10 Milagres de Jesus na Bíblia: Lista com versículos e explicação

1 Langcumne cai,* Galilee deu ga Cana namceu ga meunui ge bam, nah Jisu pui cika bam. 2 Jisu nah pe caisuime de de meunui cikage qu gai pwabam. 3 Zau cang dige, Jisu pui pe dage rangdi, "Penui zau gah da."* 4 Dede Jisu pe dade rangdi, "Mipoi, cide anai ziemne daipai teilukera ge no? A ting gwangcang mereu lie." 5 Ge pepui kilamedung dage rangdi, "Pa nnui dage rang kebeu leune, teilu." 6 Cidau cika Jewme renet zai gade hui kemci ta ziemne tangtsu duibung herok dungpwa bam, cidung de ket ga gallon ngkai mecai camrei bam lula. 7 Jisu penui dade rangdi, "Duibungdung gage dui kaipui lu." Cine penui cidungde pemung kecang tei puilu. 8 Pecai pa kilamedung dage rangbeu, "Cu kesa twaklu delwe taktyeingyi mpaube de cide pwa peu lulo." Iciu eh penui cinzwa teigai. 9 Cidau taktyeingyi mpaube zau mmi kedi dui cide msi kegai dau, (cu pa au cide dai gade gwang cilu ma, dede kilamedung dui ketwakme au cibam), taktyeingyi mpaube lakciube de qugai 10 delwe pedade rangdi, "Minaleune zau keyibe kaibeu rai lala nah penui sak mie kedi caine zau kelabe kaibeu la. Dede nang au cu kecang de zau keyibe kainzeu pwa bamreu." 11 Aipau miswakegah ta raitube de Jisu Galilee Cana namceu gade teigai, nah pa pe kendu pwa liagai, nah pe caisuime pecu nlumlu.

1 Jisu kahgwang keladau, pa mipeige mnakelu gade miakciet kedige de ngau. 2 Ge pe caisuimedung pecu keteu eh rangdi, "Keledeubo, cau mau no, mipei aide mi mede pe puipei no, iciu eh pa miakciet eh mna kecu?" 3 Jisu sam keligai, "Mipei aipaude dema mede pe peipui mau kedi ziemne ma, dede ciciu eh pe dade Tinggwang batadung de mide lialu kerane. 4 Tingba kebam dauge anui acu lang kegaibe gu batadung tei maisia. Tingmui gwang di zeu da migede heta tei gailak dizie. 5 Ih kideu ga kebam dau, Ih kideu gu kebaabe delie."✝ 6 Jisu aidungde rang kedi cai, pa pemcai nsui gai kideu gage nah ncai le tangdei henet lu, nah tangdei cide pecu pwa keniak gai, pe miak gage. 7 Pecai pa pe dage rang, "Tetcu lo, Siloam rejai gade hui lulo," ("Langgai" kecu gage rang nzeu). Cine mipei be tetdi, nah huilu, nah mangau eh caili gwang.✝ 8 Ge pe kidamedung nah pedwa pecu hatyei la eh ngau kelamedung rang eh, "Mina aipau de ntum delwe hatyei bam kela de meni?" 9 Midungge rang eh, "Aide pa da." Kedame rang eh, "Melie, pa kenzwa kauge lie." Dede pa rang eh cu, "Ih au pa da." 10 Ge penui pecu keteugai, "Dainzwa nmiak ngkei lu di no?" 11 Ge pa sam keligai, "Mige Jisu lie kecu kauge ne tangdei teilu nah a miak gage keniakgai nah a dage rang, ‘Siloam ga miecu nah hui lulo.’ Cine Ih mie nah huilu, nah Ih mangau dailu." 12 Penui pe dage rang, "Pa daiga bam no?" Pa sam keli pwa, "Ih au ci meda."

