JOSHUA 19

Gi binaw nni pi’ ngak Simeon

1 Ma en ni migid nni pi’ e binaw rok e fapi tabnaw nu lan e ganong rok Simeon. Fare gi binaw e yan nge taw nga daken e gi but’ nni pi’ ko ganong rok Judah. 2 Nib mu’un ngay yu Beersheba, Sheba, Moladah, 3 Hazar Shual, Balah, Ezem, 4 Eltolad, Bethul, Hormah, 5 Ziklag, Beth Markaboth, Hazar Susah, 6 Beth Lebaoth, nge Sharuhen: ragag nge dalip e binaw u gubin nib mu’un e yochi binaw nib liyeg e pi binaw ney ngay.

7 Ma ku arrogon yu Ain, Rimmon, Ether, ngu Ashan: aningeg e binaw u gubin nib mu’un e yochi binaw nib liyeg e pi binaw ney ngay. 8 Kub mu’un urngin e yuchi binaw ngay nib liyeg e pi binaw ney ni yan nge taw nga Baalath Beer (ara Ramah), ni bay ko yimuch. Irera’ e re gi but’ nni pi’ ngak e pi tabnaw nu lane ganong rok Simeon ni ngar tafned. 9 Bang ko fa gi binaw nni pi’ ngak Judah e ni pi’ ngak fare ganong rok Simeon ni bochan e kay gi ga’ yang e binaw rok Judah kar gaman gad riy ke aw.

Gi binaw nni pi’ ngak Zebulun

10 Bin dalip e f’oth ko binaw e ni pi’ ngak fapi tabnaw nu lane ganong rok Zebulun. Re gi but’ nni pi’ ngorad e yan nge taw nga Sarid. 11 I yan e mathil riy u rom ko ngal nge mada’ nga Mareal, me yan u mirichlen yu Dabbesheth nge alublub ko ngek u Jokneam. 12 Me yan u rom ko ngek u Sarid ko mathil nu Kisloth Tabor, me yan nga Daberath nge forthog nga talang u Jafia. 13 Miki yan riy i yan ko ngek nge mada’ nga Gath Hefer ngu Ethkazin, me chiygog nge sor i yan nga Neah ko wo’ ni yan nga Rimmon. 14 Ma mathil u lel’och e chiygog nge sor i yan nga Hannathon, me yan i mus ngalan fare Loway ni Iftahel. 15 Nib mu’un yu Kattath ngay, Nahalal, Shimron, Idalah, nge Bethlehem: ragag nge l’agruw e binaw u gubin nib mu’un e yuchi binaw nib liyeg e pi binaw ney ngay. 16 Pi binaw ney nge yuchi binaw riy e go’ bay u daken fa gi but’ nni pi’ ngak e pi tabnaw nu lane ganong rok Zebulun ni ngar tafned.

Gi binaw nni pi’ ngak Issakar

17 Ma bin aningeg e f’oth ko binaw e ni pi’ ko fapi tabnaw nu lane ganong rok Issakar. 18 Re gin’em e ba mu’un yu Jezreel ngay, Kesulloth, Shunem, 19 Hafaraim, Shion, Anaharath, 20 Rabbith, Kishion, Ebez, 21 Remeth, Engannim, Enhaddah, nge Bethpazzez. 22 Ma mathil riy e kub peth nga Tabor, Shahazumah, nge Beth Shemesh, me yan i mus ko Jordan. Ragag nge nel’ u gubin e binaw nib mu’un e yuchi binaw nib liyeg e pi binaw ney ngay. 23 Pi binaw ney nge pi yuchi binaw riy e go’ bay u daken fa gi but’ nni pi’ ngak e pi tabnaw nu lane ganong rok Issakar ni ngar tafned.

