1 Ri kakadbul me od Joshua, ni ir nge urngin piyu Israel ngar chuwgad ko gin ur pired riy u Shittim, miyad yan nga Jordan. Mranod ra pired nga bang u rom ngar son niged e ngiyal’ ni ngar th’abed fare lul’ nga barba’. 2 Ma dalip e rran nga tomuren me yog e pi’in yad ma yog e thin rok piyu Israel 3 ngak e girdi’ nu Israel ni lungurad, "Nap’an ni gimed ra guy e pi prist ni yad be mat’eg fare Kahol ko M’ag rok SOMOL ni ir e Got romed, ma aram e ngam degdeggad ngam lekedrad. 4 Ma aram e bay mu nanged e gin ngam sorgad ngay, ya dawor mu uned ngaray. Machane dab mu chugurgad ko fare Kahol ko M’ag; ngu’um leked ni gonap’an e baley e mayl e bay u thilmed nge fare Kahol." 5 Me ga’ar Joshua ngak piyu Israel, "Mu macholbog niged gimed, ya gabul e bayi ngongliy SOMOL e maang’ang u fithik’med." 6 Ma aram me ga’ar Joshua ngak fapi prist, "Mat’egned fare Kahol ko M’ag ngam mon’od rok e girdi’!" Miyad rin’ ni bod nike yog.

7 Me ga’ar SOMOL ngak Joshua, "N’en ni bay gu rin’ e daba’ e bayi gagiyegnag urngin e girdi’ nu Israel ngar ted fam ni bod rogon be’ nib sorok, ma bay ra nanged ni gu bay rom ni bod rogon Moses ni ug moy rok. 8 Mog ngak fapi prist ni yad be fek fare Kahol ko M’ag ni fa’an yad ra taw ko lul’, ma thingar ranod nga maran ngar sak’iygad ko gin ba chugur nga teal e lul’." 9 Me ga’ar Joshua ngak piyu Israel, "Mired, ngam rung’aged e thin ni nge yog SOMOL ni Got romed. 10 Daba’ e bay mu nanged ni fare Got ni be par nib fos e bay romed; nap’an ni bay mmarod i yan nga m’on ma ir e bayi tuluf piyu Kanaan ngar chuwgad, nge fapi girdi’ ni kanog e Hittite ngorad, nge Hivite, nge Perizzite, nge Girgashite, nge Amorite, nge Jebusite. 11 Fare Kahol ko M’ag rok Somol ni ir e Somol ko fayleng ni ga’ngin e bayi th’ab e Jordan nga baraba’ ni be m’on romed. 12 Mmel’eged ragag nge l’agruw e pumo’on, nra reb e ganong nu Israel ma ngan fek be’ riy. 13 Ma pi prist ni yad be mat’nag fare Kahol ko M’ag rok SOMOL ko fayleng ni ga’ngin e nap’an ni yad ra tay e rifrif rorad nga fithik’ e ran, me tal e ran ko fare lul’ ni Jordan ndabki yan, ma ran ni be yib u p’ebugul e lul’ e bayi mokun nga ta’bang."

14 Ma aram me chuw piyu Israel ko gin yad be par riy, ngranod ni ngar th’abed fare lul’ ni Jordan nga barba’. Ma fapi prist ni yad be mat’nag fare Kahol ko M’ag e yad bay nga m’on ko girdi’, 15 ma fa’an ni taw fapi prist nga marichlen e lul’ ni Jordan, ma ran u lan e lul’ e ke sug ke pag mirichlen ngalang, nma yodrom u nap’an ni yima t’ar wom’ngin e woldug. Machane yug nap’an e tay fapi prist e rifrif rorad nga maran, 16 me tal e ran ko fare lul’ ndaki yan me mukun u p’ebugul e lul’ u Adam, ni fare binaw ni bay u to’oben yu Zarethan. Ma fare ran ni be yan ko re lul’ nem ngalan e Dead Sea e tal ndaki yan, me th’ab e girdi’ fare lul’ nga baraba’ u bang nib chugur nga Jeriko. 17 Ma nap’an ni yad be th’ab fare lul’ ni ngranod u daken e but’ ndakuriy e ran riy, ma fapi prist ni yad be mat’nag fare Kahol ko M’ag rok SOMOL e ra dugilgad u daken e but’ nike mlik’ u lukngun fare lul’ ni Jordan nge yan i mada’ ko ngiyal’ nike yib urngin e girdi’ nu Israel ra th’abed fare lul’ nga baraba’.