ISAIAH 60

Fla’ab ni bayib ngak Jerusalem

1 Jerusalem, mu od, nge gal rama’em ni bod e yal’;

Ram’en SOMOL e ke gal nga dakenam!

2 Yugu boch e nam e bay ra pired u fithik’ e lumor,

Machane gur e bayi gal ram’en SOMOL nga dakenam;

Ir ni bay rom e bayi gal ram’en rom!

3 Ma pi nam e bay ra leked rama’em i yib,

Ma pi pilung e bay ra leked rama’em i yib ni bod e woch ni puf ngorad!

4 Mu sap u to’obem i yan ngam guy e pin’en ni yibe rin’:

Be mu’ulung e girdi’ rom ni ngar sulod nga taferad!

Pifakam ni pumo’on e bay rabad u mal’af,

Pifakam ni ppin e bay ni fekrad i yib nrogon e bitir ni yima fek.

5 Bay mu guy ni aray rogon me yib e felfelan’ ngom;

Bayi mithmith gumircha’em nib gel ni bochan e felfelan’.

Fel’ rogon ko pi nam e bay ni fek i yib ngom;

Fel’ rogon rorad e bayi th’ab lan e day nge yib ngom.

6 Pire’ e kamel ni bay rabad u Midian ngu Efah.

Bay rabad u Sheba ni kar feked e gol nge incense.

Girdi’ e bay ur weliyed e thin ni bfel’ ni murung’agen e tin ke rin’ SOMOL!

7 Urngin e saf nu Kedar ngu Nebayoth

E bay ni fek i yib ngom ni nge mang maligach,

Ni ngan pi’ ngak SOMOL u daken e altar ya nge felan’ SOMOL.

SOMOL e bayi gelnag feni maluplup’ e Tempel rok.

8 Ba mang e pi barkow ni ba’aray ni be yan ni bod e manileng,

Ni bod e arche’ ni dove ni yad be sul nga tabinaw rorad?

9 Yad bogi barkow ni karbad ko pi nam nib orel,

Ni yad be fulweg e girdi’ rok Got nga taferad.

Ka ra feked e silber nge gol i yib,

Ni ngar ted fan fithingan SOMOL ngay,

Ni fare Got nib thothup nu Israel,

Ni ir e ke gagiyegnag urngin e nam yad be tay fan e girdi’ rok.

10 Be ga’ar SOMOL ngak yu Jerusalem,

"Girdi’en yugu boch e nam e bay ra ubunged bayay e yoror rom,

Ma pi pilung rorad e bay ur pigpiggad ngom.

Gu damumuw ngom mu gu gechig nigem,

Ma chiney e bay gu dag ngom ni gab t’uf rog ma gu be runguyem.

11 Pi garog rom e bay i par nib mab ni rran nge nep’,

Ya pi pilung ko pi nam

E bay ur feked e machaf rorad i yib ngom.✝60:11 Rev 21:25, 26

12 Ma pi nam ndab ur pigpiggad ngom

E bay ni thirifrad u but’.

13 "Ren ko gek’iy ni pine nge juniper nge cypress,

Ni tin th’abi fel’ e ren ni yibe fek ko Loway nu Lebanon,

E bay ni fek i yib nga ni fulwegem nga rogom, i gur Jerusalem,

Ya nga ni ngongliy e Tempel rog nge fel’ ya’an,

Mi ni fal’eg e binaw rog nge maluplup’.

14 Pifak e pi’in ur gafgow niged gur e bay rabad

Ra siro’gad ngom ngar ted fam.

Urngin e pi’in ni ur darifan niged gur e bay ra parawgad u to’oben rifrifen em.

Bay rogned fithingam ni fare ‘Binaw rok SOMOL,’

‘Zion, ni fare Binaw rok fare Got nib Thothup nu Israel.’

15 "Ma gathi bay kum par ni kan n’agem ma yibe fanenikayem,

Nib binaw ni kan n’ag ma dakuriy e girdi’ riy.

Bay gu gagiyeg nigem nge gilbuguwam me fel’ ya’am,

Nib binaw ni bay un felfelan’ riy ndariy n’umngin nap’an.

16 Pi nam nge pi pilung e bay ur ayuweged gur

Ni bod ba matin ni be tathuthnag fak.

Ma bay mu nang ni Gag SOMOL e kug chuwegem u pa’ e to’ogor rom,

Fare Got nu Israel nib gel gelngin e ke tem nike puf rogom.

17 "Bay gu fek e gol i yib ngom ma gathi bronze,

Ma silber nge bronze e nge yan luwan e wasey nge rean,

Bay gu pi’ e wasey ngom ma gathi malang.

Pi pilung rom e dab ku ra gafgow niged gur;

Bay gu teg ngorad ngu’ur gagiyeggad u fithik’ e yal’uw nge gapas.

18 Lingan e cham e gathi bay kun rung’ag;

Ma dabki mogoth e nam rom bayay.

Bay gu matanagiyem mu gu ayuwegnem ni gu bod ba yoror ngom;

Bay mu pining e magaer nge sorok ngog ya kug ayuwegnem.

19 "Ma gathi ku yal’ e bay i yib ram’en ngom ni rran

Ara yib ram’en e pul ngom ni nep’;

I Gag SOMOL e bay gu mang tamilang ngom ni manemus;

Ram’en e fla’ab rog e bayi gal nga dakenam.

20 Pi rran ni i yib e gafgow ngom riy e bayi mus.

I Gag SOMOL e bay gu mang tamilang ngom ni dariy n’umngin nap’an,

Nib thil ko yal’ nge pul ni l’agruw ni bayi m’ay ram’en.

21 Urngin e girdi’ rom ni bay ur rin’ed e tin nib mat’aw,

Miyad tafnay e nam ndariy n’umngin nap’an.

I gag e gu yungrad, i gag e gu sunumiyrad,

Ya nggu dag feni sorog ngak urngin e girdi’.

22 Mus ko re tabinaw nib th’abi lich e girdi’ riy ma ba sobut’

Ni bay ra pired ni bod ba nam ni ba ga’ ma ba gel.

Bayi taw nga nap’an

Mu gu gagiyegnag ni nge yodoro’ nib gur.

Ya Gag e SOMOL!"