1 Petulo na Yohana hovavaga vang'acha vanguvavikulila vanu, vavina vamwe va vatawula nambiko, na muvina va vimilitsi va Nyumba ya Mulungu na Masadukayo vakatsaje. 2 Vavaga vavifile ndalahela kwasawuli iwo vatumi vavili vavaga vanguvadahitsa vanu kuta Yesu akatsilipuche, na kwasawuli iyo vanu wo vafweye nawo vakutsilipuka. 3 Ihyo vakavabataje Petulo na Yohana, na kwasawuli litsuva mwanga lyavaga lisotite vakavavikaje mu nyumba ya vawopwa mbaka hamilawu yiyage. 4 Lechelelo vanu wolofu hagati ha vala wo vavaga mwanga vahuliche ndongwa tso vavikulaga Petulo na Yohana vakamutumbaje Chilisito, nawo vavaga valume kota elufu tsihanu hino. 5 Hamilawu iyage filongotsi va Vayawudi, na vavina na vadahitsi va malajitso ga Musa vakakong'anaje hamwe uko ku Yelusalemu. 6 Vakitang'anaje hamwe na Anasi muvina va vatawula nambiko, na Kayafwa, na Yohana, na Alechitsanda, na vanji wovavaga lukolo na muvina va vatawula nambiko. 7 Hovavaga kuvavika halutalo Petulo na Yohana, vakavaputsaje kuta, "Henye mudisile lulongwa luno kwa wuvetso wachi na kwa mamulaka ga nani?"

8 Baho Petulo kwa wuvetso wa Muhe va Mulungu akavalonjelaje kuta henye filongotsi na vavina va Vayawudi, 9 manyi munyiguno mutuputse kwasawuli ya lulongwa lunofu lo aditilwe munu yula chiteve na hila fyo aponitswe, 10 henye na vanu veka va Isilaheli mun'ganika kutsela kuta, munu yuno yo imile halutalo henyu kuno mumi nachene, aponitswe kwa wuvetso na mamulaka ga Yesu Chilisito va ku Natsaleti, yo uyo henye mwamuvambite mu musalaba, lechelelo Mulungu akamutsilipulaje. 11 Uyu Yesu yo yula Mandiko ga Mulungu ganlonga kuta,

Liganga lya kutsenjela lyo mulilemile henye vatsentsi,

lelo liveye liganga likomi lyo lin'ganika kutsenjela mu musinji.

12 Yesu ng'ani yo afuluche avakuluse vanu, kwasawuli ku inyi tseka kuduhu litawa linji lyo tupelitwe lyo tufuluche tukuluswe kwa lilyo.

13 Vala vavina va libalatsa vakapomokaje ndalahela hovavaga kuwona wudadambafu wa Petulo na Yohana. Kwasawuli vavatselaga kuta vavaga vanu vagaya chisomo chochive, na ihyo vakatselaje kuta vanu iwo vavaga hamwe na Yesu. 14 Nawo hovavaga kumuwona chiteve yula yo aponitswe imile hala hamwe nawo, vakalemwaje kulonga lulongwa loluve lwa kuvabisila. 15 Ihyo vakavalonjelaje Petulo na Yohana vahume mu libalatsa, na vakasigalaje vene ili valongane valiyena. 16 Vakiputsaje, "Tuvadite chinu chachi vanu vano? Chila munu yo angikala Yelusalemu agutselite mutinuso guno mukomi go gudisilwe na vanu vano, na hetwe situfuluche tukane. 17 Lechelelo ili tuvetse kululemetsa lulongwa luno luleche kutagalila ndalahela hagati ha vanu, tuvang'anulile valeche kulonga na munu yoyuve kwa litawa lya Yesu."