Gi binaw nni pi’ ngak Asher

24 Ma bin lal e f’oth ko binaw e ni pi’ ngak fapi tabnaw nu lane ganong rok Asher. 25 Re gi but’ nem e ba mu’un yu Helkath, Hali, Beten, Akshaf, 26 Allam Melek, Amad, nge Mishal ngay. Ma ngal riy e ba peth e mathil riy nga Karmel nge Shihor Libnath. 27 Ma nap’an ni cheal ko ngek, me yan e mathil riy nga Bethdagon, nib peth nga Zebulun nge fare Loway ni Iftahel ni bay ko wo’ nga lel’och ni sor nga Bethemek nge Neyel. Miki yan u rom nga lel’och nga Kabul, 28 Ebron, Rehob, Hammon, nge Kanah, me yan nge taw nga Sidon. 29 Me cheal fare mathil nge sor nga Ramah, nge yan i taw ko fare binaw ni Tyre ni kan yororiy nib tolang ni fan ko mael; ma aram me chiygog nga Hosah me yan i mus ko fare gi Day ni Mediterranean fithingan. Nib mu’un ngay yu Mahalab, Akzib, 30 Ummah, Afek, nge Rehob: reliw’ nge l’agruw e binaw u gubin nib mu’un e yuchi binaw nib liyeg pi binaw ney ngay. 31 Pi binaw ney nge yuchi binaw nib mu’un ngorad e go’ bay u daken fa gi but’ ni kan pi’ ngak e pi tabnaw nu lan fare ganong rok Asher ni ngar tafned.

Gi binaw nni pi’ ngak Naftali

32 Ma bin nel’ e f’oth ko binaw e ni pi’ ko fapi tabnaw nu lane ganong rok Naftali. 33 Mathil riy e yan u Helef nge taw ko fare ke gek’iy ni oak u Zaanannim, me yan u rom nga Adaminekeb me yan riy nga Jamnia, me yan nge taw nga Lakkum, me yan i mus ko Jordan. 34 Me chiygog ko ngal nge yan nga Aznoth Tabor, me yan u rom nga Hukkok, nge yan i peth nga Zebulun ko yimuch, nge Asher ko ngal, nge Jordan ko ngek. 35 Pi binaw ni kan yororiy ni fan ko mael e yu Ziddim, Zer, Hammath, Rakkath, Kinnereth, 36 Adamah, Ramah, Hazor, 37 Kedesh, Edrei, Enhazor, 38 Yiron, Migdalel, Horem, Bethanath, nge Beth Shemesh: ragag nge mereb e binaw u gubin nib mu’un e yochi binaw nib liyeg e pi binaw ney ngay. 39 Pi binaw ney nge yuchi binaw nib mu’un ngorad e go’ bay u daken fa gi but’ ni kan pi’ ngak e pi tabnaw nu lan fare ganong rok Naftali.

Gi binaw nni pi’ ngak Dan

40 Ma bin medlip e f’oth ko binaw e ni pi’ ko fapi tabnaw ko ganong rok Dan. 41 Re gin’em e ba mu’un yu Zorah ngay, ngu Eshtaol, Irshemesh, 42 Shaalbim, Aijalon, Ithlah, 43 Elon, Timnah, Ekron, 44 Eltekeh, Gibbethon, Baalath, 45 Jehud, Beneberak, Gathrimmon, 46 Mejarkon, nge Rakkon, ma ku errogon fa gi nug nib liyeg yu Joppa. 47 Nap’an ni mul e binaw u pa’ e tirok Dan e girdi’, mranod nga Laish ngar maelgad ngay. Miyad kol fare binaw, ngar thanged mit e girdi’ riy, me par nike milfan ngorad. Miyad par u rom ngar thilyeged fithingan fare binaw nu Laish ngar tunguyed yu Dan ngay, ni aram fithingan e ga’ rorad.✝19:47 Jdg 18:27–29 48 Pi binaw ney nge yuchi binaw riy e go’ bay u lan fa gi binaw nni pi’ ngak fapi tabnaw nu lan e ganong rok Dan ni ngar tafned.

Gin’en nth’abi tomur ko fare but’ nni pi’

49 Nap’an ni mu’ e girdi’ nu Israel i f’oth fa gi binaw, miyad pi’ bang ko fare gi binaw’ nge tafnay Joshua ni be’ nib mo’on ni fak Nun. 50 Bod ni tay SOMOL chiylen ngorad, miyad pi’ ngak fare binaw ni ning: Timnath Serah, ni bay u Efraim ni go’ burey. I ngongliy rogon fare binaw nge par u rom.

51 I Eleazar ni prist, nge Joshua nib mo’on ni fak Nun, nge pi’in yad ma yog e thin rok e pi tabnaw ko pi ganong nu Israel e ra pi’ed e yungi binaw ney ni bod rogon ni duwgil ko pow nra girengiyed ni yad be fith lanyan’ SOMOL u Shiloh, u langan e mab ko fare Tent u p’eowchen SOMOL. Aray rogon nra ted e f’oth ko fayu ngi binaw.