Jisu mina cang mengei pukketei

13 Jisu aide siu luge, pa liem gade cikade tetpwa mina lungh kemak heni ga pekatei miedi. Maadibe cide siu luge, penui namdidung gade pile tet gwang pecai suidi. 14 Ge Jisu gwang eh maadibe de ngaulu. Pa penuide ngaunggiadi nah teeinei kelame de teingkeibeu. 15 Tinghegi gwang kezeu dau, ledeukelumedung pe da gwang eh ranggai, "Aide au mina lungh kemak heni ge nah peting de riham dida. Cine maadidung de langgi dilo, iciu eh penui renam ga mie penui ziemne taktyei lui kerane." 16 Dede Jisu penui dade rangdi, "Penui tetdi mede yi. Nnui penuide matyei kera ma pwapeu lulo." 17 Penui pe dage rangdi, "Anui aika magede gah da tangku kwakmengei nah heka pumna rünne gwale." 18 Pa rangdi, "Cidungde aika acu teugwang beulo." 19 Ge Jisu maadibe de tsehei reu ga ntumbam lulo ranggai. Pa tangkukwak mengei nah heka pumna de pwalu. Tinggim ngangcuh piegai eh pa tangkukwakdung de samlam gai nah teipoplu delwe cidungde ledeukelumedung de peugai, nah ledeukelumedung cidungde maadibe de peubeu. 20 Penui pelane tyei nah nggei kaplu. Pecai penui taktyei tyeibang keludung hekwalu, hebie kereiekena puiting kecu. 21 Matyei kelume mina cangmengei kenzwa ge, hename nah mipui de si mene*.

Jisu rahang de kaamkedi

35 Cipaunai ting hegi dige, pa penui dage rangdi, "Anui Galilee lulebie gim mpetdi go." 36 Cine penui maadi de gidi, penui Jisu liem ga kelane pecu ngngwalwe gwangdi. Nah cika pecu ngngwa liem kedadung de lasi. 37 Ge cidau tingkai kaidi ge gui gwang eh dui nswakdung de ne liem teu kenuak gai eh liem de dui kepuih teidi. 38 Dede Jisu pekatei liem cai lebie, bam ge ga zipzeu, ge penui pecu ngkia eh pe dage rangdi, "Keledeubo, anui tsai dilai kezeu ngau nang nlung pang meni?" 39 Ge pa mraklwe tingkai de kesiu gai, nah jaaidi de, "Zing de dilu!" de ranggai. Ge tingkai de mtakdi nah cika zing dedi. 40 Pecai pa caisuime dage keteudi, "Nnui daitei mahing au no? Nnui cu de nnui kenlum bamlu mereu ni?"✝ 41 Iciu ge penui ngngi süt eh hangge ge dade rangdi, "Mina aipau de daikenzwa ge no, tingkai nah jaaididung de pe sam mzai kela ai?"

25 Ge mipui mmi kereiekena hejai la kedi pui ge cika la. 26 Pa darukecime kekiee dade pie, nah pe mabam pelane mpetdi, dede yilu ma, ciciu meliene pa sia reureu di. 27 Cipau pui de Jisu ha siulu ge, maadi kakga pecaile gwang eh pe ncwa tunggai. 28 Kedanemene pa rangdi, "Ih pepai nage de tunggai cai, Ih yilu zie." 29 Pejai lwa kela de cang zette di, nah pe mateei ngkei kedi pe pum gade cidi. 30 Jisu pe dade kengkieng* pet kedi zette cilu. Pa nreu lule ailam mina maabe de pie eh keteudi, "Cau a pai deu no?" 31 Ge pe caisuime pe dage rangdi, "Nang pielo mina maadi aide ncu siang titi la mene, ‘Caune acu tung no?’" de nang rangzeu no. 32 Dede Jisu pepai kedeube de pie zielie lule ailam piegai. 33 Cidau cipau puide pe dade mateei mpetkedi cilu eh ngngi nah mbeu eh gwang pe dwaga keumie, nah pe dage samsangbe rangliadi. 34 Dede pa cipau pui dade rangdi, "A napoi, n kenlum ne ncu tei ngkei luda, n mateei depeu yilu eh n lung nciep eh tet mie lu."✝

