41 Siku yila vanu wolofu vakatsidichilaje ndongwa tso alongaga, vakabatitswaje na siku yiyila vakongetsekaje vanu kota elufu tsidatu. 42 Vanu veka iwo vakendelelaje mu madahitso ga vatumi, na muwuhantso, na kulya hamwe na kitanga mukate gwa Mutwa, na mu suko.

43 Vatumi vaditaga miwujitsa na ndajilo ntsolofu, kwasawuli iyo chila munu akamwogopaje Mulungu. 44 Vanu veka vanya litumbilo vakendelelaje kuva chinu chimwe na kigavila finu fyawo. 45 Vagutsaga mali tsawo na finu fyawo fyo vavaga nafyo, na kugavana magobole chila munu kota fyo an’ganika kugavilwa. 46 Siku tseka kwa numbula yimwe vitang’anaga ha Nyumba ya Mulungu na kulya mukate kuhuma nyumba yimwe mbaka yinji, nawo valyaga chilyo chawo kwa wusangalo. 47 Nawo vamutsumitsaga Mulungu, na kuvagan’ya vanu veka. Siku tseka Mutwa akavalutitsaje vanu wo vamutumbaga Chilisito, kwa vala wo vavaga vankuluswa.

10 Mwiganaje henye kwa henye, kwa hesima chila munu ahotsaje kwajili ya muyage na kumuwona kuta nayo munu.

32 Mun’ganika muve na numbula nofu na kaha mwiwonelaje lusungu, na chila munu amuhulumilaje muyage kota hila Mulungu fyo avahulumye henye kukolela kwa Chilisito.

13 Henye vanya litumbilo vayangu mwachemilwe na Mulungu ili muve na wuhulu, lechelelo wuhulu uwo mulekaje kuwutumila kwa mbwiniwo tsa ndongwa tsa mu inyi, ila mwitangaje henye kwa henye kwa wugano.

11 Duve lelo, vang’olotsangu mwikalaje finofu. Mwikangatsaje mu litumbilo, mwibataje hila fyo ntsivalonje, muvaje wo vamwe na kikala kwa wusichimafu. Nayo Mulungu munya wugano na wusichimafu weka akuva hamwe na henye.

34 Ntsinguvapelani amuli ntsipya mwigane henye kwa henye. Kota heni fyo ntsivaganite henye, henye nanye mwiganaje henye kwa henye.