JOSHUA 15

Gi binaw nni midilnag ngak Judah

1 Pi tabnaw nu lane ganong rok Judah e ni pi’ bang e binaw ngorad ni ba’aray rogon:

Rengi binaw nem e yan ko yimuch nge yan i mus nga tabonggin fare gi ted nu Zin, ni bay ko mathil nu Edom. 2 Re mathil ney ko yimuch e yan u ley ni yimuch ko fare gi day ni Dead Sea, 3 me sor ko yimuch u Akrabbim Pass nge yan i mada’ nga Zin. Me yan ko yimuch u Kadesh Barnea, nge pag yu Hezron me yan nga Addar, me chiygog nge sor nga Karka, 4 me yan u rom nga Azmon, me lek fachipa’ i lul’ ni bay ko mathil nu Egypt me yan i mus ko Day ni Mediterranean, ni aram e gin ni mus e fare mathil riy. Aram e mathil rok Judah ko yimuch.

5 Ma mathil ko ngek e fare gi day ni Dead Sea fithingan, me yan i mada nga p’ebgul ni gin i tabab e lul’ riy ngafini yib i po’ nga langgin e Jordan.

Fare mathil ko lel’och e aram e gin ni tabab riy, 6 me sor u rom nga talang nge nga Beth Hoglah, me yib nge thilyeg yu Beth-arabah u ba’ ni lel’och. Ma aram me yan u rom ko fare Malang rok Bohan (I Bohan e be’ ni pumo’on ni fak Ruben), 7 me yan u rom ko Loway ni wagagey fithingan nga talang u Debir, ma aram me chiygog ko lel’och nge yan nga Gilgal, ni bay u puluwon fare Kanawo nu Adummim u ba’ ni yimuch ko fare loway. Meyib u rom ko fapi alublub nu Enshemesh me yan nga Enrogel, 8 me sor nga talang nge yan u lan fare Loway ni Hinnom ni bay u ba’ ni yimuch ko fachi burey, ni aram e gin’en u Jerusalem ni immoy fare binaw rok piyu Jebus riy. Miki forthog fare mathil u rom ngalang nga p’ebgul fachi burey u ba’ ni ngal ko fare Loway ni Hinnom, ni bay u ley ni lel’och ko fare Loway ni Refaim. 9 Me yan u rom ko fapi Alublub nu Neftoah me yan i og nga langgin fapi binaw ni bay u to’oben e Burey ni Efron. Me cheal u rom nge yan nga Baalah (ara Kiriath Jearim), 10 me chiygog ko ngal u Baalah nge sor i yan ko binaw nu Edom ni go’ burey, me yan u rom nga ba’ ni lel’och ko fare Burey ni Jearim (ara Kesalon), me log nga Beth Shemesh, me yan nge pag yu Timnah. 11 Me yan fare mathil u rom nga daken bochi burey ni bay ko lel’och u Ekron, me cheal nge sor i yan nga Shikkeron, nge pag e Burey ni Baalah, me yan u rom nga Jamnia. Me yan i mus fare mathil ko fare gi Day ni Mediterranean, 12 ni aram e gin ni sum e mathil ko ngal riy.

U lan e pi mathil ney e i par e girdi’ ko pi tabnaw rok Judah riy.

I Kaleb ni kol fa gal binaw nu Hebron ngu Debir

13 Bang ko fare gi binaw rok Judah e ni pi’ ngak Kaleb nib mo’on ni fak Jefunneh, ni be’ ko fare ganong rok Judah, ya aray rogon ni yog SOMOL ngak Joshua ni nge rin’. I yag yu Hebron ngak, ni fare binaw nib milfan ngak Arba, ni chitamngin Anak. 14 Me tuluf Kaleb e pi’in owchen Anak ngar chuwgad u lan fare binaw — ni aram fa yuke girdi’ rok Sheshai, nge Ahiman, nge Talmai. 15 Me yan u rom ni nge cham ngak fapi girdi’ ni be par u Debir. (Re binaw ney e unog fithingan ni Kiriath Sefer.) 16 Me ga’ar Kaleb, "Gu ra pi’ Aksah ni be’ ni bpin ni fakag nge le’engiy e re mo’on nrayag rok ni nge kol yu Kiriath Sefer." 17 Me Othniel ni be’ ni pumo’on ni fak Kenaz ni walagen Kaleb e kol fare binaw, ma aram me pi’ Kaleb i Aksah ni fare pin ni fak ni nge le’engiy Othniel. 18 Ma rofen nm’agpa’row me towaser Othniel ngak le’engin ni nge ning bang e flang ngak Kaleb ni chitamngin. Me og Aksah nga but’ u daken e dongki rok, me fith Kaleb ngak ko mang e ba’adag. 19 Me fulweg ni ga’ar, "Ba t’uf boch e alublub rog. Ya fare gi binaw ni kam pi’ ngog e bangi daken e ted nib mlik’ e but’ riy." Ma aram me pi’ Kaleb fapi alublub u talang nge tin bay u pe’ning ngak.

