Arrependimento

17 तेइसेरू देंतू यीशुए परमेशरेरी खबर लोकन प्रचार केरनेरी सेवा शुरू की। तैनी लोकन ज़ोवं, "अपने पापन करां मन फिराथ, किजोकि सुर्गेरू राज़ नेड़े एवरूए।"

8 सज़ाही करां बच़नेरे लेई तैना कम्मां केरा, ज़ैन सेइं पतो लग्गे तुसेईं सच़्च़े पापन करां मन फिरावरोए।

13 फिर भी तुस गेइतां एस गल्‍लरो मतलब कढा, "अवं बलिदान नईं बल्के दया पसंद केरताईं, किजोकि अवं धर्मी लोकन नईं बल्के पापी लोकन कुजाने एवरोईं।"

15 तैनी ज़ोवं कि, "ठीक वक्त एवरोए त कने परमेशरेरू राज़ नेड़े एवरूए! एल्हेरेलेइ, तुस अपने पापन करां मन फिराथ ते इस खुशखेबरी पुड़ विश्वास केरा।"

3 अवं तुसन सेइं ज़ोताईं कि, अगर तुस भी पापन करां मन न फिराले त सब एन्च़रे नाश भोनेथ।

32 अवं धर्मी लोकन नईं, पन पापी लोकन कुजाने एवरोईं कि, तैना अपने पापन करां मन फिरान।"

38 पतरसे तैन सेइं ज़ोवं, "पापन करां मन फिराथ ते तुसन मरां सारे यीशु मसीहेरे नंव्वे सेइं बपतिस्मो घिन्ना, त परमेशर तुसन माफ़ केरेलो ते पवित्र आत्मा तुसन इनामे मां मैल्हेली।

19 बस्सा पापन करां मन फिराथ ते परमेशरेरे पासे फिरा ते तै तुश्शे पाप माफ़ केरेलो, ते परमेशरेरी तरफां तुश्शे लेई परमेशरे तरफां रोड़े दिहाड़े एज्जेले।

30 एल्हेरेलेइ परमेशरे लोकां अज्ञानतारे वक्ते पुड़ ध्यान न दित्तू, ते हुनी तै मैन्हन सेब्भी ठैरन हुक्म देते कि मन फिरान।

19 अवं ज़ैन-ज़ैन सेइं प्यार केरताईं, तैन शिखालताईं ते सज़ाह देताईं ताके तैना रोड़े बनन। एल्हेरेलेइ भलियाई केरने मां लग्गोरो रा, ते पापन करां मन फिरा।

9 किछ लोक सोचतन कि प्रभु अपनो वापस एजनेरो वाधे पूरे केरने मां च़िर लगोरो लाने। पन परमेशर एन्च़रे च़िर नईं लाने लगोरो, बल्के इसेरे बदले तै तुसन सेइं सबर लगोरो केरने। किजोकि तै न चाए कोई भी नाश भोए। पन तै चाते कि हर कोई अपनो मन बदले त कने गलत केरनू शारे ते तैस कां एज्जे।

32 किजोकि, प्रभु यहोवा एन ज़ोते, ज़ै मरे, तैसेरे मरने सेइं अवं खुशी न भोईं, एल्हेरेलेइ पसताथ, तैखन तुस ज़ींते राले।"

14 तैखन अगर मेरे लोक ज़ैन जो मेरे लोक ज़ोतन, मेरे दर्शनेरी तोपी मां रेइतां अपने बुरे चाली करां फिरन ते दीन भोइतां प्राथना केरन, त तैखन अवं सुर्गे मरां शुन्तां तैन केरो पाप माफ़ केरेलो ते तैन केरो मुल्ख ज़ेरो थियो तेरहो केरेलो।

