Gênesis 37

Josepa namáti ivo yoã

1 Jacó Canaã mainamã niakéi, ãwẽ papa nipawanamã. 2 Aská naaivo yoãro Jacopa vakerasĩ yoã. Aatiã ãwẽ vake José ivo 17 vari aya. Askásho ãwẽ takevonĩsho inárasĩ vesoi niá. Ãwẽ papã aĩvorasĩni vakerasĩ, Bilã vakerasĩ, Zilpã vakerasĩ aká, ato take akĩ. Atõ kanémaĩnõ, ãwẽ papa yoãshoi akí niá. 3 Aatiã Israel José ivomẽse noíi, sheniwetsanamãsho ãwẽ meraásho. Askámaĩnõ ãwẽ takevomẽro noí askákama. Askáinã õpo anõsho kawã keyáka ivo avaikĩ inãki. 4 Ãwẽ takevo, atõ papa Josémẽse noíi, atomẽro askákai noíma aká oĩinã atõ chinãne mastasvo, avé roai vanamase ikívo.

5 Aská shavá wetsã Josepa ãwẽ namáa, ãwẽ takevo ato yoãshokĩ. Aská akĩ ãwẽ yoãmaĩnõ ãwẽ takevõ ichnaki maí maí aa akavo.

6 "Neská akĩ ẽ namáai, mato yoãshonõ, nĩkãtsoma. 7 Wai matxisho, trigo nõ sevipakémaĩnõ, ená seviro weníinái. Ãwẽ askámaĩnõ matõ mã seviarasĩro ená shetí ayaketãsho kakópakepakésho shokoa ẽ namáai", iinã ato yoãshokĩ.

8 Aská akĩ ato ãwẽ yoãshomaĩnõ, ãwẽ takevõ revínívo. "Mia kakáya shovisho, noke yonoya shovikatsiinã mĩ ikíra?" akávo. Askáki ichna aosvo ãwẽ namá ato ãwẽ yoãshomaĩnõ.

9 Askávai shavá wetsã namá wetsa ãwẽ takevo ato yoãoshokĩ "rama neská akĩ ẽ namáóai. Vari, oshe, 11 ichi aatii ea veyó yora keská vetĩ ipásho masotachívo, ẽ namáai", iinã ato yoãoshokĩ.

10 Aská akĩ ãwẽ papanĩ ãwẽ takevo, ato ãwẽ yoãóshomaĩnõ, ãwẽ papa vatxin ikí vanai. "Namá wetsakara. Ea, mĩ ewa, mĩ takevo, aká, mia veyó rãtí ipásho maĩ vetsek ipásho noke masotĩpáka", akĩ. 11 Askáinã ãwẽ takevõ naíshoávo, askámaĩnõ ãwẽ papãro "awe ãwẽ namárakĩ?" iinã chinã chinãvãki.

12 Askái shavá wetsã, Josepa takevo atõ inárasĩ kawivaĩi, Siquém shavá wetsa orakama voávo. 13 Askávaĩi atõ vovaitxinĩ, Israẽl José tanamakĩ. "Mĩ takevõ atõ inárasĩ vesoi shokovo, Siquém orakama, askásho atõ shokoanamã mia yononõ, orí", ãwẽ imaĩnõ, "ẽe ase", ikĩ revímaĩnõ, 14 "mĩ takevo, atõ inárasĩ aká roaseraki oĩta. Oĩtani oshõ, ea yoãshoi onosho", iinã Hebromnamãsho José yonoki. Ãwẽ aská akatõsho, kaí, Siquém omakaĩsho venó venókawãi.

15 Askái niitero ãwẽ venó venókawãmaĩnõ, yorã meratachísho nĩkãki. "Awe mĩ aavãra?" akĩ.

16 Ãwẽ aská akatõsho, revíki. "Ẽ takevo ẽ itimáa. Inárasĩ vesoi atõ shokonã atonamãrá?" 17 ãwẽ imaĩnõ, "ma vovaivo. ‘Dotãnamã nõ vokatsai’, ikí vanavo ẽ nĩkãvai", akĩ revíki. Aská nĩkãvaí, José ãwẽ takevo itimakõvaĩi kaí, Dotã orakamasho ato merai kakĩ.