Herakesiabe kila ge de teingkei kebeu

1 Pecai Jisu nah pe caisuimedung jaaidi kung lule gim, Gerasenes cuikui ga gwanglu. 2 Jisu liem gade mpet kela dau, zette eh mige mcikemakpe rabe ne keliang teu kelage heraudung gade mpet pecu redau. 3 Cipaude heraudung ga lung bamla. Migede pecu hegeuria lede kangteu bamde gai lakti. 4 Kedanemene ma kekiee ge mi hegeu bakap nah hegeuria lepwa pecu kang, dede pa hegeuria de tei cakdi nah hegeu bakapdung de kesau cumdi. Migede pecu nimteu bamlu kera kengkieng gahdi. 5 Pa tingmui tingba ramsangne heraudung ga nah lamlwadung ga, sahbak eh pekatei pecu tangtsu pemui keyi gele kam bamla. 6 Pa kemdei gade Jisu de ngaulu ge, pa peda pak gwang delwe pe dwaga keumie di. 7 Nah pa sahbak eh ranggai, "Hutube Tinggwang Na Jisu, Ih ncu ngngwa daipai tei laino? Ih Tinggwang zi teu, acu tei keherei helo de nda a nggia kiela." 8 Kedanemene Jisu pe dade, "Nang mcikemak rabo, mina aipau de dade mpetti lulo," de rang kegaine. 9 Pecai Jisu pecu keteugai, "N zi cau no?" Pa pecu keligai, "A zi au Legion lie, anui kekiee ge kecune." 10 Ge pa Jisu dade penuide cikade gwa di helo kiebi di. 11 Cidau hebak maadi ge kideutu pi ga matyei la, 12 ge penui pe dade kiebi eh, ranggai, "Anuide hebak maa gage langgai dilo, iciu eh anui cipaudung de lungga lütlu kerane." 13 Ge Jisu penuide gwang dilo beu. Ge mcikemak rabe cidungde pet eh tetpwa hebak hau ga lütdi. Ge pehau de, hebak cangna kenzwa ge, hetialwa de pak hung jaaidi ga lütdi, delwe jaaidi gage hegak tset kapdi. 14 Pecai hebak de kekwame pakgwang eh namdi ga nah luhdung ga paukap gai, ge mina kekiee daipai tei dibi pie zielie gwang. 15 Pecai penui Jisu da gwang eh herakesiabe ne keliangteu kelabe de, Legion ne pecu keliangteu kelabe de, pelung mrak lu nah pepaini kailwe ntum kebam ngaulu eh penui ngngi sütti. 16 Herakesiabe ne keliang teu kelabe da tei kegai kengaumedung cipau hade nah hebakdung hade minadung dage ranglia. 17 Ge penui Jisu de penui cuikui gade tetti lo kie cuhdi. 18 Pecai pa liem gega lütti zeuge herakesiabe ne keliangteu kelabe de pecu ngngwa la kera pe dade kiedi. 19 Dede Jisu rau eh pe dage rangdi, "N kilung nah n mina da gwang culo nah penui dage Rampaube n ziemne ma kedi daikenzwa teigai bi kecu, nah daikenzwa Ih ncu a ngaugia keulia bi kecu rang lo." 20 Cine pa tetdi nah Decapolis gade Jisu pe ziemne ma kedi daikenzwa ge teigai bi kecu midage rangla di; iciu eh mina pelane de penui macangdi.

Relei ketsai ge nah mateei kela pui ge

21 Pecai Jisu liem gade lulegim kahpet dai luge, mina maadi ge gwang peda ngkwalu nah cidau pa jaaidi kung ga bam. 22 Ge, pielo, Jairus lie kecu synagogue* ga muiteume ge gwang pecu ngau luge, pa pepi ga keumie di. 23 Nah pa pe dade penggia kie daidai eh rangdi, "A napuina tsai dilau zeuda. Pecu teingkeilu eh ring dailu kerane nang gwang delwe n ba hwa pwa pecu deu gailo." 24 Cine Jisu pecu ngngwa meidi, nah mina maadi ge pecai sui nah pecu nia twagwa ladi.

25 Ge mipui mmi kereiekena hejai la kedi pui ge cika la. 26 Pa darukecime kekiee dade pie, nah pe mabam pelane mpetdi, dede yilu ma, ciciu meliene pa sia reureu di. 27 Cipau pui de Jisu ha siulu ge, maadi kakga pecaile gwang eh pe ncwa tunggai. 28 Kedanemene pa rangdi, "Ih pepai nage de tunggai cai, Ih yilu zie." 29 Pejai lwa kela de cang zette di, nah pe mateei ngkei kedi pe pum gade cidi. 30 Jisu pe dade kengkieng* pet kedi zette cilu. Pa nreu lule ailam mina maabe de pie eh keteudi, "Cau a pai deu no?" 31 Ge pe caisuime pe dage rangdi, "Nang pielo mina maadi aide ncu siang titi la mene, ‘Caune acu tung no?’" de nang rangzeu no. 32 Dede Jisu pepai kedeube de pie zielie lule ailam piegai. 33 Cidau cipau puide pe dade mateei mpetkedi cilu eh ngngi nah mbeu eh gwang pe dwaga keumie, nah pe dage samsangbe rangliadi. 34 Dede pa cipau pui dade rangdi, "A napoi, n kenlum ne ncu tei ngkei luda, n mateei depeu yilu eh n lung nciep eh tet mie lu."✝