हिजकिय्याह राज़ेरे ज़िरिये फ़सह तिहारेरी तियारी

1 फिरी हिजकिय्याह राज़े सारे इस्राएले मां ते यहूदा मां ई समाद भेज़ो, ते एप्रैमे ते मनश्शे कां इस इरादे सेइं चिट्ठी लिखतां भेज़ी, कि तुस यरूशलेम नगरे मां यहोवारे भवने मां इस्राएलेरे परमेशर यहोवारे लेई तिहार मनानेरे लेई एज्जा। 2 राज़े ते तैसेरे हाकिमेईं ते यरूशलेमेरे लोकेईं सलाह कियोरी तिहार दूइयोवं महीने मां मनाम। 3 तैना तैस मौके एस वजाई सेइं न मनेई सखते थिये, किजोकि थोड़े ज़ेरे याजकेईं अपनो आप पवित्र कियोरो थियो, ते लोक यरूशलेम नगरे मां अकोट्ठे न थिये भोवरे। 4 ऐह गल राज़े ते तैसेरे लोकन रोड़ी लगी। 5 तैखन तैनेईं ऐह गल कानूनेरे किताबरे मुताबिक ठहराई, कि बेर्शेबा नगरे करां लेइतां दान नगरेरे सारे इस्राएली लोकन मां ई प्रचार कियो गाए, कि यरूशलेमे मां इस्राएलेरे परमेशर यहोवारे लेई फ़सह तिहार मनाने एज्जा। किजोकि तैनेईं एत्री तैधादी मां पेइलू एन्च़रे न थियूं मनवरू ज़ेन्च़रे कि लिखेरूए। 6 एल्हेरेलेइ राज़ेरे दूत तैसेरे हाकिमन करां चिट्ठी नेइतां राज़ेरे हुक्मेरे मुताबिक सारे इस्राएले ते यहूदा मां हंठते फिरे, ते इन ज़ोते जे, "हे इस्राएली लोकव! अब्राहम, इसहाक, ते इस्राएलेरे परमेशर यहोवारे पासे फिरा, कि तै अश्शूरेरे राज़ेरे हथ्थे करां बच़ोरे तुश्शे लोकां केरे पासे फिरे। 7 ते अपने दादे-पड़दादां ते अपने इस्राएली भियालां केरे ज़ेरे न बना, ज़ैनेईं अपने दादे-पड़दादां केरे परमेशर यहोवा सेइं धोखो कियोरो थियो, ते तैनी तैना हैरान भोनेरी वजा बनाए, ज़ेन्च़रे कि तुस एप्पु हेरने लगोरेथ। 8 हुनी तुस अपने दादे-पड़दादां केरि ज़ेरि ज़िद न केरा, बल्के यहोवारे अधीन भोइतां तैसेरी तैस पवित्र ठारी मां एज्जा ज़ै तैनी हमेशारे लेई पवित्र कियोरीए, ते अपने परमेशर यहोवारी आराधना केरा, कि तैसेरो भड़कोरो क्रोध तुसन पुड़ेरां दूर भोइ गाए। 9 अगर तुस यहोवारे पासे फिरेले त ज़ैनेईं तुश्शे भियाल ते बाल-बच्‍चे गुलाम बनेइतां नेवरेन, तैना तैन पुड़ दया केरेले, ते तैना इस मुल्खे मां वापस एज्जेले किजोकि तुश्शो परमेशर यहोवा अनुग्रह ते दया केरनेबालोए, ते अगर तुस तैसेरे पासे फिरेले त तै तुसन कबूल केरेलो।"

10 एन्च़रां सेइं राज़ेरे दूत एप्रैम ते मनश्शेरे प्रादेशन मां नगरे-नगरे हंठते च़लते जबूलून प्रदेशे तगर जे। पन तैनेईं तैन केरो मज़ाक बनाव, ते तैन पुड़ हसने लग्गे। 11 फिर भी आशेर, मनश्शे ते जबूलून गोट्लन मरां किछ लोक दीन भोइतां यरूशलेम नगरे जो आए। 12 यहूदा मां भी परमेशरेरी एत्री शक्ति भोइ, कि तैना अक मन भोइतां, ज़ै हुक्म हिजकिय्याह राज़े ते हाकिमेईं यहोवारे वचनेरे मुताबिक दित्तोरो थियो, तैस मन्नेरे लेई तियार भोए।

