1 Hoyavaga kufika siku ya liwungo lya *Pendekosite vanu wo vamutumbye Chilisito vavaga vakong'ine hono hamwe. 2 Luvala lulo kukahumilaje chibumo kuhuma Kilanga cho chavaga kota ng'ala ngomi, chikayimemyaje nyumba yeka mo vavaga vichite. 3 Kaha fikahumilaje finu fyo fyawonekaga kota filapi fya moto, fikagavikaje na kuva mwilanga mwa chila munu. 4 Vanu veka vakapelwaje wuvetso na Muhe va Mulungu, na kwantsa kulonga kwa kabila tsinji, kota Muhe va Mulungu fyo avatantsile. 5 Kuko ku Yelusalemu kwavaga na Vayawudi wo vavaga van'dita kota fyo an'gana Mulungu, wo vavaga vahumye ku chila inyi. 6 Hovavaga kuhulika chibumo icho, lilugu lya vanu likakong'asikaje hono hamwe, nawo vakatinukaje kwasawuli chila munu akavahulikaje vanu vala wo vamutumbye Chilisito vanlonga kwa kabila yake mwene. 7 Veka vakapomokaje na vakilonjelaje, "Mbe, vanu vano veka wo vanlonga si vanya kaye va ku Galilaya nda? 8 Yiveye ndawuli lelo chila yumwe vetu anguvahulika vanlonga kwa ndonga yetu? 9 Tuvamwinga tuli vanu va kuhuma ku inyi ya Pati, na ku Medi, na va ku inyi ya Elamu, na vamwinga vanyakaye va ku Misopotamiya, na ku Yudeya, na ku Kapadochiya, na ku Pondo na ku Asiya. 10 Na vamwe va kuhuma ku Filijiya, na ku Pamufiliya, na ku Misili, na lubali lwa ku Libiya habehi na Kwilene na vamwe vajentsi va kuhuma ku Lumi, 11 na vanji hetwe tuli Vayawudi vanya kaye, na vamwinga wosi Vayawudi wo vangumuhulikitsa Mulungu kota Vayawudi na vanji vahumye ku Chilete hono hohapilimwe na malenga na vanji va ku Alabiya. Hetwe tweka tunguvahulika vanu vano vanlonga ndongwa ngomi tsa mutinuso tso adisile Mulungu kwa kabila tsetu." 12 Vanu veka vakapomokaje na kususutala kuno vangiputsa kuta, "Ndongwa tsino tsina mana yachi?" 13 Lechelelo vamwinga vakavaditilaje mbedatsi kwa kulonga kuta, "Vanu vano vagatsile difwayi ntsipya!"

14 Ihyo Petulo akimaje halutalo ha vala vatumi vayage kumi na yumwe na akantsaje kuvavikulila kwa kuvalonjela kuta, "Nye Vayawudi na henye nyeka yo vanyakaye va Yelusalemu, munyulikitse finofu ndongwa tsino tso ntsinguvavikulila." 15 Petulo akavalonjelaje kuta vanu vano sivagatsile kota fyo munhotsa henye, kwasawuli sambi hano satatu hamilawu hela! 16 Lechelelo lulongwa luno lo lula lo alontsile Yoweli muloli va Mulungu kuta,

17 "Mulungu anlonga kuta, na siku tsa wudugo

vanu veka nguvapela Muhe vangu.

Vana venyu vahintsa vakulagula,

na vakwamitsi venyu vakulola nduntsuchilo,

na vavina venyu vakuvila mbilo.

18 Nachene! Nawo vatantsi vangu valume na vadala,

nawo mu siku tsila nguvapela Muhe vangu nawo vakulagula ndongwa tsangu.

19 Heni ngulajila mitinuso kuchanya na kulajila ndajilo hasi mu inyi, danda na moto na lisosi lisito fikuhumila Kilanga,

20 litsuva likugubikwa na jitsa na

mwetsi gukuva mudung'u kota danda, hoyikuva ying'acha kutsa siku yila ngomi na yinya wuvina wa Mutwa.

21 Lechelelo chila munu yo akusuka kwa litawa lya Mutwa akukuluswa."

22 Petulo akendelelaje kuvalonjela kuta henye vanu va Isilaheli munyulikitse cho ntsinlonga! Yesu va Natsaleti avaga munu yo agubulwe kwenyu na Mulungu kwa katsi tsa miwujitsa, na mitinuso na ndajilo tso adisile hagati henyu kwa wuvetso wake, kota henye fyo mun'tsela. 23 Mulungu mwene fyo aganaga kudita luhuma katali kumutawula Yesu kwa henye, na henye mukamukopolaje kwa kuvakoka vawumiyani ili vamuvambe mu musalaba. 24 Lechelelo Mulungu amutsilipwe na kumukulusa mu wusungu wa chifo, kwasawuli siyikakuva lulongwa lupefu mwene Yesu asumwe na wusungu wa chifo. 25 Kwasawuli muntsajila Dawudi alontsile ndongwa tsa Yesu kuta,

"Ntsamuwene Mutwa avaga halutalo hangu siku tseka.

