1 Pi’in yad ma yog e thin ko pi tabnaw nu lane ganong rok Levi e ranod ngak Eleazar ni prist, nge Joshua ni be’ ni pumo’on ni fak Nun, nge ngak e pi’in lolgen e pi tabnaw u gubin fapi ganong nu Israel. 2 U rom u Shiloh u lan fare nam nu Kanaan e lungurad riy ngorad, "I yog SOMOL ngak Moses ni yira pi’ boch e binaw ngomad ni nggu pired riy, ma ku arrogon e yungi flang nib liyeg e pi binaw nem ni fan ko gamanman romad." 3 Ere bod rogon ni yog SOMOL ngak e girdi’ nu Israel, ma aram miyad pi’ ngak e pi Levi boch e binaw rorad nge pi flang riy ni nge tafnay e gamanman rorad.

4 Pi tabnaw ko fare ke girdi’ rok Kohath u lan e ganong rok Levi e th’abi som’on nni pi’ boch e binaw ngorad. Pi tabnaw ni owchen Aron ni prist e npi’ ragag nge dalip e binaw u daken e gin tafen Judah, Simeon nge Benjamin. 5 Ma tin kabay ko fare ke girdi’ rok Kohath e npi’ ragag e binaw ngorad u daken e gin tafen pi Efraim, nge Dan nge ba’ ni Ngal e Manasseh.

6 Fare ke girdi’ rok Gershon e ni pi’ ragag nge dalip e binaw ngorad u daken e gin tafen Issakar, Asher, Naftali, nge ba’ ni Ngek e Manasseh.

7 Fapi tabnaw rok fare ke girdi’ rok Merari e ni pi’ ragag nge l’agruw e binaw ngorad u daken e gin tafen Ruben, Gad, nge Zebulun.

8 Girdi’ nu Israel e ra girengiyed e pow ni nge duwgil e pi binaw ney nge yungi flang riy ni fan ko pi Levi, ni bod ni yog SOMOL ngak Moses. 9 Irera’ fithingan e pi binaw u daken e gin tafen Judah nge Simeon ni fa’an nni pi’ 10 ngak e pi’in owchen Aron nrabad ko fare ke girdi’ rok Kohath, ni pi’in owchen Levi. Yad e th’abi som’on nni pi’ taferad. 11 Ni pi’ ngorad fare binaw nu Arba (Arba e chitamngin Anak), chiney e yima yog yu Hebron ngay, ni bang ni go’ burey u Judah, nib mu’un e flang riy ngay nib liyeg ni fan ko chugol gamanman. 12 Machane, yungi flang ko re binaw nem nge yuchi binaw riy, e go’ kan pi’ ngak Kaleb nib mo’on ni fak Jefunneh ni nge tafnay.

13 Yungin nchagiy nga Hebron (Hebron e reb fapi binaw ntagil’ e ayuw) ngan pi’ ngak e pi’in owchen Aron ni prist e yu, 14 Jattir, Eshtemoa, 15 Holon, Debir, 16 Ain, Juttah, nge Beth Shemesh, nge yungi flang riy ni fan ko chugol gamanman: mereb e binaw nni fek ko ganong rok Judah nge Simeon. 17 Ma gin tafen Benjamin e ni pi’ aningeg e binaw riy ngorad: Gibeon, Geba, 18 Anathoth, ngu Almon, nib mu’un e pi flang ko pi binaw nem ngay ni fan ko gamanman rorad. 19 Ragag nge dalip e binaw u gubin, nib mu’un e pi flang ko pi binaw nem ngay ni fan ko pi gamanman rorad, e ni pi’ ngak fapi prist ni pi’in owchen Aron.

