10 Milagres de Jesus na Bíblia: Lista com versículos e explicação

Imya ko Onyape Okana ko Ogalili

1 Eno ko omweta ayonyape ogya ko Okana ipu ko Ogalili. Kweyi ene ko Oyesu yebeni, 2 kweyi apo Oyesu kpawogboso ebe konyape. 3 Ishini inyi kweyi ni, ene ko Oyesu ga ka danu mo, <<Agbinyi kelo.>>

4 Kweyi Oyesu ka danu mo, <<Ene, onya wakakahin? Ishi hin gye wa lo.>>

5 Inanu ka dayole mo, <<Oza ni oka kpiri ala ya.>>

6 Ebeni epwo kinyo ihiri ni ama kpa akyo hagye ebe ni, ko yodu kikpiye nona ka Ase ko Oyahuda, ibwu kepwo mani ya gogya awepa kwe aweta.

7 Oyesu ka dayole mo, <<Ala shinyo nwawepwo mani.>> Kweyi ashi nwuwa sururu.

8 Ebeni oka dawa mo, <<Ala shi ga dorogwu koka kimya.>>

Aya mani, 9 kweyi orogwu koka kimya gwinyo ni ayi pya winyi mani. Ogyebe ni abyinyi mani bwanu wa ni lo, ayole ni byinyi wa ni pini gye la. Ebeni, oyoba konyape ogwu gokoka, 10 kweyi okamo, <<Aba dase inyi neshi ba gwa ikyikyo ome la, kweyi ishini awogboga kwobonu gwa nwashika ome aba byoni shoshi fakikyikyo lo ni ya wese. Awo ke yinyi neneshi yi teba wishi mani ome obi wese.>>

11 Omani pini woza kigbashi kikyikyo ni Oyesu ya Okana ko Ogalili ni la. Bwebe ni oyigyashi nu yi tese, kweyi awogboso kyogwu kpanu.

Oyesu do Ongo oye ni Amo wo Ofiyi ni Ogege

1 Ni Oyesu ya shigbo ni, omongo oye ni amo wofiyi ni. 2 Awogboso doka mo, <<Inofoza, anoho yo ozalabi, ongo mani la kwe inanu kpa adanu, ni amo wo ofiyi ni?>>

3 Oyesu kamo, <<Ongo mani kwe inanu kpa ada nu pini yozalabi lalo, omani ke gbodagye shini ase na moza ni Owuso ya gege koya bwebe ko ongo mani. 4 Owotiri shini na yoko kase ni tumoleho ni. Anani ni otu bi walo ni. Otu yawa biba ni ashishe ya yoko lo ni. 5 Byoni ntayayo yese ni, nwo oyoyu kese.>>

6 Ni Oyesu ka mani, otehe shokpagye, oyikwabo kweyi oyi nyo ongo mani iyi. 7 Oka danu mo, <<Ga yi na ibwu ko Osiluwa,>> ikweyi nu wo Oleho. Ebeni ongo ni ga niyi, kweyi okwikye go ole ya mebe.

8 Awase ni bagye kwo kpa awase ni ba mo ni kwotu ko doka mo, <<Omani wo ongo ni ya yagye kweyi ya boza ni ona lo?>> 9 Ashini kase kamo owanu.

Ashini kamo, <<Aayi, obyanu kin la.>>

Anu ke mo, <<Ami la.>>

10 Adoka mo, <<Oyamoji niyi wo gwa?>>

11 Okyogwu mo, <<Ongo ni aba yogwu mo Oyesu pini kwabo ka agye kweyi nyumiyi. Okadami mo na gi ibwu ko Osiluwa ga niyi. Ebeni ngga na, kweyi nmebe.>>

12 Adoka mo, <<Ongo mani ye ebenya?>> Okamo, <<Ngye lo.>>

Oyesu dase Okpaku eho Oza rore

13 No Oyesu pwo oza ni gbodagye kpo Oyahana iniko yo Obatisma ni, oshe ebe ni bita gipu ko owu she ebeni bita kweyi gebe ni gba ashishe lo ni shini na yagye fufunu. Nase bwebe ni oga ni, agboso kpi ikpo bwo ogya gogo-gogo. 14 Ni obose bwo owu ni, ime ewa ka asuse. Iyinyinyi wa yo kwu, kweyi oda awine ke ere ogege.