Kwasawuli ali habehi na heni, singogopa ndaya.

26 Kwasawuli iyo numbula yangu yina wusangalolo,

kaha ntsintova lugulugulu kwa wusangalo.

Na heni ngikala kwa lihuvilo nachene,

27 Kwasawuli iyo heve Mulungu si ufuluche undeche ku inyi ya vanu wo vafweye,

na kaha si ukumuleka muhagulwa vako muwuya awolele mukabuli.

28 Undaje ng'asi yo yim'bita ku wumi,

Ukumemetsa wusangalo kwasawuli heve ukuva hamwe na heni."

29 Vang'olotsangu Vaisilaheli, ntsin'gana ntsivalonjele bila kuvafiha kuta kwasawuli ya ndongwa tso tsamupasile kuku vetu Dawudi, mwene afweye na akatsikwaje, na kabuli yake yili bahanago hetu mbaka sambi. 30 Kwasawuli Dawudi avaga muloli va Mulungu, atselaga hila Mulungu fyo ali amulonje kuta, yumwe va chilelo chake akumuvika mu wuntsajila kota Dawudi. 31 Dawudi alongwe kutsiwona ndongwa tsino, akalongaje ndongwa tso tsikumuhumila Chilisito kuta,

"Akumutsilipulaje kuhuma

kwa vanu wo vafweye, nambe muvili gwake sigwawotsile."

32 Ihyo Mulungu amutsilipwe uyo Yesu na hetwe tweka wo tunlonga ndongwa tso twahuliche na kutsiwona kuhuma kwake. 33 Yesu hoavaga kutsumitswa na Mulungu, akanuchilaje Muhe va Mulungu kuhuma kwa Dada vake yo avaga atulonje, ili atavale hamwe nayo, nayo yo atupelye uyo Muhe. Icho cho munguchiwona na kuchihulika sambi. 34 Dawudi mwene si avaga achipulwe kubita Kilanga, lechelelo alontsile kaha,

Mutwa Mulungu amulonje Mutwa vangu kuta,

utavale hamwe na heni,

35 mbaka hala ho nguvadita uvalongotse vatelani vako.

36 Ihyo vanu veka va Isilaheli vatsele nachene kuta uyo yo Yesu yo mwamuvambite mu musalaba, yo yuyo Mulungu amudisile ave Mutwa na Mukulusi.

37 Vanu iwo hovavaga kuhulika ihyo, vakahigwaje mu numbula tsawo na kumuputsa Petulo na vala vatumi vayage kuta, "Vang'olotsetu lelo tudite ndawuli?" 38 Petulo akavajibulaje, "Mwihale na kutsileka ndongwa tsenyu ntsibi na chila munu abatitswe kwa litawa lya Yesu Chilisito ili muhulumilwe ndongwa tsenyu ntsibi, na kwanuchila Muhe va Mulungu yo yuyo Mulungu alontsile kuta akuvapela. 39 Kwasawuli chila cho avaga alontsile kuta akuvapela, alontsile kwasawuli ya henye, na vana venyu, na kwa veka wovali kutali, na kwa chila munu yo akuchemwa na Mutwa Mulungu vetu." 40 Petulo akavalonjelaje na kuvafunda vanu kwa ndongwa ntsolofu kwa kuvagongola kuta, "Mwidichile kukuluswa kuhuma mu chilelo chino chinya ndongwa ntsibi." 41 Siku yila vanu wolofu vakatsidichilaje ndongwa tso alongaga, vakabatitswaje na siku yiyila vakongetsekaje vanu kota elufu tsidatu. 42 Vanu veka iwo vakendelelaje mu madahitso ga vatumi, na muwuhantso, na kulya hamwe na kitanga mukate gwa Mutwa, na mu suko.

43 Vatumi vaditaga miwujitsa na ndajilo ntsolofu, kwasawuli iyo chila munu akamwogopaje Mulungu. 44 Vanu veka vanya litumbilo vakendelelaje kuva chinu chimwe na kigavila finu fyawo. 45 Vagutsaga mali tsawo na finu fyawo fyo vavaga nafyo, na kugavana magobole chila munu kota fyo an'ganika kugavilwa. 46 Siku tseka kwa numbula yimwe vitang'anaga ha Nyumba ya Mulungu na kulya mukate kuhuma nyumba yimwe mbaka yinji, nawo valyaga chilyo chawo kwa wusangalo. 47 Nawo vamutsumitsaga Mulungu, na kuvagan'ya vanu veka. Siku tseka Mutwa akavalutitsaje vanu wo vamutumbaga Chilisito, kwa vala wo vavaga vankuluswa.