फ़सह तिहार मनानू

13 एन्च़रां सेइं बड़े लोक यरूशलेम नगरे मां एल्हेरेलेइ अकोट्ठे भोए, कि दूइयोवं महीने मां अखमीरी रोट्टरू तिहार मनाम।✝ 14 तैन सारे लोकेईं उठतां, यरूशलेमेरी देबतां केरि वेदी ते गुग्गल बालनेरी सैरी ठारां छ़ुइतां किद्रोनेरे नाले मां शैरी। 15 तैखन दूइयोवं महीनेरे च़ेवधोवं दिहाड़े तैनेईं फ़सह तिहारेरे लेई जानबर बलि किये, तैखन याजक ते लेवी शरमिन्दे भोए ते तैनेईं अपनो आप शुद्ध केरतां होमबलि केरनेरे लेई जानबर यहोवारे भवने मां आने। 16 तैना अपने नियमेरे मुताबिक, मतलब परमेशरेरे दास मूसेरे कानूनेरे मुताबिक, अपने-अपने जगाई पुड़ खड़े भोए, ते याजकेईं बलिदानां केरो खून लेवी केरे हथ्थे मरां नेइतां छ़िड़को।✝ 17 किजोकि सभाई मां किछ एरे लोक थिये ज़ैनेईं अपनो-आप शुद्ध न थियो कियोरो। एल्हेरेलेइ सारे अशुद्ध लोकां केरे फ़सह तिहारेरे जानबर बलि केरनेरो अधिकार लेवी लोकन दित्तो जेव, कि तैन यहोवारे लेई शुद्ध केरन। 18 एप्रैम, मनश्शे, इस्साकार ते जबूलून गोट्लन मरां बड़े लोकेईं अपनो आप शुद्ध न थियो कियोरो। फिर भी तैना फ़सह तिहारेरे जानबरेरू मास लिखोरी विधरे खलाफ खाते थिये। किजोकि हिजकिय्याहे तैन केरे लेई ई प्राथना कियोरी थी, "यहोवा ज़ै भलोए, तै तैन सेभी केरे पाप ढेक्‍की दे। 19 ज़ैनेईं अपने पूर्वजां केरे परमेशर यहोवारी तलाशी मां अपनो मन लेवरोए, चाहे तैना पवित्र ठारारी विधरे मुताबिक शुद्ध न भी भोन।" 20 ते यहोवा हिजकिय्याहेरी ई प्राथना शुन्तां लोक बझ़ाए। 21 ज़ैना इस्राएली यरूशलेम नगरे मां हाज़र थिये, तैना सत दिहाड़न तगर अखमीरी रोट्टरू तिहार बड़े आनन्दे सेइं मनाते राए। ते रोज़ लेवी ते याजक बड़े ज़ोरे सेइं बाज़े बज़ेइतां यहोवारी आराधना केरते राए। 22 ज़ेत्रे लेवी यहोवारी सेवा समझ़दैरी सेइं केरते थिये, तैन केरि हिजकिय्याह राज़े हिम्मत बधाई। एन्च़रां सेइं तैना मेलबलि च़ैढ़तां अपने पूर्वजां केरे परमेशर यहोवारे सामने इकरार केरते राए, ते तैना पेइले दिहाड़े करां लेइतां तिहारेरे सत दिहाड़न तगर खाते राए।

फ़सह तिहार दूइयोवं फेरे मनावं गानू

23 तैखन सैरी सभारे लोकेईं सलाह की, कि अस होरे सत दिहाड़े फ़सह तिहार मनाम। ते तैनेईं होरे सत दिहाड़े फ़सह तिहार मनाव। 24 किजोकि यहूदारे राज़े हिजकिय्याह, लोकन 1000 बछ़ड़ां ते 7000 गब्बां दित्तोरां थियां, ते हाकिमेईं लोकन 1000 बछ़ड़ां ते 10000 गब्बां दित्तोरां थियां, ते बड़े याजकेईं अपनो आप शुद्ध कियोरो थियो। 25 तैखन याजक ते लेवी लोकन समेत यहूदारी सारी सभा, ते इस्राएले मरां एवरे लोकां केरि सभा, ते इस्राएलेरे मुल्खे मरां एवरे लोक, ते यहूदा प्रदेशे मां रानेबाले परदेशी, एन सेभेइं खुशी मनाई। 26 एन्च़रां सेइं यरूशलेम नगरे मां बड़ी खुशी मनाई जेई, किजोकि दाऊदेरे मट्ठे इस्राएलेरे राज़े सुलैमानेरे राज़ केरनेरे दिहाड़न करां एरी गल यरूशलेम नगरे मां न थी भोवरी। 27 आखरी मां लेवी याजकेईं खड़े भोइतां लोकन आशिर्वाद दित्तो, ते तैन केरि तै प्राथना सुर्गे तगर पुज़्ज़ी जेई, ते परमेशरे तैन केरि शुनी।

