1 Ra taw ko ngiyal’n’em, ma medlip e ppin niyad ra malle’ nga ta’reb e pumo’on miyad ga’ar, "Rayag ni nggu durwi’iyed gamad magmad yagnag e mad romad machane wenig mu pagmad ngogned ni figirngimad gur, ya nge dab gu tamra’gad ni gamad bogi muchugbil."

2 Bay bangiyal’ ni bayi taw ngay mra tugulnag SOMOL gubin e woldug nge gek’iy u daken e but’ nge dammal me fel’ ya’an. Gubin e girdi’ nu Israel nra magachgad ni yad bfos e yad ra felfelan’ miyad uf nga yong’olen e but’. 3 Gubin e pi’in nra magachgad u Jerusalem, ni duwgiliy Got ni dab ra m’ad, e yira yog ni yad ba thothup. 4 Fare gelngin Somol e bayi pufthinnag me machalbognag fare nam me maluknag nge chuweg machan e kireb rok yu Jerusalem nge rracha’ ni u ni pu’og u rom. 5 Ma aram u daken fare Burey ni Zion nge daken urngin e pi’in ka ra mu’ulunggad ngaram, e ra pi’ SOMOL bang i manilang ngeb ngay ni rran’ ma nep’ ma ba daromrom nib ga’ nge ath. Muluplup’en Got e ra upnguy me yoror ko fare binaw ni polo’. 6 Maluplup’en e bayi taglul’nag fare binaw ko gowal ni rran me tay ni bang i ban’en ni dariy ban’en nra buch riy, ni yima naf ngay ko n’uw nge yoko’.