1 Be ga’ar SOMOL,

"Gimed yu Israel, ni tapigpig rog, mu telmed ngog,

gimed pi owchen Jakob, ni gu mel’egmed ni ngam manged girdi’ rog.

2 I gag SOMOL e gu sunumiymed;

ngiyal’ ni gimed bay u mayal ma gu be ayuwegmed.

Dab mu rusgad; ya gimed e tapigpig rog,

gu mel’egmed ni gimed ba t’uf rog.

3 "Bay gu pi’ e ran ko fare but’ nike balel,

mu gu gagiyegnag yu pa’ i lul’ nge yan u daken e but’ nike mlik.

Bay gu pu’og e kan nthothup rog nga daken pifakmed,

mu gu fal’eg wa’athan e pi’in owchemed.

4 Bay i fel’ rogorad i yan ni bod e pan ni yibe tarannag ni bfel’ rogon,

ni bod e gek’iy ni willow nike tugul u to’oben yu pa’ i lul’.

5 "Tata’a be’ ni bayi ra be’ me ga’ar, ‘I gag girdi’en SOMOL.’

Bay rabad ni ngar uned ngak e girdi’ nu Israel.

Ra be’ ma bayi yoloy fithingan SOMOL nga daken pa’,

me yog ni ir reb e girdi’ rok Got."

6 I SOMOL nma gagiyegnag yu Israel mma yoror rorad,

ni SOMOL ni Gubin ma Rayag Rok e ba’aray e thin ni nge yog:

"I Gag e tabolngin me Gag e tungun, kemus ni Gag e Got;

dakuriy yugu reb e Got nga bang ya kemus ni Gag.✝

7 Gur bay be’ ngabang nrayag rok e tin kug rin’?

I mini’ e yag rok ni yi’iynag nrib tamilang urngin e pin’en ni bay yib

ko tabolngin nge yan i thang ko tungun?

8 Gimed e girdi’ rog, dab mu rusgad!

Gimed manang ni kakrom ke mada’ ko chiney

e u gu yi’iynag urngin e pin’en ni bayib,

ma gimed e mich rog!

Gur bay yugu reb e got ngabang?

Gur bay yugu reb e got ngabang nib gel ndawor gu rung’ag murung’agen?"

9 Urngin e girdi’ ni yad be ngongliy e liyos nma meybil yugu boch e girdi’ ngay e mm’ay farad, ma pi got nrib t’uf rorad e dariy farad. Pi’in yad be meybil ngak e pi got nem e yad mmalmit ma de tamilangan’rad, ma bay ra tamra’gad. 10 Mm’ay fan ni ngan ngongliy e liyos ko wasey nga ni meybil ngay! 11 Urngin e girdi’ ni yad ma meybil ngay e bay ra tamra’gad. Pi’in yad ma ngongliy e liyos e yad e girdi’ ma gathi kan. Yad ra yib nga p’eowcheg ma ri yad ra rus miyad gafgow ko tamra’.

12 Ba girdi’en e parde’ wasey e fek bangi wasey nge urfiy. Me fek ba ama nga pa’ nib gel nge pirdi’iy fa gi wasey nge ngongliy e liyos riy. Me yib e bilig ngak, nge belel, nge magaer.