35 Pa sam aidungde rang bamreu kecune, synagogue ga muiteume ki gade mina kangge gwang eh ranggai, "N napui tsai dida. Peu daitei keledeube de tei keherei si lalai?" 36 Dede Jisu penui kerang sam cidungde siu luge, pa synagogue ga muiteube dade rangdi, "Ngngi diso, nlum eh bamlu." 37 Iciu eh pa Peter, James nah pe sinabe John, de gwale mige dede peu pecai suila raudi. 38 Penui synagogue muiteube ki ga gwangcang luge, mina penui lung sia eh hei eh hapsüt kebam pa ngaulu. 39 Pa lüt kecudau, pa penui dage rangdi, "Daitei nnui nnui lung sia eh hap zeu no? Hena nabe tsaidi ma, dede zipzeu." 40 Ge penui pecu nuidi. Dede pa penui pelane de peu kisie mpetdi nah hena nabe pei penai pepui nah pecu ngngwa kelame bau de ngngwa hena nabe kebam ga pa lütti. 41 Ge pa hena nabe ba teulu eh pe dage rangdi, "Talitha koum!" Cide pekie, "Releipoi, Ih n dage rangla, cuhlu." 42 Ge releipuina de zette cuhlwe tet ladi (pa mmi kereiekena ge dide kecune) Aide kengaume penui macang zette pwa mage teidi. 43 Ge pa mide peu cide ci melu kerane penuide kaambi di. Nah pa penuide releipui de matyei kera peulo gai.

Jisu duireu ketet

22 Jisu zette peu ledeukelumedung de liemga nlütlu, delwe jaaidi keda lebie pe dwa gwangnswa lulo beu, pa maadibe de langgi kebam dauge. 23 Pa maadibe de langgi kedi cai, pa kekie tei kerane kideutu reuga pekatei hangdi. Cidau tinghegi gwangdi, nah pa pekatei rünne cika bam. 24 Aipau tingdau liem de rejaai sum ga ladi, dui nswak gage pung nlim teu eh, kedanemene tingkai ne penuide guilwa bam kedine. 25 Tingmui reket pe mdaibe tingdau*, Jisu dui reu gade tet penuida gwang. 26 Ledeukelumedung pecu duireu ga tetkela ngau keludau, penui ngngi sütdi eh, "Cide au herabe geda," de rangdi nah penui ngngi eh mradi. 27 Dede Jisu zette penui dage maranggai, "Kuu lu! Ih lie! Ngngi diso." 28 Ge Peter ranggai, "Rampaubo, magade nang liecai, acu peu duireu gade tetpet nda gwang lulo samkai beulo." 29 Jisu rangdi, "Mpetlu." Cine Peter liem gade mpetlu nah Jisu da mie kerane duireu gade tetpet. 30 Dede Peter tingkai cisüt kecu de ngau luge, pa ngngidi. Pa nlim mie ge, pa sahbak eh, ranggai, "Rampaubo, acu kelibeu lo!" 31 Jisu zette pe ba hwapwa Peter de teulu delwe pedage rangdi, "Nang kenlum keceu nabo, daitei nang lunghau dino?" 32 Nah Jisu penai Peter liem ga nlüt luge, tingkai gui ngkaam zingdi. 33 Ge ledeukelume liem ga kelamedung Jisu de reca eh, rangdi, "Nang Tinggwang Nabe kesang da."

