1 Luvala ulo vafwasi va Yesu hovavaga vankongeketseka, kukavaje na ng'ung'uto hagati ha Vayawudi wo vanlonga Chijilichi na Vayawudi vanyakaye. Vajilichi wo vanlonga Chiyawudi vakalalaga kuta vafwile vawo vavaga vasemilwe kugavilwa filyo fya chila siku. 2 Ihyo vala vatumi kumi na vavili vakavachemaje hohamwe vafwasi va Yesu na kuvalonjela kuta "Siyo finofu hetwe tuleche katsi ya kudahitsa Ndongwa tsa Mulungu na kukola katsi ya kuvagavila vanu filyo fya chila siku. 3 Ihyo lelo vang'olotsetu muhagule vanu saba hagati henyu, wo vanya wuvetso wa Muhe va Mulungu na vawuya, na vanya ntselo, ili tuvaviche mu katsi yino. 4 Hetwe tukusigala kumusuka Mulungu na kudahitsa ndongwa tsa Mulungu." 5 Vanu veka vakaludichilaje lulongwa ulo, ihyo vakamuhagulaje Sitefwani, munu yo avaga na litumbilo kwa Mulungu na yo alongotswaga na Muhe va Mulungu. Kaha vakamuhagulaje Fwilipo na Pulokolo, na Nikanoli, na Timoni, na Palimena, na Nikolawo munu va kuhuma ku Andiyochiya yo inje mu dini ya Chiyawudi. 6 Vakavavikaje vanu iwo halutalo ha vatumi, nawo vatumi vakavasuchilaje na kuvatambichila kwa kuvavichila mawoko.

7 Ndongwa tsa Mulungu tsikalutilaje kutagalila, na vafwasi va Yesu vakongetsekaje ndalahela kuko Yelusalemu, nambe vatawula nambiko wolofu nawo validichilaga litumbilo lila.

8 Mulungu avaga amupelye Sitefwani wuwuya na wuvetso wukomi, ihyo Sitefwani aditaga mitinuso na ndajilo ngomi hagati ha vanu. 9 Lechelelo vakahumilaje vanu vatunga wo vahumye mu nyumba ya kitang'anila Vayawudi yo yachemwaga nyumba ya kitang'anila ya vanu vapogotsi wo valesilwe, wo vavaga vahumye ku Chilene, na vanji vakuhuma ku Alechitsandiliya. Na vamwe va kuhuma ku Chilichiya na ku Asiya, vanu iwo vakantsaje kusumana na Sitefwani. 10 Lechelelo vakalemwaje kusumana na Sitefwani kwasawuli Muhe va Mulungu amupelaga ntselo hala ho alongaga. 11 Ihyo vanu vala vakavakokaje vanu kwa kuvapela magobole kwa lufiho ili valonje, "Tumuhuliche Sitefwani anlonga ndongwa tsa kuvaliga Musa hamwe na Mulungu."

12 Kaha vakavasongetsaje vanu, na vavina va Isilaheli hamwe na vadahitsi va malajitso ga Musa. Nawo vakamubataje Sitefwani na kumusindika halutalo ha libalatsa. 13 Vakavavikaje masahidi va wudesi wo valontsile, "Munu yuno si anleka kulonga ndongwa tsa kuyiliga Nyumba yino nyagulwa ya Mulungu, na ntsovelo tso tupelilwe na Musa. 14 Tumuhuliche munu yuno anlonga kuta uyo Yesu va ku Natsaleti akuhananga nachene hono hano hahagulwa na kutsibadila ntsovelo tseka tso tupelilwe na Musa." 15 Vala vanu veka wo vavaga vichite mu libalatsa lila, vakamukangatsilaje miho Sitefwani, nawo vakamuwonaje kumiho kwake kummelema kota kumiho kwa mutantsi va kilanga va Mulungu.