15 Ni eno sha ni, awo gboso we ebe nu kweyi akamo, <<Ebeni gbashishe lo, ishi ke ya gawa ye ewa na gawa, shini ana go ogya ga ro oza ko rore.>>

16 Oyesu kyogwu mo, <<owo tiri koni aya ga ro oza rore ebye lo. Ala dawa oza rore na re.>>

17 Aka do Oyesu mo, <<Ikyoga eho kpe ebinyi epa kin pini aha gbo ebe ni la.>>

18 Okamo, <<Ala byo oza ni ala gbo ni wa dami.>> 19 Ebeni oya ase bagye ikweyi ka akyashi. Ozo ikyoga eho kpe ebinyi epa, kweyi otiyi mi iso kweyi keshi ko Owuso. Kweyi oyi ko tititi da awo gboso, kweyi awo gboso ko dase. 20 Kpiri wa ha yipu. Awo gboso kpo shishi ni mwo ogwugwu igwepa. 21 Ewa kase ni ha ni wo okpaku eho, ijiji ka ango aya Aresawu ka anya kpo ayi le ki lo.

Oyesu Yo Owu Loshu Hagye

35 Ni eno sha ni, Oyesu ka da awogboso mo, <<Ahan sheyi go gbeyi.>> 36 Ashe ewa bita gipu ko owu ki inyo kweyi akwotu ki iyawu. Owu ki inyo shishini gbosuwa. 37 Ebeni owu loshu nyiso ishu, ebe ni owu ni ta kpo ogwa ki inyo ya yimu ko yo owu bya. 38 Oyesu ya gbola, itikpi ko owu yi kweyi nu so Otinti. Awogboso shiyi kamo, <<Adole, inyo ya yaha re, obyo otu lo?>>

39 Ebeni Oyesu nyiso kweyi, okela do owu kpo ogwa ki inyo mo, <<Sha! Hagye!>> Ebeni owu hagye kweyi ebe ka agye. 40 Oka da awogboso mo, <<Ojiya ni ala ba yoshi? Kwikyikyeni ala gbo otuse lo la?>>

41 Ebeni oshi yuwa kwu. Aba diyiwa oka mo, <<Ongo mani wa anoho ome ni owu kpo ogwa ki inyo ba pwe ela nu?>>

25 Kweyi onya oye yebeni ni ya gboyi kishayi igwepa ni. 26 Omebi nwashika abo ka awoloboshi, kweyi oyo oza ka abo nu ngmo kpiri shini ose na kweyi, ose ke ya go ohobu. 27 Ni opwo oshu ko Oyesu ni, ogboso itikpi ipu ke ewa kweyi gabo oshiye nu. 28 Oka ipu ko otu nu mo, <<Owoni nggabo oshiye nu kin, ose hin ya kweyi.>> 29 Ebebeni ogboyi nu hagye kweyi opwo ikpiye nu mo, ose nu kweyi.

30 Ebeni, Oyesu gye kamo oshu bose ikpiye nu, opyi iyi kweyi odoka mo, <<Anoho gabo oshiye hin?>>

31 Awogboso kamo, <<Oma ase ba nyi ikpiye oya kamo anoho ga awo abo?>>

32 Oyesu ke pyi iyi shini na ma ase ni yo oza mani ni. 33 Ebeni onya oni wa, oya yoshi kweyi ya wode ikpiye, koni ogyo oza ni gbodagye kpa anu ni. Owa kwagye obutu nu kweyi oka danu okwokwoshi. 34 Oyesu ka danu mo, <<Oyi hin, otuse wo ngma wo. Ga kpo otu mene opyo gege.>>

Oyesu do Ongo ni Gbo Omaku Bibi ni Ogege

1 Oyesu sheyi ki ishu nyakwu ga agbabo ko Ogerasa. 2 Ishini Oyesu bose bwi ipu ko owu ni, ogbayi kpo ongo oye ni bose bwa amiri ni ebeni, ongo mani gbo omaku bibi ikpiye nu. 3 Ongo oni ya kya ebe ka amiri, kwa ashirika, ashishe ya gege ko yo gbo kpa anu lo. 4 Ongo mani ishi nwashika aba yo sha ashirika, oya ya ashirika yayi kweyi ya yo ogye ki ikpo nu ya yi kyigbo. Ashishe ya gbo oshu ko gege byo bagye lo. 5 Ko otu, ke eno oya gyehe ipu ka amiri kpi ikweyi kikpokyi, oya kyegba ya shi iyinu ikpiye kpa akyo ni gba ahanu ni.