Pi binaw rok Judah

20 Irera’ e re gi binaw nni pi’ ngak fapi tabnaw nu lan e ganong rok Judah ni ngar tafned. 21 Pi binaw nib palog ko yimuch nib bmilfan ngorad, tin nib chugur ko mathil nu Edom, ni aram yu Kabzeel, ngu Eder, ngu Jagur, 22 ngu Kinah, ngu Dimonah, ngu Adadah, 23 ngu Kedesh, ngu Hazor, ngu Ithnan, 24 ngu Zif, ngu Telem, ngu Bealoth, 25 ngu Hazor Hadattah, ngu Kerioth Hezron (ara Hazor), 26 ngu Amam, ngu Shema, ngu Moladah, 27 ngu Hazar Gaddah, ngu Heshmon, ngu Bethpelet, 28 ngu Hazar Shual, ngu Beersheba, ngu Biziothiah, 29 ngu Baalah, ngu Iim, ngu Ezem, 30 ngu Eltolad, ngu Chesil, ngu Hormah, 31 ngu Ziklag, ngu Madmannah, ngu Sansannah, 32 ngu Lebaoth, ngu Shilhim, ngu Ain, ngu Rimmon: rliw’ nge mereb e binaw u gubin, nib mu’un e yochi binaw nib liyeg e pi binaw nem ngay.

33 Pi binaw u enggin e burey e yu Eshtaol, Zorah, Ashnah, 34 Zanoah, Engannim, Tappuah, Enam, 35 Jarmuth, Adullam, Soko, Azeka, 36 Shaaraim, Adithaim, Gederah, nge Gederothaim: ragag nge aningeg e binaw u gubin, nib mu’un e yochi binaw nib liyeg e pi binaw nem ngay. 37 Ma ku errogon yu Zenan, ngu Hadashah, ngu Migdalgad, 38 ngu Dilean, ngu Mizpah, ngu Joktheel, 39 ngu Lakish, ngu Bozkath, ngu Eglon, 40 ngu Kabbon, ngu Lahmam, ngu Chitlish, 41 ngu Gederoth, ngu Bethdagon, ngu Naamah, ngu Makkedah: ragag nge nel’ e binaw u gubin, nib mu’un e yuchi binaw nib liyeg e pi binaw nem ngay.

42 Ma ku errogon yu Libnah, ngu Ether, ngu Ashan, 43 ngu Iftah, ngu Ashnah, ngu Nezib, 44 ngu Keilah, ngu Akzib, ngu Mareshah: mereb e binaw u gubin, nib mu’un e yochi binaw nib liyeg e pi binaw nem ngay.

45 Ma errogon yu Ekron nge lan binaw riy nge yochi binaw riy, 46 nge urngin e binaw nge yochi binaw nib chugur nga Ashdod, ni mus u Ekron me yan i mada’ ko fare gi Day ni Mediterranean.

47 Ma ku arrogon yu Ashdod ngu Gaza, nge yochi binaw nge binaw riy, nge yani mada’ ko fare pa’ i lul’ ni bay u lane mathil nu Egypt nge dap’eday ko fare gi Day ni Mediterranean.

48 Mu daken e ted ni go’ burey e bay yu Shamir riy, ngu Jattir, ngu Sokoh, 49 ngu Dannah, ngu Kiriath Sefer (ara Debir), 50 ngu Anab, ngu Eshtemoa, ngu Anim, 51 ngu Goshen, ngu Holon, ngu Giloh: ragag nge ta’reb e binaw u gubin nib mu’un e yuchi binaw nib liyeg e pi binaw nem ngay.

52 Ma ku arrogon yu Arab, ngu Dumah, ngu Eshan, 53 ngu Janim, ngu Beth Tappuah, ngu Aphekah, 54 ngu Humtah, ngu Hebron, ngu Zior: mereb e binaw u gubin nib mu’un e yuchi binaw nib liyeg e pi binaw nem ngay.

55 Ma ku arrogon yu Maon, ngu Karmel, ngu Zif, ngu Juttah, 56 ngu Jezreel, ngu Jokdeam, ngu Zanoah, 57 ngu Kain, ngu Gibeah, ngu Timnah: ragag e binaw u gubin nib mu’un e yuchi binaw nib liyeg e pi binaw nem ngay.

58 Ma ku arrogon yu Halhul, ngu Bethzur, ngu Gedor, 59 ngu Maarath, ngu Bethanoth, ngu Eltekon: nel’ e binaw u gubin nib mu’un e yuchi binaw nib liyeg e pi binaw nem ngay.

60 Ma ku arrogon yu Kiriath Baal (ara Kiriath Jearim) ngu Rabbah: l’agruw e binaw u gubin nib mu’un e yuchi binaw nib liyeg e gal binaw nem ngay.

61 Mu lan e ted ni desert e bay yu Beth Arabah riy, ngu Middin, Sekakah, 62 ngu Nibshan, ngu Salt City, ngu Engedi: nel’ e binaw u gubin nib mu’un e yuchi binaw nib liyeg e pi binaw nem ngay.

63 Machane pi girdi’ rok Judah e de yag rorad ni ngar tulufed u Jerusalem e pi Jebusite ni ur pired u rom. Pi Jebusite e kayad bay u rom ni yad be par u fithik’ e pi girdi’ nu Judah.