13 Tadumow naun e ma foleg e ren. Me fek e pinsal nge yoloy ya’an ba girdi’ ngay, me fek talin e maruwel rok nge ker. Me ngongliy nge yib ya’an ba girdi’ riy ni bfel’ ya’an, me tay nga naun rok. 14 Ra th’ab e gek’iy ni cedar ni nge fanay, ara mel’eg e ren ni gek’iy ni oak ara cypress u fithik’ e gerger. Ara yung ba ke gek’iy ni laurel, me sonnag e n’uw ni nge aw ngay nge ga’. 15 Bayi n’en me fek be’ bangi ren nge fanay bang riy ni l’ud, me fek bang riy nge ngongliy e liyos riy. Bang riy e ke fek ke k’oreg e nifiy ngay ni nge ror ngay me lith e flowa ngay. Me ngongliy ba liyos ko gin ke magey riy ngi i meybil ngay! 16 Me fek bang ko fa gi gek’iy nge k’oreg e nifiy; me urfiy e ufin u mit, me kay nge fos. Me ror me ga’ar, "Ke chuw e ulum rog, rib fel’ gowelngin!" 17 Me fek e gin ke magey ko fa gi ren nge ngongliy ba liyos riy; mi i siro’ ngay ma be tay fan. Me meybil ngay ni be ga’ar, "I gur e got rog, mu ayuwegneg!"

18 Girdi’ ni aram rogon e rib gel e manan’ rorad ndar nanged e n’en ni yad be rin’. Ka ra unguyed owcherad ma ka ra gel niged lanin’rad ya richey ngar nanged e tin riyul’. 19 En nma ngongliy e liyos e dariy e leam rok ni nge ga’ar, "Yu yang ko gi ren ney ni kug ngongliy e liyos riy e kug urfiy boch e flowa u daken k’afin, ma kug urfiy e ufin ngay kug longuy. Ma gin ni magey ko fa gi gek’iy e kug ngongliy ba liyos riy. Kug par ni gu be siro’ nga bangi gek’iy!"

20 Bod feni balyang be’ ni be kay e awat. Leam rok ni leam ko balyang e ke fek nga wuru’ e wo’ ndabkiyag ni yira ayuweg. Der pat ngan’ ni re liyos nem nike kol nga pa’ e gathi ba got.

21 Be ga’ar SOMOL,

"Israel, mu leamnag e pin’en ni ba’aray;

dab mu pag talin ni gur e tapigpig rog.

Gu sunumiyem ni ngam mang tapigpig rog,

ma ri dab gu pag talim.

22 Kug chuweg e denen rom ni bod bangi manileng.

Mu sul ngog; ya gag e kug biyuliyem."

23 Lan e lang, mu tolulnag e felfelan’!

Yungi n’en nib to’ar u fayleng, mu tolulgad.

Pi burey nge urngin kaen e gek’iy ko yungi gerger, mu garus niged e felfelan’!

I SOMOL e ke biyuliy e girdi’ rok nu Israel,

ni aram e ke dag feni gel nge feni sorok.

24 "I Gag SOMOL, ni tabyul rom.

I Gag e gu sunumiyem.

I Gag SOMOL e gu sunumeg urngin ban’en.

Yi go’ gag e gu filath lanelang;

ngiyal’ ni u gu ngongliy e fayleng e dariy be’ ni ayuwegneg.

25 Gu be gagiyegnag e pi tamanbay yad be non non ngabang,

ma gu be ngochngochan’nag e pi’in yad ma yaliy e t’uf.

Thin ko pi llowan’ e gu be dalibnag,

be m’ug ni gonop rorad e bbalyang.

26 Machane ngiyal’ nra yi’iynag e tapigpig rog ban’en,

ma gu ra pi’ e mol’og rog ni nge yog ngak e girdi’ e tin kug leamnag,

mu gu gagiyegnag e tin kug leamnag nge tin kug yi’iynag u l’ugun e tapigpig rog nge yib i m’ug nib riyul’.

Kugog ngak yu Jerusalem ni bay kun sul nga ni par nga Jerusalem,

ma pi binaw nu Judah e bay kun sul nga ni ngongliy rogon bayay.

Pi binaw nem e bay gu fulweg nga rogon.

27 Bbugithin e gog me mlik’ e rigur.

28 Ke lungug ngak Cyrus, ‘Gur e bay mu gagiyeg ni pa’ag;

bay mu rin’ e n’en ni gu ba’adag ni ngam rin’:

bay mog ni ngan fulweg yu Jerusalem nga rogon

mi ni ubung e def ko Tempel.’"