EZEKIEL 27

Ba daloloy’ ni fen yu Tyre

1 I ga’ar SOMOL ngog, 2 "Fak e girdi’, mu daloloy’nag yu Tyre, 3 ni fare binaw ni bay u marichilen e day nma siyobay ngak gubin e girdi’ nma par u dap’el’ay. Mog ko fare binaw e n’en ni be yog SOMOL ni Th’abi Tolang;

"Tyre, kam uf nga fani fel’ falngim.

4 Tafnam e day.

Pi’in ra toyed gur e rachameyed gur ni ga bod ba barkow ni bfel’usun;

5 Ra faned e gek’iy ni fir ni yib ko Burey nu Hermon ni nge mang palang

nge bake gek’iy ni cedar nu Lebanon ni wulyang rom.

6 Ra feked e gek’iy ni oak u Bashan ngar ngongliyed ni yap’;

Miyad ngongliy e faraf rom ko gek’iy ni pine nu Cyprus

Min nunuw nagem ko ivory.

7 Lay rom e ni ngongliy ko mad ni wech,

Ni linen nni sisyunag u Egypt,

Nib m’ug.

Tabogbog rom e ni ngongliy ko kire ni th’abi fel’,

Nib ra’en purple nni fek ko donguch nu Cyprus.

8 Pi girdi’en e maman rom e girdi’ ko binaw nu Sidon ngu Arvad.

Pi pumo’on rom nib salap e yad e sala.

9 Pi salap ko dumow ban’en ko fare barkow

e bogni’ nu Byblos ni bfel’ rogon nni sukul nagrad.

Urngin e sala ko barkow e yad be siyobay u lan e kantin rom.

10 "Salthaw nu Persia, ngu Lydia ngu Libya e yad be maruwel ni salthaw rom. Tafen e salthaw rom e kar the’ed riy ngalang e shield nge urwach rorad. Er e picha’ ni ka ra gil naged bugwam. 11 Salthaw nu Arvad e ur matanaggad ko yoror rom, ma pumo’on nu Gammad e ur matanagiyed e wulyang ni tafen e damit rom. Ra the’eth e shield rorad ko rungrung rom. Er e picha’ nra fal’egged ya’am.

12 "Um siyobay u lan yu Spain ngu’um fek e silber nge wasay nge kobre’, nge lead ni puluwon e tirom ban’en. 13 Ku u mu siyobay u Greece, Tubal, ngu Meshek ngu’um thilyeg e tirom ban’en ko sib nge tin kan ngongliy ko wasay ni bronze. 14 Um pi’ e tirom ban’en ni chuway’ ni fan ko os ni yima maruwel ngay, nge os ni yima fanay ko mael, nge dongki ni yib u Beth Togarmah. 15 Girdi’ nu Rhodes e um thilyeged e chugom; ma girdi’ ko pi binaw u dap’eday e ra pi’ed ngom e ivory nge ebony ni muthilyeg ko tirom ban’en. 16 Girdi’ nu Syria e ra chuw’iyed e chugom rom nge ku boch ban’en rom. Ra pi’ed puluwon e chugom ngom ni emerald, mad nib ra’en purple, mad ni kan sisyunag, mad ni wech, coral, nge rubies. 17 Judah ngu Israel e ra pi’ed puluwon e chugum rom ni wheat, honey, gapgip ko olive, nge spices. 18,19 Girdi’ nu Damascus e ra chuw’iyed e chugom rom nge tin nni ngongliy ko nam rom. Ra pi’ed puluwon ni wayin nu Helbon nge bunu’en e saf nu Sahar. Ra thilyegned bmit e wasey nge spices ko tirom e chugom. 20 Girdi’ nu Dedan e ra thilyeged yuyangi blangkit ni fen e sedal ni puluwon e tirom e chugom. 21 Yu Arabia nge pi tagagiyeg ko nam nu Kedar e ra pi’ed puluwon e chugom rom ni saf nge pifak e saf nge kaming. 22 Girdi’ nma siyobay u Sheba ngu Raamah era thilyeged e churwa’, gol nge tin th’abi fel’ e spice ko tirom e chugom ni ga be pi’ ni chuway’. 23 Binaw nu Haran, Kanneh, ngu Eden nge pi ta siyobay u Sheba nge binaw nu Isshur, ngu Chilmad — e yad gubin ni um thilyeged e chugum. 24 Ra falchuway’gad ngom ko tin totolang puluwon e mad, mad nib ra’en purple, nge mad ni kan sisyunag, nge yungi karpet nib mat ra’en, nge yul’ i gaf nge tal ni kan firgiy ni bfel’ rogon. 25 Barkow ni gagang’ e be fek e chugum rom ko yungi n’en nib t’uf ni nge yan ngay.

"Kambod bbarkow u maday

Nike sugnag e chugom nib tomal.

26 Nap’an nra fekem e pi’in yad ma mamaniyem nga feth, me cham e nifeng ko ngek nge bilig e barkow rom u rom nib palog ko binaw.

27 Ma urngin ban’en u daken e barkow e ra malog u maday — ni chugom rom nib totolang puluwon,

Nge sala ko barkow,

Nge pi salap i chamey ban’en u barkow, nge pi’in tasiyobay,

Gubin e salthaw u daken e barkow —

Yad gubin nra maloggad u maday

U nap’an ni pil e barkow rom.

28 Tolul ni be tay e salthaw ni yad be lumoch

E be taw lamrad nga arow.

29 "Gubin e barkow ma kann’ag, ma gubin e sala ma ke yan nga arow.

30 Ur yor niged gur nib gel,

Miyad be yon’ e fiyath nga daken lolugrad ngu’ur leplepgad u fithik’ e awat.

31 Ra puyed piyen lolugrad ni fan ngom

Miyad yon’ e mad ni tutuw.

Ma yad be yor ni kari taganan’rad.

32 Miyad dololoy’ nigem:

‘Tyre, mini e rayag ni ta’reb rogon ngom,

Ni chiney nike math gulngam u maday?

33 Nap’an nra yan e pi chugom rom ni ga ma falchuway’ ngay nge th’ab e day,

Ni bay riy gubin e tin ba t’uf ko gubin e nam.

Pi pilung e ke yo’or bogi ban’en rorad

Ni bochan e chugom rom ni falel’.

34 Ma chiney e ga bay u lan e day ni kam pil;

Kam ligil nga t’ay e regur.

Chugum rom nge urngin e pi’in ni ur maruwelgad rom e kar uned ngom ko malog u maday.’

35 "Urngin e pi’in yad ma par u dep’eday e ra gin gad ko tin ke buch rom. Mus ko pilung rorad ma ke digow, nike gagyel e marus u owcharad. 36 Kam malog ni dabkum sul bi’id, ma pi tasiyobay u ga’ngin e fayleng e kar digowgad, ma kar rusgad nrichey me buch rorad e tin ke buch ngom."