13 दुखे मां अपना लिगड़ां नईं, बल्के अपनो मन छ़िन्दतां अपने परमेशर यहोवारे पासे फिरा; किजोकि तै बड़ो अनुग्रह केरनेबालो ते दया केरनेबालोए क्रोध केरने मां च़िर लानेबालो, करुणा केरनेबालो दुख देइतां पसताने बालोए।

मन फिरानेरी पुकार

1 फारस मुल्खेरे दारा राज़ेरी हुकूमतरे दूइयोवं सालेरे अठोवं महीने मां जकर्याह नेबी सेइं ज़ैन बेरेक्याहेरू मट्ठू ते इद्दोएरू पोट्लड़ू थियूं यहोवा इन ज़ोवं,✝ 2 यहोवा तुश्शे लोकां केरे दादे-पड़दादन पुड़ बड़ो क्रोधे भोवरो थियो। 3 एल्हेरेलेइ तू इन लोकन सेइं ज़ो, "सेना केरो यहोवा इन ज़ोते; तुसां मेरे पासे फिरा, सेना केरो यहोवा एन ज़ोते: तैखन अवं तुश्शे पासे फिरेलो, सेना केरो यहोवा एन ज़ोते।✝ 4 अपने दादे-पड़दादां केरे ज़ेरे न बना, तैन सेइं त पुराने ज़मानेरे नबी ज़ोरे-ज़ोरे सेइं ज़ोते थिये, सेना केरो यहोवा एन ज़ोते; एपनी बुरी बत्ती करां, ते अपने बुरे कम्मन करां फिरी गाथ, पन तैनेईं न त तैन केरू ज़ोनू शुनू, ते न मेरे पासे ध्यान दित्तू, यहोवा एन ज़ोते।✝ 5 तुश्शे दादे-पड़दादे कोड़ि राए? नबी कुन हमेशा ज़ींते रहतन? 6 पन मेरे वचन ते मेरे हुक्म ज़ैना मीं अपने दास नेबन दित्तोरे थिये, कुन तैना गल्‍लां तुश्शे दादे-पड़दादन पुड़ पूरी नईं भोवरी? तैखन तैनेईं मन फिराव ते ज़ोने लगे, सेना केरो यहोवा इश्शो चाल चलन ते इश्शे कम्मां केरे मुताबिक असन सेइं सलूख केरनेरो इरादो कियोरो थियो, तेरहो तैनी असन बदलो भी दित्तोरोए।"✝

घोड़ां केरू दर्शन

7 दारा राज़ेरी हुकूमतरे दूइयोवं सालेरे शबात नंव्वेरे यारोवं महीनेरे च़ौबियोवं दिहाड़े जकर्याह नबी ज़ैन बेरेक्याहेरू मट्ठू ते इद्दोएरू पोट्लड़ू थियूं, यहोवा तैस सेइं इन ज़ोवं, 8 "मीं राती सुपने मां कुन लावं कि अक मैन्हु लाल घोड़े पुड़ च़ेढ़तां मींधरे बुट्टां केरे मझ़ाटे खड़ो थियो ज़ैना बुनीयें ठारन मां आन, ते तैस पत्पती लाल ते तोसे ते छ़ित्ते घोड़े भी खड़ेन।✝ 9 तैखन मीं पुछ़ू, ‘हे मेरे प्रभु एना कौन आन?’ तैखन ज़ै दूत मीं सेइं गल्‍लां लगोरो थियो केरने, तैनी मीं जुवाब दित्तो, ‘अवं तीं हरेइलो कि एना कौन आन।’ 10 फिरी ज़ै मैन्हु मींधरे बुट्टां केरे मझ़ाटे खड़ो थियो, तैनी ज़ोवं, ‘एना तैना आन, ज़ैना यहोवा धेरती पुड़ सैर केरने मतलब घुमनेरे लेई भेज़ोरेन।’ 11 तैखन तैनेईं यहोवारे तैस दूते सेइं ज़ै मैन्हु मींधरे बुट्टां केरे मझ़ाटे खड़ो थियो, ‘असेईं धेरती पुड़ सैर की, ते कुन लावं कि सैरी धेरती पुड़ शान्ति ते चैने।’