18-20 Aská José orashóse ãwẽ kaa meravaíki, "oa, namákaya, nõ yamamanõ", ikĩ chinãmakinanãvo. "Verína, ramase yamamavaikĩ wakapasha shãtopa nõ õtxinõ. Aská avaikĩ, ‘yoinikã pivai’, nõ inõ. Ramaro ãwẽ namárasĩ awesakatsíki nõ oĩnõ", ikívo.

21 Rúben atõ askái vana nĩkãinã Josémẽsho ikĩ, "askáma, yamamáma. 22 Ãwẽ imi ichná akáma, neno askata wenẽne, shãtó sawéatõ mã õtxiro roase, askámẽkĩ meskotsomároa", ato akĩ. Rúbeni aská akĩ pashamakatsikí, arimẽse ãwẽ papanamã yononoshõ iinã.

23 Aská Josepa ãwẽ takevo nokovaĩsmaĩnõse ãwẽ õpo anõsho kawã keyáka kochãkãvaíki atxivo. 24 Aská avaikĩ wakapasha yama ivo shãtopa õtxivo. 25 Aská avaikĩ pii kãtxísho atõ oĩa, ismaelita yorarasĩ Gileadenamãsho atõ veá, orasho meravo. Atõ camelorasĩni Egito mainamã atõ kawivãa awerasĩro, piti anõ meĩti, ene inĩka balsamo, mirra*37.25 Mirraro sẽpa keskámẽkĩ inĩkachta ivo akárasĩ.

26 Askámaĩnõ Judapa ãwẽ takevo vana akĩro, "aská nokẽ take yamamavaikĩ nõ onenã ãwẽ roasetirá? 27 Noke yamamamasnõ. Nokẽ takero nokẽ imirvi, waa ismaelita yorarasĩ ato inãvaíki nõ anõsho kopímati vinõ", ãwẽ imaĩnõ, "mã ase nõ aská anõ", ikívo.

28 Askáki ismaelita yorarasĩ, Midiã mainamãsho veí ato omavarãmaĩnõ wakapasha shãtónamã José tsekavo. Aská akĩ tsekavaíki, Ismael yorarasĩ inãvaíki, 20 prata tanáti anõsho viávo. Aská akĩ atõ inãa, Ismael yorarasĩni Egito mainamã José vivaĩvo.

29 Atõ aská aká, txipo Rúbeni itãi okĩ wakapasha shãtónamã José manovaíki naíkawãki ãwẽ õpo ochni ochniki. 30 Aská arimẽse iokarãsho ãwẽ takevo aská akĩ. "veronenã yamakatá. Ramaro ẽ awesá irokataíkĩ", ato akĩ.

31 Aská avaikĩ ãwẽ takevõ cabra vene yamamavaikĩ, Josepa õpo imĩ morivo. 32 Aská ashõ atõ papa õponĩkĩ vana yonoshoávo, "naa õpo nõ meranã, mĩ vakenásera, oĩ", akávo.

33 Aská akĩ atõ yonoshoa, atõ papã onãki. "Ase ẽ vakẽ õpo. Yoini onipatõ ea piãkãvai, ãwẽ nami roamase rakáa taísekĩ", ikí vanai. 34 Anosho ãwẽ sawevaĩvaĩa õpo naíkawãki ochni ochnivaíki, saco õpo akĩ. Askái shavá ãtsai wai ikí ãwẽ vakemẽsho. 35 Ãwẽ askámaĩnõ ãwẽ vake venevakerasĩ, aĩvakerasĩ aatiisho atõ papa rona atõ petximakatsikimẽkĩ aví ikíma, "erí ãwẽ ikítõ ikawãki ẽ meratirívi", ikí vanai. Askái ronai enéma.

36 Askámaĩnõ anosho, midianitarasĩni, Egito mainamã nokóvaĩshõ, teske akayatõ kakáya, Faraopa nitxĩa ivo yora, Potifar José inãvaíki anõsho kopímati vitivo.