JOSHUA 13

Tin kabay e binaw ni yira kol

1 Ma aram e kari pilbithir Joshua. Me ga’ar SOMOL ngak, "Kar mu pilbithir, machane kabay e binaw ni kab ga’yang ni ku yira kol 2 ga’ngin yang fare gi but’ nu Filistia ngu Geshur, 3 ma ku errogon gubin yang e binaw rok yu Avvim ni bay ko yimuch. (Fare gi binaw ni tabab ko fa chipa’ i lul’ ni Shihor, ni bay ko mathil rok yu Egypt, me yan ko lel’och nib orel nge mada’ ko mathil u Ekron ni yima tay ni tafen piyu Kanaan; pi pilung rok yu Filistia e yad ma par u Gaza, ngu Ashdod, ngu Ashkelon, ngu Gath, ngu Ekron.) 4 Ma kabay ga’ngin fare nam rok yu Kanaan, nge yu Mearah (ni tafen piyu Sidon), me yan nge mada’ nga Afek, ni bay ko mathil nu Amor; 5 nge binaw rok yu Gebal; nge ga’ngin yu Lebanon ni bay ko ngek, ni yan u Baalgad, ni bay ko yimuch ko fare Burey ni Hermon, me yan i mada’ ko kanawo’ u thilin e but’ u Hamath. 6 Re gi binaw ney e ba mu’un ga’ngin e binaw rok piyu Sidon ngay, ni yad ma par ko fare binaw ni go’ burey u thilin fapi Burey nu Lebanon ngu Misrefoth Maim. Bay gu tuluf urngin e pi girdi’ ney nga wuru’ e binaw nnap’an ni be yib e girdi’ nu Israel i yib. Thingar mu f’oth fare gi binaw u daken piyu Israel, nri bod ni kugog ngom ni ngam rin’. 7 Ere chiney, e ngam f’oth e regi binaw ney u daken fa mereb i ganong nge baley ko birok Manasseh e ganong, ni fan e ngar tafned nge mil suwon ngorad."

F’oth ntay ko fare gi binaw ko ngek u Jordan

8 Ganong rok Ruben nge Gad nge baley ko ganong rok Manasseh e ke mu’ Moses i pi’ e binaw ni taferad, Moses ni ir e tapigpig rok SOMOL; pi yungi binaw nem e bay u ba’ ni ngek ko fare Lul’ nu Jordan. 9 Re gin’em ni taferad e tabab u Aroer (ni bay u thathren fare Loway ni Arnon) ni kub mu’un fare binaw ni bay u lukngun e re loway nem ngay ma ku arita’ gubin fa yungi flang nu Medeba nge mada’ nga Dibon. 10 Me yani mus ko mathil nu Ammon ni kub mu’un gubin e binaw ngay ni i gagiyegnag Sihon ni Pilung ko Amorite ni ir e ki i gagiyeg u Heshbon. 11 Kub mu’un yu Gilead ngay, nge yungi binaw nu Geshur ngu Maakah, nge ga’ngin fare Burey ni Hermon, nge ga’ngin yu Bashan nge yan i mada’ nga Salekah. 12 Bmu’un e gin ni gil’ilungun Og ni Pilung ngay, ni ir e en tomur ni magach ko pi Refaim, niki i gagiyegnag yu Ashtaroth ngu Edrei. I Moses e ke gel ngak e pi girdi’ ney ke tulufrad nga wuru’ e re gi but’ ney. 13 Machane yu Israel e dar tulufed e girdi’ nu Geshur ngu Maakah ngar chuwgad; kiyad be par u Israel.

14 Ma de pi’ Moses e binaw ngak fare ganong rok Levi. Aramrogon nike yog SOMOL ngak Moses ni yad e ngu’un pi’ ni f’oth rorad boch ko pi maligach ni yima urfiy u daken e altar rok SOMOL ni Got nu Israel.