यहोवा सिय्योने तसल्‍ली देलो

12 "तैखन यहोवारे दूते प्राथना मां ज़ोवं, ‘हे सेना केरे यहोवा, तू ज़ै यरूशलेम ते यहूदारे नगरन पुड़ 70 सालन करां सेरकोरोस, एल्हेरेलेइ तू तैन पुड़ केइस तगर दया न केरेलो?’ 13 ते यहोवा जुवाबे मां तैस दूते सेइं ज़ै मीं सेइं गल्‍लां लगोरो थियो केरने, रोड़ी-रोड़ी ते शैन्तरी गल्‍लां ज़ोई। 14 तैखन ज़ै दूत मीं सेइं गल्‍लां लगोरो थियो केरने, तैनी मीं सेइं ज़ोवं, ‘तू ज़ोरे-ज़ोरे सेइं ज़ो, कि सेना केरो यहोवा इन ज़ोते, मीं यरूशलेम ते सिय्योनेरे* लेई बड़ी जलन भोवरीए। 15 ज़ैना गैर कौमां सुखे मां रैतिन, तैन पुड़ क्रोधे आईं; किजोकि मीं त थोड़ो ज़ेरो क्रोध कियोरो थियो, पन तैनेईं मुसीबत बधावरीए। 16 एल्हेरेलेइ यहोवा एन ज़ोते, हुनी अवं दया केरतां यरूशलेमे जो वापस एवरोईं; मेरू भवन तैस मां बनेलू, ते यरूशलेमे पुड़ नापनेरी डोरी छ़डी गाली, सेना केरो यहोवा एन ज़ोते।

शिंगां केरू दर्शन

17 "‘फिरी एन भी ज़ोरे सेइं ज़ो कि सेना केरो यहोवा एन ज़ोते, कि मेरे नगर दुबारां रोड़ी चीज़न सेइं भरपूर भोल्हे, ते यहोवा फिरी सिय्योने शान्ति देलो; ते यरूशलेमे फिरी अपनो बनालो।’"

18 फिरी मीं एछ़्छ़ी खोलतां तक्‍कू ते कुन लावं कि च़ेवर जानबरेरां शिंगन। 19 तैखन ज़ै दूत मीं सेइं गल्‍लां लगोरो थियो केरने, तैस मीं पुछ़ू, "एन कुने?" तैनी मीं जुवाब दित्तो, "एना तैन्ना शिंगन* ज़ैनेईं यहूदा ते इस्राएल ते यरूशलेम नगर तितर-बितर कियोरूए।" 20 तैसेरां बाद यहोवा मीं च़ेवर लुहार हिराए। 21 तैखन मीं पुछ़ू, "एना कुन केरने एवरेन?" तैनी जुवाब दित्तो, "एना तैन्ना शिंगन, ज़ैनेईं यहूदा एस तरीके सेइं तितर-बितर केरतां छ़डोरोए कि कोई क्रोड़ी खड़ी केरतां न च़ेलि बटे; पन एना लोक तैन निशान्नेरे लेई ते तैन कौमां केरां शिंगां कटनेरे लेई एवरेन, ज़ैनेईं यहूदा प्रदेश तितर-बितर केरनेरे लेई तैन केरे खलाफ अपना-अपना शिंगां खड़ां कियोरां थियां।"

13 ज़ै अपने पाप छ़ुपेइतां रखते, तैसेरू कम कामयाब न भोए,

पन ज़ै तैन्न मन्ते ते शारते भी,

तैस पुड़ महरबानी की गाली।

23 तुस मेरी डांट शुन्तां मन फिराथ;

शुना, अवं अपनि आत्मा तुश्शे लेई उलटाली;

अवं तुसन अपनु ज्ञान देइली।

9 अगर अस अपने पाप मन्तम, त तै इश्शे पाप माफ़ केरने, ते असन सेब्भी अधर्मे करां शुद्ध केरने मां वफादार ते धर्मीए।

7 अवं तुसन सेइं ज़ोताईं कि, एन्च़रे 99 धर्मी ज़ैनेईं पेइले अपने पापन करां मन फिरावरो तैन करां जादे ज़ैखन अक पापी, पापन करां मन फिराते सुर्गे मां बड़ी खुशी बनाई गाचे।

10 बस्सा, अवं तुसन सेइं ज़ोताईं कि एक्‍की पैपेरे, पापन करां मन फिराने सेइं परमेशरेरे स्वर्गदूतां केरे सामने बड़ी खुशी मनाई गाचे।"

8 परमेशरेरे नेड़े एज्जा, त तै तुश्शे नेड़े एज्जेलो, हे पापी लोकव, अपने ज़िन्दगी मरां पाप दूर केरा, ते हे दुमन्ने बाले लोकव अपने मन्न पवित्र केरा।