Israel e kar boded e pilis ni malboch ni yad ma popof e gamanman ni kar li’ed. Yad be mathang pogofan ni bochan e nge yo’or ban’en rorad. 28 Pi profet e yad be mithag e pi den’en ney ni bod e pumo’on ni yad ma upnguy thibngin bang i rungrung ko ma’chaw. Ma pilyeg e changar rorad ngu’ur roged bogi yi’iy ni de riyul’. Yad ma ga’ar thin rok SOMOL ni Th’abi Tolang, machane I Gag SOMOL e dawor gu non ngorad. 29 Pi’in ba’aram nib pire’ ban’en rorad e yad ba sasaliyeb miyad ba moro’ro’, ni yad be gafgownag e pi’in gafgow make mangita’ ngorad ni ngu’ur gafgow niged e milekag. 30 Gu be changarnag be’ nrayag ni nge ubung bang i rungrung, nrayag ni nge sak’iy ko yungi n’en nike puth e rungrung riy me ayweg e nam ko ngiyal’ ni nge aw e damumuw rog ngay, machane dag pir’eg be’. 31 Ma aram e bay gu cheleg e damunuw rog nga dakenrad, bay gu thang owcharad ni bod nra yik’gad ko nifiy ni bochan e pin’en ni kar rin’ed." I SOMOL ni Th’abi Tolang e be non.