18 Ihyo vala vavina va libalatsa vakavachemaje kaha Petulo na Yohana vinjile mugati, vakavang'anulilaje valeche kulonga kaha na kuvadahitsa vanu ndongwa tsa litawa ilyo lya Yesu. 19 Lechelelo Petulo na Yohana vakavapitulaje, "Mulamule henye, manyi mun'wona sava tudite kota fyo mun'gana henye awu tudite kota fyo an'gana Mulungu. 20 Lechelelo hetwe situfuluche tuleche kulonga ndongwa tsila tso tutsiwene na tso tutsihuliche." 21 Ihyo iwo vavina va libalatsa vakavang'anulilaje ndalahela, na hambele vakavalekaje vabite. Ila valemulwe kuvatova kwasawuli wogopaga, kwakuva vanu veka vamutsumitsaga Mulungu kwa chila chochavaga chihumye. 22 Munu uyo chiteve yo avaga aponitswe avaga na myaka jojilutye alubayini.

23 Luvala lula Petulo na Yohana hovavaga kulechelwa, vakawuyaje kwa vayawo na kuvalonjela ndongwa tseka tso valontsile vatawula nambiko vavina na vavina va Vayawudi. 24 Nawo vala vayawo hovavaga kuhulika ndongwa itso, vakakong'anaje hono hamwe na kumusuka Mulungu kuta heve Mutwa yo wawumbite kilanga na inyi, bahali na finu fyeka fyofili! 25 Heve yo walontsile kwa Muhe va Mulungu kwa kukolela kwa dada vetu Dawudi mutantsi vako kuta,

"mbe, kwasawuli ya chichi vanu va mu inyi vanvipa?

Natso kabila tsa vanu wosi Vayawudi kwasawuli yachi vanhotsa fibi?

26 Vantsajila va inyi vivisile chang'ani,

na vatavala vangitang'ana hono hamwe kwasawuli ya kusumwana na Mutwa Mulungu na Chilisito vako."

27 Tun'tsela wukweli kuta Helode na Pondiyo Pilato na vanu va Isilaheli na vanu wosi Vayawudi vavaga vakong'ine mu muji guno kwasawuli ya kusumwana na Mutantsi vako Muhagulwa Yesu yo wamuhagwe. 28 Vene vadisile ndongwa tsila tseka tso waganaga heve tsihumile luhuma katali kwa wuvetso wako. 29 Lechelelo bee Mutwa! Utsilave ng'abuso tsawo na ututanje hetwe vapogotsi vako kuvikula ndongwa tsako bila kuva na muloto. 30 Udite kwa wuvetso wako na uvaponetse vanu. Udite ndajilo na mitinuso kwa litawa lya Yesu Mutantsi vako Muhagulwa. 31 Hovavaga kusinda kumusuka Mulungu, hono hala hovavaga vakong'ine hakatigaswaje. Vanu veka vakapelwaje wuvetso na Muhe va Mulungu, na vakavikulaje ndongwa tsa Mulungu bila muloto.

32 Vala veka wovamutumbye Chilisito vavaga na wo vamwe na mahotso gogamwe. Sikwavaga na munu yoyuve yo alongaga kuta chinu chochive cho anacho chake mwene ng'ani, lechelelo vitangaga chila chinu cho vavaga nacho. 33 Vatumi vandelye kulonga ndongwa tsa wutsilipuko wa Mutwa Yesu kwa wuvetso wa Mulungu, na lusungu lwa Mulungu lwavaga hamwe nawo veka. 34 Nambe sikwavaga na munu yoyuve hagati hawo yo avaga mugayu, kwasawuli vanu veka wo vavaga na ntsuga awu nyumba vafigutsaga, na kuleta magobole ga finu fyo vagutsitse, 35 na kusindika kwa vatumi, nawo vatumi vakamugavilaje chila munu kota hila fyo an'gaya. 36 Ihyo kwavaga na munu yumwe va kabila ya Lavi yo alelechilye ku muji gwa Chipulo litawa lyake Yusufu, vatumi vamuchemaga litawa linji Balinaba chinya kutijila kuta, Munu va kuhongetsa, 37 mwene nayo agutsitse mugunda gwake, akaletaje igo magobole go apasile na kuvapela vatumi.