ISAIAH 21

I pilyeg e changar ngan guy yu Babylon ni thay

1 Irera’ e thin ni murung’agen yu Babylonia.

Ba yib e riya’ u ba nam ni bay madgun ni bod ba nanyor ni wolguy daken e ted. 2 Ke pilyeg e changar rog ku gguy ba gafgow nib ga’ nra be’ ma be yagnag be’ nge mathang pogofan ni yibe tay.

Salthaw nu Elam, mu chamgad! Salthaw nu Media, mu thabey niged fapi binaw! Got e bayi museg e gafgow ni k’aring yu Babylon.

3 N’en ni ku gguy mu gu rung’ag u lan e changar rog ni piliyeg e ke sug nigeg ko dugow nge amith, ni bod e amith rok be’ ni bpin ni nge gargel. 4 I m’ag e balyang owcheg, ma gu be durru’ ko marus. Kagum’ ni bochan ni yigi papey nge blayal’, machane dariy ban’en ni yib kemus ni go’ marus.

5 Ku gguy ba mur ni kan fal’eg rogon; ka ni flath e mad ni nge par e girdi’ ni ka ni piningrad nga daken. Yad be abich ma yad be garbod. Miygi non be’ ni ga’ar, "Gimed e tolang ko salthaw mu fal’eged rogon e shield romed!"

6 Ma aram me ga’ar Somol ngog, "Mman mu tay e matnag, ma gog ngak ni ngi i sulweg e thin ko nen ni be guy. 7 Fa’anra guy e pumo’on ni be yib u daken e os, ni lal’agruw nib papluw, nge pumo’on ni be yan u daken e dongki nge kamel, ma thangri faleg i yaliyrad."

8 Me tolul fare matnag ni nge ga’ar, "Siro’, ku’ug sak’iy ni gu be matnag u luwag ni rran nge nnep’."

9 Aray e karbad! Ni girdi’ ni be yan u daken e os ni kar fochgad ni lal’agruw. Me pi’ fare matnag e thin nge yib, "Ke mul yu Babylon! Gubin e liyos ni yad ma tayfan e ke wagay u but’."

10 Girdi’ rog nu Israel, ka ni pirdi’iymed ni bod e wheat, machane chiney e nggu weliy ngomed ba sabethin ni bfel’ ni ku gu rung’ag rok SOMOL ni Gubin ma Rayag Rok ni Got nu Israel.

Thin ni murung’agen yu Edom

11 Irera’ e thin ni murung’agen yu Edom. I tolul be’ ngog u Edom ni ga’ar, "Matnag, ke chugur ni nge rran fa dawor? Mog ngog ko mingyal’ e ra mus."

12 Mug fulweg, "Be n’en ni nge kadbul, machane bay ki nep’ bayay. Ma fa’anra ka ga ba’adag ni ka ga ra fith bayay, mag sul ngam fith."

Thin ni murung’agen yu Arabia

13 Irera’ e thin ni murung’agen yu Arabia.

Gimed e girdi’ nu Dedan, fare thelep romed e gif u lan e nam nu Arabia, 14 mu pi’ed e garbod ko girdi’ ni karbad ngomed ni karm’ad ko balel. Gimed e girdi’ ko binaw nu Tema, mu pi’ed e ggan ko girdi’ ni dakriy taferad. 15 Be mil e girdi’ ni ngar thaygad ko saydon ni ka ni fel’eg rogon ni ngan li’rad ngay, nge gat’ing ni ka ni fel’eg rogon ni ngan pag ngorad nge gubin tin yima riya’ riy ko mael.

16 Ma aram me ga’ar Somol ngog, "Rik ta’reb e duw mu gu moseg fare ga’ bugwan nib mta’ fapi ganong nu Kedar. 17 Pi’in ma mun gat’ing e aram e pi’in th’abi falu’ u Kedar, machane buchu’uw i yad e ra par nib fos. I Gag SOMOL ni Got nu Israel, e gu be non."