Josué 14

F’oth ko nug u ba’ ni ngal e Jordan

1 Babyoren rogon fare but’ nu Kanaan u ba’ ni ngal e Jordan nni f’oth u daken e pi girdi’ ney nu Israel. I Eleazar ni prist, nge Joshua nib mo’on ni fak Nun, nge pi’in yad ma yog e thin ko pi tabnaw u lan fapi ganong nu Israel e ra f’othed fare gi but’ rok e girdi’ ni gubin. 2 Ni bod rogon ni yog SOMOL ngak Moses, ni duwgil ko pow nni girengiy nge gagyelnag e yungin ni nge milfan ngak fa mereb nge balay e ganong u ba’ ni ngal e Jordan. 3,4 Moses e ke mu’ i pi’ fagi but’ ko ba’ ni ngek u Jordan ngak yug l’agruw e ganong nge ngak baley e ganong. (Pi’in owchen Josef e kar ki’gad ke yib l’agruw e ganong riy: Manasseh nge Efraim.) Yug aram rogon, ma Moses e de pi’ bang riy ni nge milfan ngak e pi Levite, yug boch e binaw e ke yag ngorad ni ngar pired riy, ni bay yungi flang riy ni fan ko garbaw nge yu ran’ i gamanman rorad. 5 Girdi’ nu Israel e ra f’othed fare gi but’ ni bod ni yog SOMOL ngak Moses.

Yu Hebron e ni pi’ ngak Kaleb

6 Me reb e rran me yib boch e girdi’ ko ganong rok Judah ngak Joshua nga Gilgal. Bagyad e Kaleb nib mo’on ni fak Jefunneh ni reb e Kennizzite, me ga’ar ngak, "Gamnang e n’en ni yog SOMOL u Kadesh Barnea ni murung’agdow ngak Moses, ni fare mo’on ni girdi’ rok Got. 7 I gag e aningeg i ragag e duw yangreg nnap’an ni l’oeg fare tapigpig rok SOMOL i Moses u Kadesh Barnea ni nggu wan gu damteg e re binaw ney. Ma tin gu sul nggub gu weliy ngak e rib riyul’.✝14:7 Num 13:1–30 8 Ma fapi pumo’on nra uned ngog e ra k’aringed e morus ngak e girdi’ rodad. Machane rug tay u gil’ nggu fol rok SOMOL ni Got rog. 9 Ma bochan ni gu fol, me micheg Moses ngog ni pifakag nge gag e rayag ngomad ni nggu tafned e re gi but’ ni kug waen u daken. 10 Machane chiney e amuguy. Ke gaman e aningeg i ragag nge lal e duw n’umngin nap’an ni yog SOMOL e ran’ey ngak Moses. Ngiyal’nem e nap’an ni ka be yan yu Israel u daken e desert, i SOMOL, e rogon ni micheg e ke teg ni kugub fos ke mada’ ko chiney. Mu changar ngog! Ke gaman e meruk i ragag nge lal e duw yangreg 11 ma ka rogon fenag gel e chiney e ku bod rogon e ngiyal’ ni ba’aram ni l’oegeg Moses nggu waen ni damit. Ku gub gel ni ku rayag ni ngu’un ko mael ara demturug e mit i n’en. 12 Ere chiney e ngam pi’ ngog fare gi binaw ni bay u daken e ted ni ognag SOMOL ngog e rofen ni ba’aram ni gubad fapi pumo’on gu welyed murung’agen. Gogned ngom e ngiyal’nem ni fa mit i girdi’ nib ga’ ma ba tagyet ni kanog e Anakim ngorad e yad bay u rom u lan bogi binaw nib ga’ ma kan yororiy. Sana ra un SOMOL ngog, mu gu tulufrad ngar chuwgad u rom, ni bod ni yog SOMOL."

13 Me yiblay Joshua i Kaleb nib mo’on ni fak Jefunneh me pi’ fare binaw ni Hebron ngak ni nge tafnay. 14 Yu Hebron e kab milfan ngak e pi’in owchen Kaleb nib mo’on ni fak Jefunneh ni reb e Kenizzite, ni bochan e i tay u gil’ ngi i fol rok SOMOL, ni Got rok yu Israel. 15 U m’on ni buch e pin’ey ma yu Hebron e yima yog ni binaw rok Arba. (I Arba e cha’ nth’abi gilbugwan ma ba tagyet rok e pi Anakim.)

Ma ngiyal’ney e ba gapas langgin fare nam.