JOSHUA 2

Joshua ni l’oeg e damit nge yan nga Jeriko

1 Me l’oeg Joshua l’agruw i damit ko gin be par piyu Israel riy u Shittim ngranow nde nangrow be’, ma ke welthin ngorow nike ga’ar, "Marow ngam changargow u daken e nam, ngu lan e binaw nu Jeriko." Miyow yan mranow nga ba naun ni tafen Rahab ni be’ ni bpin nma chuway’ ngak, miyow par u rom. 2 Me rung’ag e pilung nu Jeriko murung’agrow ni lunguy, "Ke yib l’agruw ni’ u Israel ngaray e nep’ ney ni damit ni ngar nangew fan e nam!"

3 Me l’oeg fare pilung e thin nge yan ngak Rahab ni ga’ar, "Fa gal pumo’on ni yow bay u naun rom e karbow ni damit ni fan e nge tamilangan’row u daken e nam ni ga’ngin! Mfekrow i yib nga wean!" 4 Ma aram e ke fek e re pin nem fa gali pumo’on ke mithagrow, me fulweg ni ga’ar, "Ke yib l’agruw i pumo’on nga tabinaw rog, machane da gu nang ko uw e rabow riy. 5 Ra chuwgow u roy ko ngiyal’ nike chugur ni ngan ning e garog ko re binaw ney nike aw e lumor. Da gu nang e gin kar sorgow ngay, machane gimed ra gur ngam leked yow, ma rayag ni mkoled yow." 6 Machane fare pin e ke yan i tay row nga daken e chigiy ko naun rok, ke mithagrow nga fithik’ e flax*2:6 FLAX: Bmit e woldug ni yima gilk’ad ngan fanay thilen ni tret. nike tay ngaram ni nge mlik. 7 Ma yugu nap’an ni chuw fapi pumo’on ni l’oegrad fare pilung u rom u lan e binaw ngranod min ning e garog ko fare binaw. Miyad yan ni yad be gay fa gali damit ngar mada’gad ko gin yima thum’ riy nga barba’ e lul’ ni Jordan.

8 Dawori pag fa gali pumo’on yow nga but’, me yan Rahab nga daken e chigiy, 9 me ga’ar ngorow, "Gu manang ni SOMOL e ke pi’ ngomed e re nam ney, ma nggog ngomew ni gamad gubin e re nam ney ni kug rusgad ngomed. 10 Kug rung’aged rogon ni mliknag SOMOL e ran ko Red Sea nge yag ni mu chuwgad u Egypt. Ma ku gu rung’aged rogon ni ka mu thanged owchen Sihon nge Og, ni fa gal pilung nu Amor ko ley ni ngek fare lul’ ni Jordan. 11 Nap’an ni gu rung’aged magmad rus; ra be’ ma ke mulan’ ni bochmed. I SOMOL ni Got romed e ir e Got nu tharmiy ngu roy u but’. 12 Ere mmichegew ngog u daken fithingan SOMOL ni gimew ra ayuweg girdi’en e tabnaw rog, ni bod ni ku gu ayuwegmew, mi gimew pi’ ba pow ngog nrayag ni nge pagan’ug ngomew. 13 Michegew ngog ni gimew ra ayuweg e pogofan ko chitamag nge chitinag, nge pi walageg ni pumo’on nge ppin, nge gathon e tabnaw rorad! Dab mu pagew gamad ngan thang e pogofan romad!"

14 Me ga’ar fa gali mo’on ngak, "Gamow ra pi’ e pogofan romow ngalon e pogofan romed! Fa’anra dabmog e n’en ni kug bownag, ma gamow ra tay u tagil’ e tin ku gognew ngom ko ngiyal’ nra pi’ SOMOL e re nam ney ngomad."

15 Rahab e ma par u lan ba naun ni kan toy nga fithik’ fare yoror ni malang ko re binaw nem, me nguchruy ba tal u winda rok nge yan u ba’ ni wuru’ e yoror ko fare binaw nga but’ nge yan fa gali mo’on riy nga but’. 16 Me ga’ar ngorow, "Marow ko gin bay e burey riy, ya ra piri’egmew fapi pumo’on nike l’oegrad e en ni pilung. Ngam mithgow u rom ni dalip e rran nge mada’ ko ngiyal’ ni kar sulod ngaray. Ma aram mfin gimew yan." 17 Me ga’ar fa gali mo’on ngak, "Bay gu tew nga tagil’ fare bugithin ni kam wenignag ngomow ni nggu michegew ngom. 18 Mu telim. Nap’an ni gamad ra yib nga daken e nam romed, ma ga m’ag e re gaf ney nib row ko winda rom ni ir e gu luwgow riy nga but’. Ma ga tay e chitamam nge chitinam, nge pi walagem ni pumo’on nge urngin e girdi’ ko tabinaw rok e chitamam nga naun rom. 19 Ma fa’anra yan be’ u naun rom ngalan e kanawo’, ma yam’ nra tay e ir e kireb rok, ma aram e dariy rogon ngomow; ma fa’anra maad’ad be’ u lan e naun rom, mra yan i aw ni gamow e kireb romow. 20 Machane fa’anra mu weliy e n’en ni kug bownag, ma aram e dab kug tew nga tagil’ e tin kug michegew ngom ni gamow ra rin’ ni fan ngom." 21 Me fulweg ni ga’ar, "Thin romew e aram rogon ni nge par riy." Ma aram me yog ngorow ni ngranow, miyow yan. Me m’ag fare tal nib row ko winda rok.

22 Ma aram miyow yan ko gin bay e burey riy ngar mithgow u rom, ma aram e ke yan fapi pumo’on ni l’oegrad fare pilung ni yad be gayrow u wuru’ fare binaw i yan ni dalip e rran. Ma dar pir’eged be’ miyad sul ngalan e binaw nu Jeriko. 23 Ma aram me yib fa gal damit u daken e burey nga but’, miyow th’ab fare lul’ nga baraba’ ngar sulow ngak Joshua, miyow weliy urngin ban’en ngak. 24 Me lungurow ngak, "Kari mich u wun’mow nike pi’ SOMOL ngodad e re nam nem ni ga’ngin. Ya urngin e girdi’ nu rom ni kar rusgad ngodad."