Jisu kemnoime gede teingkei kebeu

1 Tingbazie kiee kemak gecai Jisu Capernaum namceu ga gwang dai luge, pa pe kiga bamlie kecu mina ci gwangdi. 2 Iciu eh mina kekiee cika gwang ngkwalu ge kikam ga kecangde mina sap kera heni gahdi, nah Jisu penui dage Tinggwang sam ranggai. 3 Cidau midungge kemnoime ge de peda pwagwang; pecu mina hang mdai ne pwala. 4 Mina maabe ziemne penui petai nna gailak kedidau, penui Jisu kebam kireu gade ki raklu, delwe ngkei kelucai, penui kemnoibe zeu kebam zeu de pwa nghung gai. 5 Ge Jisu penui kenlum ngau eh, pa kemnoibe dage rangdi, "A na, n maudung gibeu dide lie." 6 Ge laisiukecime kangge de cika kilung ga bam, ge penui penui lung gade keteudi, 7 "Mina aipaude daitei aikenzwa ge rangla bi? Pa Tinggwang de rangmsiala dida! Dede Tinggwang rünne kemakcai caune kemaudung gibeu lulai?"✝ 8 Ge Jisu zette pe rabe gade penui lungcet de cilu. Jisu penui dage keteudi, "Nnui daitei eh nnui lung gade ma aiciu kecu cet lano? 9 Kemnoibe dage, ‘N mau gibeu dida’ de kecube mi ‘Cuhlu, nzeu pwalu, delwe tetcu,’ de kecube rangla ki zieno? 10 Dede kideureu mina maudung gibeulu kebui Mina Nabe da kengking kebam nnuide peu cilu kerane," Pa kemnoibe dage ranggai, 11 "Ih n dage rang gaila, cuhlu, n zeu pwalu, delwe n kiga gwangdi lulo." 12 Cine pa cuhlu delwe zette pe zeu teupwa pelane dwa gade tet mpetdi. Ciziemne, penui pelane penui macangh kapdi nah penui Tinggwang de twa eh rangdi, "Anui aikenzwa madaude ngau mezing reu."

Lazarus tsit

1 Mipei ge pezi Lazarus lie kecu de mra bam. Pa au Bethany nam gade, Mary nah pe sinapui Martha nam gade. 2 Mary aipau dene maca le Rampaube de keniak nah pe tam le pe pi neu, pe heipei Lazarus mra bam. 3 Pe tipui kena Jisu dage sam langgai, eh ranggai, "Pielo, Rampaubo, nang hungkelabe pa mra bamlie." 4 Dede Jisu sam cide siu luge, pa rangdi, "Mateei aide ketsai mateei ma, dede cide au Tinggwang zi peu ndulu kerane iciu eh Tinggwang Nabe depeu cide gade ndulu kerane." 5 Cu Jisu Martha nah pe sinapui nah Lazarus de hungdi. 6 Cine pa Lazarus mra bam lie kecu siulu ge, Jisu tetmene bamdi langnane bamsi pa kebam ni ga. 7 Ge pecai, pa caisuimedung dade rangdi, "Anui Judea ga nligwangdai cugo." 8 Caisuimedung pe dade rangdi, "Keledeubo, Jewme cune tangtsu pwa ncu sam kera tei bam, nah nang cika nli gwang daizie reuni?" 9 Jisu sam keligai, "langnaige ga bamdakkak kereiekena bam meni? Mige ting kebaadau tet lacai, pa pepi nsui lama, kedanemene pa ngaula aipau kideu kebaa dene. 10 Ciuliede, mige tingmui tet lacai, pa pepi nsui zie kedanemene peda kebaa gah kecune". 11 Pa ma aidung de ranggai, nah aipau dungde cai, pa penui dage rangdi, "Anui zangbe Lazarus zip dida, dede Ih au tet zie da iciu eh zip kebam gade Ih pecu ngkialu kerane". 12 Caisuimedung ciziemne pe dade rangdi, "Rampaubo, pa zip zeu cai, pa yidai luzie." 13 Cu Jisu au pa tsai kedi ha rang, dede penui Pa au ziep mtak zeulie kecu ha rang bamlie cetti. 14 Ciziemne Jisu penui dage ranglia mci siakte beu, "Lazarus tsai dida. 15 Nnui ziemne, Ih cika bam kemakpe a suiyi, iciu eh nnuide peu acu nlumlu kerane. Dede anui peda mie go." 16 Ge Thomas, Didymus lie de qu kelabe, caisuime pe zangme dage rang, "Anui liede mie go iciu eh anui Jisu de ngngwa tsai kerane."

