1 Be ga’ar e Got rodad, "Mu fal’eged laniyan’ e girdi’ rog, mu fal’eged laniyan’rad!

2 Mu pi’ed e athamgil nga laniyan’ e girdi’ nu Jerusalem.

Mogned ngorad nike gaman n’umngin nap’an ni kar gafgowgad,

ma chiney e ken’ag Got fan e denen rorad.

Kug gechig nagrad ke yan i mus nga rogon ni bochan urngin e denen rorad."

3 Ba lam ni be non ni ba ga’ gaman e be ga’ar,

"Mon’ed bpa’ i kanawo’ u daken e ted ni fan ngak SOMOL!

Mu tamilang niged e wo’ u daken e ted ni fan ngak e Got rodad!✝

4 Mu suguyed gubin e yochi loway;

mi gimed bardey daken urngin e burey.

Bayi tagapas e pi burey;

ma yungi n’en nde pach e bay ni pacheag.

5 Ma aram e bayib i m’ug feni muluplup’ SOMOL,

ma urngin e girdi’ nu fayleng ni bayi guy.

I SOMOL e ke micheg e pi thin ney."

6 Be ga’ar ba lam ni ba ga’ gaman, "Mu wereg murung’agen!"

Mu gu fith ni lungug, "Mang e nggu wereg murung’agen?"

"Ngamog ni urngin e girdi’ e yad bod e pan;

nder ma n’uw nap’rad ko floras nu daken e ted.✝

7 Pan e ma mororoy, ma floras e ma kireb ra’en

ko ngiyal’ nra pi’ SOMOL e nifeng nge yib ngay.

Ma girdi’ e ta’reb rogorad ko pan!

8 Errogon, pan e ma mororoy ma floras e ma kireb ra’en,

machane thin rok e Got rodad e dabi thil bi’id!"

9 Jerusalem, mman nga daken e burey nib tolang;

mu weliy e re thin ney ni bfel’!

Zion, mu tolul ni ba ga’ lamam; mu weliy e re thin ney ni bfel’!

Mu non ni ba ga’ lamam, ma dab mu rus.

Mog ngak e pi binaw nu Judah

ni fare Got rorad e be yib!

10 I SOMOL ni Th’abi Tolang e be yib ni nge gagiyeg ni bay gelngin nib gel,

bayi fek i yib e girdi’ nike chuwegrad u pa’ e to’ogor rorad.

11 Bay i ayuweg fa ran’ i saf rok ni bod rogon be’ nma gafaliy e saf;

bayi kunuy fapi fak e saf nga ta’bang,

ngi i fekrad nike dibeyrad;

bayi pow’iy e pi chitiningrad nib saf’og.

12 Mini’ e rayag rok ni nge l’ing e day u rigur nga pa’ nge foleg urngin ni bay,

ara foleg lanelang nga pa’?

Mini’ e rayag rok ni nge tay e but’ nu fayleng ngalan ba kap,

ara thabthabelnag e pi burey ni gagang’ nge yochi burey?

13 Rayag rok be’ ni nge yog ngak SOMOL e n’en ni nge rin’?

Mini’ e rayag rok ni nge fil ban’en ngak ara fonownag?

14 Gur mini’ e ke yan Got ngak

ni fan e nge nang ban’en me tamilangan’ riy

me fil ngak rogon i ngongliy ban’en?

15 U p’eowchen SOMOL e pi nam e yad bod ba wa’angachal u lan ba pakit,

ara bod ba tabyu’ u daken e thabthabel,

ma pi donguch nib orel e bod feni ba’ud ba ab.

16 Urngin e gamanman ni bay u fithik’ e garger nu Lebanon

e fa’anra ngani pi’ ni maligach ngak Got ma dabi gaman,

ma gek’iy riy e de gaman ni nge mang ma’af ko nifiy.

17 Pi nam e dabi aw angirad ngak.

18 I mini’ e rayag ni ngan ta’rebnag ngak Got?

Ra nga ni weliy rogon ya’an ma uw rogon?

19 De bod ba liyos nma ngongliy e girdi’ nib salap,

ma be’ nma maruwel ko gol e gabdiy e gol nga wuru’,

me duwgiliy ay nga daken e silber nge par nike sak’iy.

20 En ndabiyag puluwon e silber ara gol rok

e mel’eg e ren ndabi wod.

Me pir’eg be’ nib salap ko dimow liyos

ni nge ngongliy ba liyos ndabi thig.

21 Mogned, dawor mu nanged? Dawor mu rung’aged?

Dawor nog ngomed kakrom?

Dawor mu rung’aged rogon e fayleng ni sum?

22 Ke sunumiy e en ni bay nike par nga tagil’

u puluwon e fayleng ngalang ko gin nth’abi tolang;

ma girdi’ ni yad bay u but’ e be guyrad ni yad bod ga’ngin nochi apurgog!

Ir e filath lanelang ni bod bangi mad,

ni bod ba tent ni ngan par ngay.

23 Ma sobut’nag e pi’in nma gagiyeg nib gel gelingrad,

me m’aynag farad.

24 Yad bod e woldug ni kafini tugul,

kafini thay lik’ngin.

Ma nap’an ni pi’ SOMOL e nifeng nge yib,

me mororay me changegnag e nifeng ni bod ba ke pan nike mlik’.

25 I mini’ e rayag ni ngan ta’rebnag ngak Got nib thothup?

Gur bay be’ ni bod ir?

26 Mu sapgad ngalan e lang!

Mini’ e sunumiy e pi t’uf ni gimed be guy?

En ni be pow’iyrad ni bod baraba’ i salthaw ni pire’;

e manang uringrad,

ma pining fithingrad ni tata’ reb!

Gelngin e rib ga’,

dariy reb nike yan ngabang!

27 Israel, mang ni ga be yog

nde nang SOMOL e gafgow rom,

ara dar leamnag ni nge mat’awnag urngin ban’en ni fan ngom?

28 Da mu nang? Dawor mu rung’ag?

I SOMOL e ir fare Got ni bay i par ndariy n’umngin nap’an;

ir e sunumiy e fayleng ni ga’ngin.

Dar ma yib e magaer ngak ma dar m’ay gelngin.

Dariy be’ ni manang e leam rok.

29 Ma pi’ gelngin e pi’in ndakuriy gelngirad ma ka ra magaergad.

30 Mus ngak e pi’in ni bfel’ yangarrad ni yad ma me’waer i yan;

pi’in ku yad pagel e rayag ni ngar awgad nga but’ ko magaer.

31 Machane pi’in yad be toer ngak SOMOL ni nge ayuwegrad

e bay ra pir’eged nike yib gelngirad bayay.

Bay ra changeggad ngalang ni bod e arche’ ni eagle;

yad ra mil, ma dab ra magaergad;

ma yad ra yan, ma dabi m’ay gelngirad.