1 Nang hynh ka nung matei a zupaw,

ka upaw hawte na thua ravo nyn!

Atolang ah tungku vae ze

kae myng cih zah

hum nynh sanmah kae kha

yn theihrya lan khyh.

2 Nang kha kae cciakhae cih zah

ka nung inn lungkhu lang,

kae yn saahnung a khaan lungkhu lang

kae teekhae cih.

Amynkhuhpaw misutui, ka ccaleethaetui kha

nia lan kae pya cih.

3 A voilang kuih kha ka ngya sah lah,

a ranglang kuih nynh yn pom sah!

4 Pou Jerusalem ccanung hae,

ka sungsahnung tuh

a inaw kyate amaw tho lan

a tho maw na tho khyh nawlan oh,

nanning kha bya kae taw oh!

5 A sungsahpaw kha ngeikute ramkaw kyate

yn cceihthungpaw khuh hummou athua?

Epal ku kaw khe nang kha kae tho.

Tuin kyakhe na nung tuh

nang keiccuze neitangia a teing;

tuin kyakhe nang ae saahnung tuh

neitangia a teing.

6 Kae hynh na bung vawlan

tazeih hawte yn khiaku tua,

na kuihbaw kya tazeih hawte

yn khiaku tua;

pawccecize sungsakunaw tuh

chinaw hawte a thawsae,

eiungnaw tuh shawku hawte a rysawthah.

Tuh-e tuh maeesoi te

maeephu aruapaw nynh thua.

7 Tui patae nynh sungsakunaw maee kha

the kho khyh, tui alepaw nynh mah

vu kho khyh.

Lukhakheit nynh sungsakunaw hanlan

a inn kya-e sisua balyn kha

a pya lanze, saryanaw kha a ing cih.

8 Kaening nynh ccianung taraw

lu kheit kae hoi,

aning tuh a matei adih ung.

Kae neitawnung oun dy nin hae khe,

aning hanlan pawmou kae cyipah cih?

9 Aning tuh khualungrua a la thua ze,

kaening nynh a tungvaw kya

maethe kawnaw a ua kha

ngun te kae rae cih;

thuasalama aning tuh

thuakaw a la thua ze,

sidar thing te kae khaw cih.

10 Kae tuh khualungrua ka thua zah,

ka matei hae tuh

rhawviainn te nynh aloku hae;

oute kae tuh a muihnaw kya

daenaw a thuakhaepaw hawte nynh ka thua.

11 Solomon tuh Baal-hamon kya

misu khokhu a hoi; misu khokhu kha

a ngawtu hae kalan a ap hae,

a ngawtu lu kheit cci nynh

thingthae mee lang ngunphua

thong kheit cci a pya hae.

12 Ka hoipaw misu khokhu tuh

kamaw hanlan nynh thua;

Pou Solomon, nang nynh

ngunphua thong kheit lawkuh lah,

thingthae a ngawtu hae nynh

za ning lawkuh hae sah!

13 Pou khokhu kya a umpaw nang,

ka ban hae nynh na roi kha a ngae hae;

kae mah yn thaesah bua.

14 Ka sungsahpaw, yn rangsakuh,

amynkhuhpaw mua vawlan umpaw

sazuh khyhze

anopaw sazaw hawte yn cciatua!