6 Ishini omo Oyesu ebe lenu ni, onyinya kweyi wa kwagye obutu nu. 7 Osheha kweyi kamo, <<Oji ni oya tikpo ebe hin, Oyesu, Oyi ko Owuso? Nyya bo mo ka yumo ojije lo!>> 8 Oka mani ikweyi koni Oyesu kwobonu ka do omaku bibi mo, <<Bose shi ikpiye ko ongo mani awo omaku bibi.>>

9 Ebeni Oyesu do oka, <<Iye wo wo oji?>>

Okyogwu mo, <<Iye hin we Ewa, ikweyi koni aha nwashika ni.>> 10 Ebeni omaku bibi bo Oyesu mo ona ka nawa enya sha agbabo ni lo.

11 Aruma nwashika ba roza ashikwu kikpokyi ni kuwa ni. 12 Awo omaku bibi mani bo Oyesu kamo, <<Na aha enya shini ahan gipu ka awaruma mani.>> 13 Oyesu da awo okwunu, kweyi omaku bibi bose sho ongo ni kweyi gipu ka awaruma. Aruma okpakwu epa sa bwi ikpokyi gipu ki ishu.

14 Awase ni ba gbeho ka awaruma ni nyinya gogya wa kpa awo ole ni kwuwa ni kweyi ga ko oza ni gbodagye ni da ase, kweyi abose ge ese ga mo oza ni gbodagye ni. 15 Ishini awe ebe ko Oyesu ni awa mo ongo ni gbo omaku bibi mani yagye kweyi oshi iyo neshi, kpi ikweyi nu gyogye, kweyi oshi yuwa kwu. 16 Awase ni mani ko oshu da ase ikweyi ko ongo ni gbo omaku bibi ni, ki kpa awaruma da ase. 17 Ebeni awase ko ogya ni bo Oyesu mo, ona sho okpagye wa bita.

18 Ni Oyesu ya gipu ko owu ni, ongo ni ongmo omaku bibi sho ni bo Oyesu mo, anu ya yimu ko ga kpa anu. 19 Oyesu tanu kweyi ka danu mo, <<Ona go ole ebe kase ki ipwoma nu na ka da awa oza ni Adole Owuso ya ni, kpi iyi nyinyi ni oya ikweyi nu ni.>> 20 Ongo ni ga ko oza ni Oyesu yo ni okpagye ni aba yogwu mo Odakapoli ni da ase. Igbashi ya ase kpiri yi kwu.

Onya ni Loshu lo ni kpo Oyi ko Ojayirus

21 Ishini Oyesu gipu ko owu kweyi sheyi ge ega ki ishu ko Ogalili ni, ase nwashika wa shogba to. 22 Ebeni oteyi ke ekpa, ni iye nu wo Oyayirus mo Oyesu ni, kweyi owa kwagye obutu nu. 23 Kweyi obo Oyesu kamo, <<Oyi hin nonya ya yimu ko gekwu. Obi wa ya abo wo so shini ona pyo ogege na gbo layi.>> 24 Oyesu gboso ga.

Ase lewa gboso kweyi ba nyi ikpiye. 25 Kweyi onya oye yebeni ni ya gboyi kishayi igwepa ni. 26 Omebi nwashika abo ka awoloboshi, kweyi oyo oza ka abo nu ngmo kpiri shini ose na kweyi, ose ke ya go ohobu. 27 Ni opwo oshu ko Oyesu ni, ogboso itikpi ipu ke ewa kweyi gabo oshiye nu. 28 Oka ipu ko otu nu mo, <<Owoni nggabo oshiye nu kin, ose hin ya kweyi.>> 29 Ebebeni ogboyi nu hagye kweyi opwo ikpiye nu mo, ose nu kweyi.

