JOSHUA 23

Tin tomur e thin ni weliy Joshua

1 Me n’uw nap’an nike tay SOMOL yu Israel ndariy ban’en ni ka be buch u thilrad e pi to’ogor rorad nib liyegrad. Ngiyal’ nem e kari pilbithir Joshua, 2 ma aram me pining gubin yu Israel nga ta’bang, ni pi’lal, nge pi’in yad ma yog e thin, nge pi tayugang’, nge pi tolang, me ga’ar ngorad, "Chiney e kar gu pilbithir. 3 Kam guyed urngin e tin ke rin’ SOMOL ni Got romed ngak gubin e pi nam ney ni bochmed. I SOMOL ni Got romed e ki i cham ni fan ngomed. 4 Kug pi’ ni nge tafnay e pi ganong romed e binaw rok e pi nam ni kabay, ma ku errogon gubin e pi nam ni go’ kug gel ngorad, i tabab ko Lul’ ni Jordan ko ngek me yan i mus ko fare gi Day ni Mediterranean ko ngal. 5 I SOMOL ni Got romed e bayi thuruyrad nga wuryel u p’eowchamed, ma bayi tulufrad nga orel u nap’an ni gimed be yan i yan nga m’on. Bay mu tafned taferad ni bod rogon nike micheg SOMOL ni Got romed ngomed. 6 Ere nopa’med ni ngu’um folwokgad ma gimed be rin’ urngin e tin kan yoloy ngalan fare ke babyoren e Motochiyel rok Moses. Dab mu n’iged bang riy, 7 ma aram e dab um ma’thukgad nga girdi’en e pi nam ney ni yad be par u fithik’med ara un fithingan e pi got rorad u l’ugunmed ara mu micheged ban’en u fithingan e pi got rorad ara mu ted farad ara mu siro’gad ngorad. 8 Ya n’en ni ngam rin’ed e ngam yul’yul’gad ngak SOMOL, ni bod rogon ni ku’um rin’ed ke mada’ ko chiney. 9 Ke tuluf SOMOL girdi’en e pi nam nib gel gelngirad kar chuwgad nnap’an ni gimed be yan i yan nga m’on, ma dariy be’ ni yag ni nge gel ko togopluw ni tay ngomed. 10 Demturug bigimed ma rayag rok ni nge tuluf bbiyu’ i pumo’on ngar milgad, ni bochan SOMOL ni Got romed e be cham ni fan ngomed, nri bod rogon nike micheg. 11 Ere nopa’med, ni nge t’uf romed SOMOL ni Got romed. 12 Fa’anra dab mu yul’yul’gad mi gimed un nga pangin e girdi’ ko pi nam ni yad be par u fithik’med mi gimed m’ag e mabgol ngorad, 13 ma rrigimed manang ni SOMOL ni Got romed e dabki tuluf girdi’en e pi nam ngar chuwgad u nap’an ni gimed be yan i yan nga m’on. Bay ra manged maad’ad u puluwomed ni bod e wup, ara low, nge dimow u daken keru’med nrib amith, ara rachangal u lan owchemed. Ma bayi par ni aray rogon nge taw ko ngiyal’ ndakuriy bigimed u lan re nam nfel’ ney ni pi’ SOMOL ni Got romed ngomed.

14 "Chiney e ke taw ko ngiyal’ ni nggum’ riy. Gimed gubin nra bigmed ma manang u lan gumircha’en ngu fithik’ i lanyan’ ni SOMOL ni Got romed e ke pi’ urngin e tin nib manigil ngomed ni micheg nra pi’. Urngin e tin ni micheg e go’ ke rin’ nrogon; dariy reb ni pag. 15 Machane rrogon nike rin’ urngin e tin ni micheg nra rin’ ngomed, e ri ku aram rogon nra pag urngin e riya’ nge yib ngomed. 16 Fa’anra dab mu ayuweged fare m’ag nike yog SOMOL ni Got romed ni ngam ayuweged, ma gimed be pigpig ma gimed be tayfan yug boch e got, ma aram e ra gechig nagmed u fithik’ e damumuw rok, ma dabi n’uw nap’an ma dakuriy ta’ab gimed ni kura magey u lan e re nam ney nib manigil nike pi’ ngomed."