1 I SOMOL e yog ngog ni nga gon’ e re daloloy’ ney ni fen l’agruw i fak e pilung nu Israel:

2 Chitinam e ri bod ba layon ni bpin!

Ni chugliy fak u fithik’ e layon ni pumo’on nib damumuw.

3 Ni chugiliy reb i fak ma be fil rogon ngak ni ngi i fita’;

me nang rogon ni nge longuy e girdi’.

4 Me rung’ag e pi nam murung’agen

miyad thabeynag ngalan ba low.

Miyad l’eg ngar girngiyed i yan nga Egypt.

5 Chitiningin e i sonnag ni nge sul me nang nike mathliben.

Ma aram miki chugliy reb i fak,

nge ilal ni ba layon nib damumuw.

6 Nap’an ni yan i taw nga gil’isowon,

me un nga boch e layon ngu’ur fita’ niged e tin ngar longuyed.

Miki fil rogon ni ngi i fita’ nag me languy e girdi.

7 I buthug e yoror

me gathay e yochi binaw.

Gubin ngiyal’ nra tolul

me dugow gubin e girdi’ ko fare nam.

8 I ta’reb lungun e pi nam ni ngan li’;

i yib e girdi’ u gubin yang.

Rab ra paged e pi nug

miyad kol ko nug rorad.

9 Miyad tay ngalan ba chum ko gamanman

ngar feked i yan ko pilung nu Babylon.

Min tay e matnag rok,

ya nga dabkun rung’ag bayay

e tolul rok u daken e burey nu Israel.

10 Chitinam e bod bake grape

ni kan yung u charen e lul’.

I yo’or yuwan nge wom’ngin

ni bochan e ran nib yo’or.

11 Ba gel papa’ngin

me ga’ min fanay ni sog ko pilung.

Fare ke grape e n’uw kaen nra dead ko manileng;

ni gubin e girdi’ ni guy feni yo’or yuwan nge feni n’uw kaen.

12 Machane u fithik’ e damumuw,

min pug lik’ngin ngalang nga non’ nga daken e but’.

Meb nifngin e ngek nge fengfengnag wom’ngin.

Me m’ingm’ing papa’ngin;

nge mlik’ min orfeg.

13 Me’ere chiney e kan yung u daken e ted,

ko but’ nib mlik ni dariy e ran riy.

14 Kenggin fare ke grape e aw e nifiy ngay;

me mo’ruf papa’ngin nge wom’ngin.

Me par ndakriy reb i pa’ngin nib gel;

ni dabkiyag ni yira fanay ni sog ko pilung.

Re tang ney e rib tang ko kireban’ ara ba dololoy’; ni yugu yima yin’.