1 Fare mo’on e pow’iyeg nggu sulow nga langan e mab ko Tempel. Ma beyib e ran u tanggin e gin yima yan riy ngalan e Tempel be yan ni lul’ i yan ko ngek, ni aram e gin ba sap mit fare Tempel ngay. Fare ran e be yan ni lul’ u tanggin e ba’ ni yimuch ko fare Tempel ngeb i thumur u ba’ ni yimuch ko fare altar. 2 Ma aram me fekeg fare mo’on nga wuru’ e gin bay e Tempel riy nggu warow nga wean ko bin ni lel’och e garog me pow’iyeg nggu liyegew ko garog nib sap ko ngek. Ma bay boch reb e lul’ u rom ni be yib u tanggin e ba’ ni yimuch fare garog. 3 Me foleg fare mo’on fare ran i yan ko ngek nga p’ening ma 560 e yard me yog ngog ni nggu log nga fithik’ fare ran. Ma fare ran e yib i taw ko richib u eg. 4 Ma aram miki foleg fare ran i yan ni ku 560 e yard, me yib fare ran nge mada’ nga bugug. Miki foleg fare ran i yan nga p’ening ni ku 560 e yard, mi yib fare ran nge mada’ nga lukngug. 5 Miki foleg fare ran i yan ni ku 560 e yard, ma kari to’ar ni dabkiyag ni nggu dead riy. Kari to’ar ni dabkiyag ni ngan yan riy nga barba’ kemus ni manong e rayag riy. 6 Me ga’ar ngog, "Fak e girdi’, mu fal’eg i tafanamiyan u gubin e pin’ey."

Ma aram me fekeg fare mo’on nga talang nga daken marichlen e lul’, 7 ma nap’an e gu taw ngaram, mu gguy e gek’iy nib yo’or ni bay u barba’ ngu barba’. 8 Me ga’ar ngog, "Re ran ney e be yan u daken e nam nib sor ko ngek nge log ngalan e Loway nu Jordan nge yan ko day ni fithingan e Dead Sea. Nap’an nra lul’ ngalan e Dead Sea, me yin’ luwan e day nge kak’lingnag e ran riy. 9 Demturug e yungin be yan fare ran riy, ma be yib gubin mit e gamanman nge nig ngay. Ya fare lul’ e ma kak’lingnag e ran ko fare Dead Sea, ere demturug e gin be yan riy, ma be pi’ e yafos. 10 Pi alublub nu Engedi nge yan nge mada’ ko pi alublub nu Eneglaim, e bay girdi’en e fita’ u dap’el’ay riy, ni yad be gilk’ad e nug rorad u rom. Ba yo’or mit e nig ni bay u rom ko nig ni bay ko day ni fithingan e Mediterranean. 11 Machane ran nu lan e pi mariw u dep’el’ay e dabi pilyeg nge be’ech. Ra par u rom ngi i yib e sol riy. 12 Ra barba’ e re lul’ nem ma gubin mit e gek’iy mra tugul riy nge pi’ e ggan. Yuwan e pi gek’iy nem e dariy e ngiyal’ nra mororay, ma dabital ko mak’uf. Pi gek’iy nem e ra i pi’ wom’ngin ni gubin e pul, ni bochan e be tarennag fare lul’ ni be yib ko Tempel. Fapi gek’iy e bayi k’uf wom’ngin ni ggan, ma yuwan e pi gek’iy nem e bay un fanay ni falay."

13 I SOMOL ni Th’abi Tolang e ga’ar, "Irera’ e pi mathil ko binaw ni ngan f’oth u daken fa ragag nge l’agruw i ganong, birok Josef e ganong e rayag ngorad l’agruw guruy. 14 Gu micheg ngak e pi chitamangimed kakrom ni gu ra pi’ e re gi binaw ney ngorad ngar tafnayed; are chiney e ngam f’othed u dakenmed ni ta’reb rogon.

15 "Mathil ko lel’och e yan ko day ni Mediterranean nib sor ko ngek nge mada’ ko fare binaw nu Hethlon, me yan u rom nga Hamath Pass, me yan u rom ko binaw nu Zedad, 16 me yan u rom ko binaw nu Berothah ngu Sibraim (ni bay u thilin e gin nib mil nga tan pa’ e tagagiyeg nu Damascus nge tagagiyeg nu Hamath), me yan u rom ko binaw nu Tokon (ni bay ko mathil ko nug nu Hauran). 17 Ere bin u lel’och e mathil e yib ko day ni Mediterranean me sor ko ngek nge mada’ ko fare binaw nu Enon, ni yow bmathil e gin bay u tan pa’ yu Damascus ngu Hamath ko lel’och riy.

18 "Mathil ko ngek e tabab ko mathil rok yu Damascus nge yu Hauran me yan u rom ko yimuch ko fare Lul’ nu Jordan ni ir e mathil u thilin e nam nu Israel ko ngal, ma nam nu Gilead ko ngek, nge yan i mada’ nga Tamar ni bochi binaw nib chugur ko Dead Sea.

19 "Mathil u yimuch e yan u Tamar nib sor ko yimuch ni ngal nge yan ko lul’ nu Kadesh Meribah me sor u rom ko lel’och ni ngal ko mathil yu Egypt nge mada’ ko day ni Mediterranean.

20 "Mathil ko ngal e day ni Mediterranean me yan ko lel’och nge mada’ ko ba’ ni ngal e Hamath Pass.

21 "Mu f’othed e gi binaw ney u daken e pi ganong romed; 22 ra par ni tafenmed ni dariy n’umngin nap’an. Girdi’ nu bang nma par u fithik’med ni kar fakyed e bitir u roy e ku yad ra un ko f’oth binaw u nap’an ni gimed ra f’oth. Ngan sap ngorad ni bod rogon nri yad girdi’en yu Israel ma yad ra un ko pi genong nu Israel ngar girngiyed e pow ni nge duwgil riy e an nge tafnay bang nge bang. 23 Gubin e pi’in nu bang ni yira tay e f’oth rorad ko re ganong ni yad be par u fithik’rad. I Gag SOMOL ni Th’abi Tolang e kugog e pi thin ney."