Fare gi nug ni par rok Ruben

15 Me Moses e ke pi’ bang ko re gi binaw ney ngak e pi tabnaw nu lan e ganong rok Ruben ni ngar tafned. 16 Gin ni taferad e yan nge mada’ nga Aroer (ni bay u thathren fare Loway ni Arnon) nib mu’un fare binaw u lulukngun e re loway nem ngay ma ku arita’ gubin yang e yungi flang nib liyeg yu Medeba. 17 Ma kub mu’un yu Heshbon nge gubin e pi binaw nu daken e flang ngay Dibon, Bamoth Baal, Beth Baalmeon, 18 Jahaz, Kedemoth, Mefaath, 19 Kiriathaim, Sibmah, Zereth Shahar ni bay u daken e ted ko fare loway, 20 Bethpeor, nge sigre’en e Burey ni Pisgah, ngu Beth-Jeshimoth. 21 Kub mu’un gubin e binaw ni bay u daken e flang ngay nge ga’ngin fa gin’en nma gagiyegnag Sihon ni Pilung ko Amorite niki i gagiyeg u Heshbon. Me gel Moses ngak, ma ku errogon e pi tagagiyeg nu Midian: Evi, Rekem, Zur, Hur, nge Reba. Yad gubin ni ur gagiyeg niged fare nam rok Sihon ni Pilung. 22 U fithik’ fa pi’in nni li’rad e girdi’ nu Israel ngarm’ad e immoy Balaam riy ni fare mo’on ni fak Beor nma yi’iy. 23 Fare lul’ nu Jordan e aram e mathil u ba’ ni ngal ko fare ganong rok Ruben. Ba’aray e pi binaw nge yuchi binaw nni pi’ ngak fapi tabnaw u lan fare ganong rok Ruben ni ngar tafned.

Fare gi nug nni pi’ ngak Gad

24 Me Moses e ka’e pi’ bang ko fagi binaw ngak e pi tabnaw ko genong rok Gad ni ngar tafned. 25 Gin ni taferad e ba mu’un yu Jazer ngay nge urngin e pi binaw nu Gilead, nge baley ko fare but’ nu Ammon ni yan nge mada’ nga Aroer, ni bay ko ngek u Rabbah; 26 taferad e tabab u Heshbon me yan nga taw nga Ramath Mizpeh miki yan nge taw nga Betonim, me yan u Mahanaim nge taw ko mathil u Lodebar. 27 Mu lan e Loway ni Jordan e kub mu’un yu Beth Haram ngay, ngu Bethnimrah, ngu Sukkoth, ngu Safon, nge gin ni kabay nma gagiyegnag Sihon ni Pilung nu Heshbon. Ma mathil rorad ko ngal e fare Lul’ ni Jordan me yan ko lel’och nge mada’ ko Lipath nu Galilee. 28 Irera’ e pi binaw nge yuchi binaw nni pi’ ngak e pi tabnaw nu lan e ganong rok Gad ni ngar tafned.

Gin e Binaw nni pi’ ko ley ni Ngek e Manasseh

29 Me Moses e ki pi’ bang ko fagi binaw ngak e pi tabnaw u baley e genong rok Manasseh ni ngar tafned. 30 Re gin’em ni taferad e yan nge mada’ nga Mahanaim nib mu’un ga’ngin yang yu Bashan ngay — nge ga’ngin yang e gin ma gagiyegnag Og ni Pilung nu Bashan, ma ku errogon gubin fa nel’ i ragag e pi binaw nu Jair ni bay u lan yu Bashan. 31 Bmu’un baley yu Gilead ngay, ma ku arrogon yu Ashtaroth ngu Edrei, ni aram fa gal binaw ntochuch u lan e gin nma gagyegnag Og u Bashan. Ga’ngin yang e gin’ey nni pi’ ngak baley ko pi tabnaw ni pi’in owchen Makir nib mo’on ni fak Manasseh. 32 Irera’ rogon ni f’oth Moses fare gi but’ ko ngek u Jeriko ngu Jordan nnap’an ni immoy Moses u daken fa yungi flang nu Moab. 33 Machane de pi’ Moses bang e binaw ngak fare ganong ko pi Levite. Me yog ngorad ni tin nge milfan ngorad e reb e f’oth ni ngi i yib ko pi maligach ngak SOMOL ni Got rok yu Israel.