30 Ebeni, Oyesu gye kamo oshu bose ikpiye nu, opyi iyi kweyi odoka mo, <<Anoho gabo oshiye hin?>>

31 Awogboso kamo, <<Oma ase ba nyi ikpiye oya kamo anoho ga awo abo?>>

32 Oyesu ke pyi iyi shini na ma ase ni yo oza mani ni. 33 Ebeni onya oni wa, oya yoshi kweyi ya wode ikpiye, koni ogyo oza ni gbodagye kpa anu ni. Owa kwagye obutu nu kweyi oka danu okwokwoshi. 34 Oyesu ka danu mo, <<Oyi hin, otuse wo ngma wo. Ga kpo otu mene opyo gege.>>

35 Ni Oyesu yipu kela ya ka ni, ango bwo ole ko Ojayirus oteyi ke ekpa wa kamo, <<Oyi wo gekwu, oya di Inofoza owe koji ke?>>

36 Oyesu shuwo okwunu lo, kweyi oka do oteyi ke ekpa mo, <<Ka yoshi lo, yo otuse.>>

37 Oshashishe bita gboso lo, so Obitrus kpo Oyakubu kpo Oyohana oyene ko Oyakubu 38 Ni Oyesu go ole ko oteyi ke ekpa ni, ome ebe ya, ase ba kyegba ba sheha. 39 Ishini ogipu ni, oka da awa mo, <<Ojiya ni ala ba kyegba ba sheha? Oyi mani gekwu lo, oya gbola la.>> 40 Awa ke yo Oyesu eye.

Ishini onuwenya kpiri wese ni, obya ada kpe ene ko oyi kpa awogboso ni bebeni kpanu ni gipu koda ni ayo gwutagye ni. 41 Obya abo kweyi kamo, <<Talita kumi!>> ikweyi nu wo, <<Oyinonya nkamo, nyiso!>> 42 Ebebeni oyi nyiso yawu. Owo oyi ki ishayi igwepa. Oza mani yi igbashi yuwa kwu kpiri. 43 Ebeni opyuwa akpaha mo ana ka ka da ashishe lo, kweyi oka da awa mo ana danu oza shini ona re.

Oyesu yawu ikweyi ki inyawo

22 No Oyesu da ese okpaku eho oza rore kweyi ni, ebebeni oka dawo gboso kamo ana gipu ko owu shini ana sheyi ki ishu gese kwobonu danu, ohagye itikpi kweyi ye ewa gawa. 23 Ishini oye ewa gawa ni, otoshi gi ikweyi kefu fufunu shini na tinarigwu. Oye ebe ni fufunu ya tinarigwu gbi ishini eno sha. 24 Ishi oni owu ka awo gboso ke yo otutehe ki ishu kweyi ya ja, ikweyi koni owu loshu ya tani oya yo ogwa ki inyawo ya sabo.

25 Abo ko ogye eta ko otu go hoki, Oyesu yawu ikweyi ki inyawo kweyi webe wa. 26 Ishini awo gboso mo ya yawu ikweyi ki inyawo ni, otu wa gbo, kweyi akamo, <<Omani wo oyi la!>> Kweyi akyegba koni oshi yuwa ku. 27 Ebebeni Oyesu kada wa mo: <<Ala gbo otu! Ami la. Ala ka yoshi lo.>> 28 Obitrus kyogwu mo, <<Adole, owoni owa awo la,>> <<Kada ami na yawu ikweyi ki inyo webe wo.>> 29 Oyesu kado Obitrus, <<Nyiso shino wa.>> Ebeni Obitrus nyiso kweyi bose bwi ipu ko owu kinyo, kweyi yawu ikweyi ki inyo ge ebe ko Oyesu. 30 Ishini Obitrus mo owu ya ta loshu ni oshi yo ku kweyi oya gbebi gi inyo, okyegba mo Adole, tumabo shi na ka gbebe ipu ki inyo lo!>>

31 Ebebeni, Oyesu na abo sho kweyi kamo <<Awine ko otuse gbayayikweyi hin, ojiya no oyotusun wo loshu lo.>> 32 Ishini agi ipu ko owu ni, owu hagye. 33 Ebeni ashishini ase ni bi ipu ko owu ni kwagye ba sho Oyesu iye, ba kamo, <<Okwokwoshi owo Oyi ko Owuso la.>>

