1 Siku yimwe satisa ya mumihe, Petulo na Yohana vavaga vam'bita kusala ha Nyumba ya Mulungu. 2 Ihyo kwavaga na munu yumwe yo avaga chiteve luhuma kuleleka kwake. Munu uyo ategulwaga na vanu chila siku, na vamuvikaga ha lwitsi lwa Nyumba ya Mulungu lo lwachemwaga, "Lwitsi Lunofu," ili asuche magobole kwa vanu wo vinjilaga ha Nyumba ya Mulungu. 3 Munu uyo ho avaga kuvawona Petulo na Yohana vankwinjila ha Nyumba ya Mulungu, akavasukaje vamupele magobole. 4 Petulo na Yohana vakamukangatsilaje miho, nayo Petulo akamulonjelaje "Utulave hetwe!" 5 Mwene yula chiteve akavapituchilaje kuno ana luhuvi lwa kupata chinu chochive kuhuma kwawo. 6 Kahi Petulo akamulonjelaje, "Heni ntsilihela magobole, lechelelo chila cho ntsinacho ngukupela. Kwa Litawa lya Yesu Chilisito va ku Natsaleti, wime na ujende!" 7 Petulo akamubataje liwoko lililo na kumwinula, luvala lulo fikasa fyake na mafugamilo gake gakapataje ludali. 8 Akadibukaje na kwima kwa magulu gake na kwantsa kujenda. Kahi akinjilaje hamwe na Petulo na Yohana ha Nyumba ya Mulungu, kuno an'jenda na kudibukadibuka na kumutsumitsa Mulungu. 9 Vanu veka wo vavaga hono hala vakamuwonaje fyo an'jenda na kumutsumitsa Mulungu. 10 Nawo vakatselaje kuta yo yula yo avaga angikala hivala ha Nyumba ya Mulungu ha lwitsi lo lwachemwaga, "Lwitsi Lunofu," kuno ansuka finu, nawo vakapomokaje na kiwutsa kuta luveye ndawuli lulongwa luno.

11 Munu yula yo aponitswe avaga hamwe na Petulo na Yohana, vanu veka vakapomokaje ndalahela, vakatsaje luvilo hala ha lidama lya Selemani. 12 Petulo hoavaga kuvawona vanu iwo vakong'ine akavalonjelaje, "Henye vanu va Isilaheli, kwasawuli ya chichi mungulupomochela lulongwa luno? Mbona mungutukangatsila miho kota hila hetwe yo tumudisile munu yuno ajende kwa wuvetso wetu awu kwasawuli ya wuwuya wetu kwa Mulungu? 13 Mulungu yo afugamilwaga vadada vetu Ibulahimu, na Yisaka, na Yakobo, amutsumitse Yesu Mutantsi vake. Henye mwamutawe Yesu kwa vanya mamulaka ili ahigwe kukopolwa na mukamukanaje halutalo ha Pilato, na yivaje mwene Pilato avaga alamwe kumuleketsa ibitile. 14 Yesu avaga Muhagulwa va Mulungu na Muwuya, lechelelo henye mwamulemile na mukasukaje mupelwe yula munu muwumiyani. 15 Ihyo mukamukopolaje yula yo mwantso gwa wumi, lechelelo Mulungu akamutsilipulaje. Hetwe yo twatsiwene na kutsilonga ndongwa tsino. 16 Ino lelo mutselaje kuta munu yuno yo mungumuwona na kumutsela apasile ludali kwa litumbilo mu Litawa lya Yesu. Uyo Yesu amuponitse nachene munu yuno kwa kumutumbila Yesu kota henye fyo mungumuwona sambi."

17 Inolelo vang'olotsangu, ntsin'tsela kuta henye mwadisile ihyo bila kutsela kota hila fyo vadisile vavina venyu. 18 Lechelelo hohihyo Mulungu akwitsitse ndongwa tsila tseka tso avaga alontsile katali kukolela kwa valoli vake veka, kuta yaganikaga Chilisito vake akodeche. 19 Ino lelo mwihale na kutsileka ndongwa tsenyu ntsibi na kumupituchila Mulungu, nayo akuvahulumila ndongwa tsenyu ntsibi. 20 Mudite ihyo ili Mutwa avapele wusichimafu mu numbula tsenyu, nayo Mutwa Mulungu akumutuma Yesu Chilisito yo amuhagwe kwasawuli yenyu. 21 Yesu yo aganikaga ikale Kilanga kwa Mulungu mbaka ho lukutsa luvala lupya lwa kufidita finofu finu fyeka, kota Mulungu fyo alontsile luhuma katali kukolela kwa valoli vake vahagulwa. 22 Hihilaga nayo Musa avaga alontsile kuta, "Mutwa Mulungu venyu akuvahagulila muloli kota fyo ntsili heni kuhuma hagati ha vang'olotsenyu. Na henye mun'ganika mumuhulikitse mwene kwa chila lulongwa lo akuvalonjela. 23 Nayo munu yoyuve yo akulema kumuhulikitsa muloli uyo, akubagulwa na vanu va Mulungu na kukopolwa. 24 Enaa! Valoli veka va Mulungu kwantsila kwa Samweli na vala veka wo vatsitse hambele hake, vatsivikwe ndongwa tsino tseka tso tsinhumila siku tsino. 25 Henye yo vala Mulungu alontsile kukolela kwa valoli vake mu lilagano lila lyo adisile na vakukwenyu, hala ho amulonje Ibulahimu kuta kukolela mu chilelo chako vanu veka va mu inyi vakutambichilwa. 26 Ihyo Mulungu hoavaga kumutsilipula Yesu Mutantsi vake, alongwe kumutuma kwa henye tandi, ili avatambichile na kumupitula chila yumwe venyu atsileche ndongwa tsake ntsibi."