Jisu Lazarus tipui kena lung taukemla

17 Ciziemne, Jisu gwang kecudau, Lazarus herau ga lang mdai ne bam di kecu pa ngaulu. 18 Cu Bethany au Jerusalem kemna ga, stadia kereimengei* kenzwa dei ge. 19 Jewme kekieege Martha nah Mary da gwang, penai heipei ziemne penai lung tei nciep beu kera. 20 Ge Martha, Jisu gwang zeulie kecu pa siu keludau, tet mie pecu redau, dede Mary au kilung ga bamdi. 21 Ge Martha Jisu dage rangdi, "Rampaubo, nang aika bam liecai, a heipei tsaidi lak nage. 22 Dede cude, nang Tinggwang dade makeheibede kie gaide, pa ncu pwapeu kera Ih cibam." 23 Jisu pe dage rangdi, "N heipei ringcuh dai luzie." 24 Martha pe dage rangdi, "kamtube nai pa ringcuh dai lu kera Ih cibam."✝ 25 Jisu pe dage rangdi, "Ih ringcuhdai kelube nah keringriabe da; acu nlum kelame au, pa tsaidi de, ringdai luzie; 26 nah caugame ring eh bam nah acu nlum kelume madau gede tsai dilak. Nang aide nlum demi?" 27 Pa pe dage rangdi, "Yeo, Rampaubo, Ih nlum nang au Khrista lie, Tinggwang Nabe, kideu ga lunggwang lai eh kelabe lie." 28 Pa aide rang kelu cai, pa tetdi nah ngkim eh pe sinapui Mary de qulu. Pa rangdi, "Keledeube aika gwang bam nah ncu quzeu lie." 29 Pa aide siulu ge, pa cuh zette lu nah pe da miedi. 30 Cidau Jisu renam ga gwang mereu, dede Martha pecu keredau kecu ni ga cude bam reu. 31 Cine Jewmedung cidau, kilung ga pecu ngngwa kebamme nah pe lung taumla kebamme, Mary cuh zettelu nah mpet kedi ngau luge, pa herau ga mie cikade hap lau ha kecu mning eh penui pe caisui mie. 32 Iciu eh Mary Jisu kebam ni ga gwang canglu nah pecu ngaulu ge, pe pi ga keumie pa nah pe dage rangdi, "Rampaubo, nang aika bam liecai, a heipei tsaidi lak nage." 33 Ciziemne Jisu pa kehap, nah pecu ngngwa gwang kela Jewmedung de kehap ngaulu ge, pa pelung sia sütdi nah pelung kehereidi; 34 cine pa rangdi "Nnui pecu dai gage kaipwa bam no?" Penui pe dade rangdi, "Rampaubo, gwang eh pielo." 35 Jisu hapdi. 36 Ge Jewmedung rangdi, "Pielo pa Lazarus de daikenzwa gede hungbi!" 37 Dede mi kangge rangdi, "Mina aipaude teilubui meni, miakcietme ge miak tei hemi kelube, mina aipau dede peu tsai melu kera?"

Jisu Lazarus de ketsai gade teucuh kelu

38 Ge Jisu pelung sia süt dai eh herau ga mie. Cu cide tsupop ge, nah cide tangtsu gele nket pwabam. 39 Jisu rangdi, "Tangtsu de kwak keziadi." Martha, tsai kedibe tipui, Jisu dade rangdi, "Rampaubo, pe paau tim nnamdi zieda, kedanemene lang mdaine dide lu." 40 Jisu pe dage rangdi, "Ih n dage rang meni, nang nlumlu cai, Tinggwang kendu nang ngau luzie de kecu?" 41 Cine penui tangtsu pwagi di. Pecai Jisu ngang cuh pie nah rangdi, "Apei, Ih ncu twa la nang a kwa kingnei kebeune. 42 Ih nang a kwa kingnei bam mui kela Ih ci, dede mina maabe acu twagwapung kesapme ziemne, Ih sam aide rang gai, iciude nang ne acu langgai beulie kecu peu penuide nlumlu kerane." 43 Pa aide rangkelu cai, pa marang sahbak gai, "Lazarus, mpet lulo."

Jisu de teitset kera ciem

44 Tsai kedibe de mpet lu; pe pi nah pe ba pai le kezuipung eh, nah pe zu pai ge le kezuipung eh. Jisu penui dage rangdi, "Pecu hiakgai nah pecu peu tetcuh."