20 Ma tin kabay ko pi tabnaw ko fare ke girdi’ rok Kohath u lan fare ganong rok Levi e ni pi’ boch e binaw ngorad u lan tafen Efraim. 21 Aningeg e binaw nni pi’ ngorad: Shekem nge pi flang riy ni fan ko gamanman u Efraim ni go’ burey (irera’ reb fapi binaw ntagil’ e ayuw), ngu Gezer, 22 Kibzaim, ngu Beth Horon, nib mu’un e pi flang ko pi binaw ney ngay ni fan ko gamanman rorad. 23 Mu lan tafen Dan e ni pi’ aningeg e binaw riy ngorad: Eltekeh, Gibbethon, 24 Aijalon, ngu Gathrimmon, nib mu’un e pi flang ko pi binaw ney ngay ni fan ko gamanman rorad. 25 Mu ba’ ni Ngal e Manasseh e ni pi’ l’agruw e binaw riy ngorad: Taanak ngu Gathrimmon, nib mu’un e flang ko gal binaw ney ngay ni fan ko gamanman rorad. 26 Pi tabnaw ney ko fare ke girdi’ rok Kohath e ragag e binaw u gubin nge yungi flang riy ni fan ko gamanman nni pi’ ngorad.

27 Ma fare ke girdi’ rok Gershon ni ka fare ganong rok Levi e ni pi’ l’agruw e binaw ngorad ko gin tafen e ba’ ni Ngek e Manasseh: Golan u lan yu Bashan (ni reb fapi binaw ntagil’ e ayuw) ngu Beeshterah, nge pi yungi flang riy ni fan ko gamanman. 28 Mu kun pi’ aningeg e binaw ngorad u lan tafen Issakar: Kishion, Daberath, 29 Jarmuth, ngu Engannim, nge yungi flang ko pi binaw nem ni fan ko gamanman rorad. 30 Mu tafen Asher e aningeg e binaw riy nni pi’ ngorad: Mishal, Abdon, 31 Helkath, ngu Rehob, nge yungi flang ko pi binaw nem ni fan ko gamanman rorad. 32 Mu tafen Naftali e dalip e binaw riy nni pi’ ngorad: Kedesh (ni reb fapi binaw ntagil’ e ayuw) u Galilee, Hammoth Dor, ngu Kartan, nge yungi flang ko pi binaw nem ni fan ko gamanman rorad. 33 Fapi tabnaw ko fare ke girdi’ rok Gershon e ragag nge dalip e binaw u gubin ni yag ngorad nib mu’un e yungi flang ngay ni fan ko gamanman rorad.

34 Tin ni magech ko pi Levi, e fare ke girdi’ rok Merari, ni aningeg e binaw ni yag ngorad u lan tafen Zebulun: Jokneam, Kartah, 35 Dimnah, ngu Nahalal, nge yungi flang ko pi binaw nem ni fan ko gamanman rorad. 36 Mu lan tafen Ruben e ni pi’ aningeg e binaw riy ngorad: yu Bezer, Jahaz, 37 Kedemoth, ngu Mefaath, nge yungi flang ko pi binaw nem ni fan ko gamanman rorad. 38 Mu kun pi’ aningeg e binaw ngorad u lan tafen fare ganong rok Gad: Ramoth (irera’ reb fapi binaw ntagil’ e ayuw) u lan yu Gilead, nib mu’un e pi flang riy ngay ni fan ko gamanman rorad, ngu Mahanaim, 39 ngu Heshbon, ngu Jazer, nge yungi flang ko pi binaw ney ni fan ko gamanman rorad. 40 Ere fare ke girdi’ rok Merari e ragag nge l’agruw e binaw u gubin nni pi’ ngorad.

41,42 Ga’angin e nam ni tafnay e girdi’ nu Israel, ma aningeg i ragag nge meruk e binaw riy, nib mu’un e yungi flang ngay nib liyeg e pi binaw nem, e ni pi’ ngak e pi Levite.

43 Ere SOMOL e pi’ fare nam ni ga’ngin ngak piyu Israel, ya ri michmicheg ngak e pi chitamangirad kakrom nra pi’ ngorad. Nap’an ni yag ngorad, miyad par u rom. 44 Me pi’ SOMOL e gapas ngorad u lan fare nam ni ga’ngin, nri bod rogon ni micheg ngak e pi chitamangirad kakrom nra rin’. Dariy ta’reb u gubin fapi to’ogor rorad ni yag rok ni nge tagopluw ngorad, ni bochan e ke gel nagrad SOMOL ngak gubin e pi to’ogor rorad. 45 I SOMOL e de thilyeg ta’reb fa tin ke micheg nra rin’ ngak e girdi’ nu Israel.