Oyesu do Ongo ni Abo nu Winyi ni Ogege

1 Ishini Oyesu kwikye wo Okapanahu ni, ase pwo mo owole. 2 Ase nwashika wa gbayi bwi ipwole we ese gbishini ebe gyuwa lo, kweyi oya tono kela da awa. 3 Ebeni ango ene bya ashe ni winyi ni we ebe nu ikweyi ko ote. 4 Ni ama mo aba gege ko ge ebe ko Oyesu lo koni ewa shoshu ni, agwi iso ki inu kweyi yo sa wo okpagye ikweyi ko ote nu obutu ko Oyesu. 5 Ishini Oyesu mo otuse wa ni oka di ino winyi mo, <<Oyi hin, ayo ozalabi wo na.>>

6 Ashishini ka awofono ke ba kela ipu ko otu wa mo, 7 <<Ojiya ni, ongo mani ya ka mani? Oya kela ka arigbetu! Anoho ya gege ya no ozalabi? Ke so Owuso.>>

8 Ebebeni Omaku ko Oyesu ka danu oza ni yo otu wa ni, kweyi oduwoka mo, <<Ojiya ni ala ba kela mani ipu ko otu kala? 9 Onya le kwee: ko ka di ino winyi mo, <Ayo ozalabi wo na,> Kwe ko ka mo, <Nyiso, zote wo shini oyawu>? 10 Ami ke ya yimu shini ala gye mo Oyi ka Asuse gbo oshu ko no ozalabi ese mani.>> Ebeni oka di ino winyi mo, 11 <<Nka da awo, nyiso zo ote wo shini ogo ole.>> 12 Ebebeni onyiso zo ote nu kweyi yawu bwo otutehe wa ge ese. Oshi ya ananoho kwu kweyi aba sho Owuso iye ba ka mo, <<Aha moza lemani ebibye wa lo!>>

Iku ko Olazarus

1 Agbo ongo oye iyenu wo Olazarus ya gbere. Obwogya leke ko Obetani, ogya ko Omeremu kpo oyinanu Omata. 2 Omeremu ni oyinanu wo Olazarus ya gbere ni, anu pini nyo Oyesu ano kpeye ikpo kweyi wikpo kpinyeyi kikweyi nu la. 3 Ayene nonya mani toleho ebe ko Oyesu mo, <<Adole, oyawo moshi ya gbere.>>

4 Ishini Oyesu pwela mani okamo, <<Ere mani ya wa kikwu lo. Aayi owa ko byi igyashi wa do Owuso shini Oyi ko Owuso na pyo igyashi bwebe kere mani.>> 5 Oyesu yimu ko Omata kpo oyinanu Omeremu kpo Olazarus. 6 Koni opwo mo Olazarus ya gbere ni, okwikpo hebe ni oyanu ni kenepa, 7 bwebe ni oka dawogboso mo, <<Ahan kwikye go Ojudiya.>>

8 Awogboso kamo, <<Inofoza, ipu kishi gbayayi ni shigbo ni, Ase ko Oyahuda takirikwu ko takyo, kwikyikyeni oki ya kwikye ya gebe ni?>>

9 Oyesu kyogwu mo, <<Agbo ogye igwepa ipu ke enoye la lo? Ase ni ya yawu isheno ya shikawu lo, ikweyi koni oya mebe bwebe koyoyu kese mani. 10 Owoni ase ya yawu otu oya shikawu, ikweyi koni ebe yoyu yaba danu lo ni.>>

11 Ni Oyesu kela mani kweyi ni, ogohobu ko kela dawa mo, <<Oya ka aha ko Olazarus gbola, nke ya gebe ni koga shiyi.>>

12 Awogboso kyogwu mo, <<Adole, owoni oya gbola, oya pyo ogege.>> 13 Oyesu ya kela ikweyi kikwu nu, awogboso ke ba ma byo oya kela kola ni agye ni la.

14 Ebeni Oyesu ka dawa mo, <<Olazarus gekwu, 15 kweyi ikweyi kala nshotunehe koni nyyebe ni lo ni, shini ala kyogwu. Ahan gebe nu.>>

16 Ebeni Otoma ni aba yogwu mo ayapule ni ka dashini kawogboso mo, <<Ahan ga, shini an ga gekwu kpanu mamani.>>

Oyesu wo Onyiso ka Amiri kpo Olayi

17 Owowa nu, Oyesu pwo mo Olazarus kwobonu yeno ene amiri wa. 18 Enu ko Obetani kpo Ojerusele fomeli epa lo, 19 kweyi Ase ko Oyahuda nwashika webe ko Omata kpo Omeremu kowa kawotu agye kikwu koyinawa. 20 Ishini Omata pwo mo Oyesu ya wa ni, oga gbayi kpanu owe, Omeremu ke yagye ole.

21 Omata ka do Oyesu mo, <<Adole,>> Obi yebe ni, oyene hin bi ya gekwu lo. 22 Nke gye mo koni aba kela mani Owuso ya dawo ojoji ni odoka.>>

23 Oyesu ka danu mo, <<Oyene wo kiya shiyi.>>

24 Omata kyogwu mo, <<Nggye moya shiyi ishi ko nyiso ka amiri eno kokweyi.>>

25 Oyesu ka danu mo, <<Ami wonyiso ikwu kpo olayi la. Ase ni kyogwu kpami, ko ogekwu, oya gbo olayi, 26 kweyi ase ni yiyi kweyi ki kyogwu kpami oya gekwu goga lo. Okyogwu mani?>> 27 Okadanu mo, <<Nkyogwu, Adole, mawo wo Okristi, Oyi ko Owuso ni ya wipu kese mani ni.>>

28 Ishini okela mani kweyi ni, okwikye ga yo oyinanu Omeremu ogwu gokoka. Okadanu mo, <<Inofoza wa, oya doka wo.>> 29 Ishini Omeremu pwo mani, onyiso papa ga tanu. 30 Ishi oni Oyesu fipu ko ogya wa lo, otayayo yebeni Omata ga tanu ni. 31 Ishini Ase ko Oyahuda ni bo ole kpo Omeremu ba kanotu agye ni ma ni onyiso papa gese ni, agboso, aba ma byoya ga amiri ko ga kyegba la.

32 Ishini Omeremu febeni Oyesu yanu kweyi omo ni, ogbo obutu nu kweyi kamo, <<Adole, owoni obi yebeni, oyenen bi ya gekwu lo.>>

33 Ishini Oyesu mo ya kyegba kweyi Ase ko Oyahuda ni wa kpanu ni ba kyegba kpanu ni, oza ni domaku nu ose kotata kweyi otu nu bya. 34 Oduwoka mo, <<Ala yonyi ebenya?>>

Aka danu mo, <<Adole, wa ma.>>

35 Oyesu kyegba.

36 Ebeni Ase ko Oyahuda kamo, <<Medo ki imu ni ogbo danu ni!>>

37 Ashini wa ke kamo, <<Anu ni yofiyi mebe ni gege wobi kikwu ko ongo mani lo?>>

Oyesu Sho Olazarus Iyi Bwikwu

38 Otu ko Oyesu ki bya kotata kweyi ogebe ka amiri. Amiri ke yowu kokpo kweyi ayo okpo sokwunu ko owe. 39 Oyesu ka dawa mo, <<Ala yokpo oni bize.>>

Omata, oyene ko ongo ni gekwu mani ke kamo, <<Adole, anani oya kwipi wa, koni oyebe ni keno ene yoma.>>

40 Ebeni Oyesu kamo, <<Nka dawo mo owoni okyogwu oya mo igyashi ko Owuso lo?>>

41 Mani oni ayokpo ni bize. Ebeni Oyesu ziyi iso kweyi kamo, <<Ada, nshotunehe dawo ikweyi koni opwela hin ni. 42 Ngye mipu kishi kpiri oya pwela hin, npa ya ka mani wakoneshi kawase ni hagye mani, shini ana kyogwu mawo pini tumoleho la.>>

43 Ishini okela mani kweyi ni, Oyesu yogwu kpoko nyakwu mo, <<Olazarus, wese!>> 44 Ongo ni gekwu mani yawu wese, kweyi abo kpikpo nu lola kpo opa, kweyi ayiki kaheyi nu.

Oyesu ka dawa mo, <<Ala yoyi shini ala shobita na ganu.>>