1 Muvina Tiyofilo! Mu chitabu changu chilongola ntsakwandichilye, ndongwa tseka tso antsitse Yesu kudita na kudahitsa kuhuma iho hamutalo ha katsi yake, 2 mbaka siku yila ho avaga kuchipulwa kubita kilanga kwa Mulungu. Hoavaga ang'acha kuchipulwa kubita kilanga, Yesu avapelye malajitso kukolela kwa Muhe va Mulungu vala vatumi wo avahagwe. 3 Siku alubayini luhuma ha ng'odeko na chifo chake, avahumye vadahitswa vake mala ntsongofu na kuvalonjela ndongwa tsa wuntsajila wa Mulungu, na kwa kudita ihyo avalaje nachene kuta mwene atsilipuche. 4 Luvala lumwe hoavaga kitang'ana nawo akavalajitsaje kuta, "Mwalahogola kuwuka ku Yelusalemu, lechelelo mutsindile wulaho wo avalonje Dada kuta akuvapela chila cho mwahuliche kuhuma kwa heni. 5 Yohana avabatitse kwa malenga, lechelelo kwa siku tsino tsa habehi mukubatitswa kwa Muhe va Mulungu."

6 Ihyo vatumi hovavaga vakong'ine hamwe vakamuputsaje Yesu kuta, "Mutwa mbe, uluno lo luvala lwa kuvapilulila Vaisilaheli wuntsajila?" 7 Yesu akavalonjelaje, "Dada ng'ani yo an'tsela luvala na fipindi fyo afivisile mwene, siyo katsi yenyu kutsela. 8 Lechelelo hoakuva atsitse Muhe va Mulungu mwilanga mwenyu mukwanuchila wuvetso, na henye mukuva vanu wo mwahuliche na kulonga ndongwa tsangu kwantsila ku Yelusalemu, na ku Wuyawudi, na ku Samaliya, na ku inyi tseka." 9 Yesu hoavaga kusinda kulonga ndongwa itso, akachipulwaje kilanga kuno vangumulola, akagubikwaje na lifuluka nawo siva kamuwene kaha. 10 Hovavaga vang'acha vapomwichwe kulava Kilanga kwa Mulungu, Yesu ho avaga am'bita Kilanga, simusika vakahumilaje valume vavili wovafwite myenda myelu vakimaje habehi nawo, 11 Vakalongaje, "Henye vanu va ku Galilaya, mbona mwimile munlola kuchanya kumafuluka? Uyuno Yesu yo ategulwe kuhuma kwenyu kubita Kilanga kwa Mulungu, akutsa hihyo kota fyo mumuwene am'bita Kilanga."

12 Ihyo vatumi vakawuyaje ku Yelusalemu kuhuma ku chila Chidunda cha Mitseyituni cho chavaga habehi na Yelusalemu, kota lujendo lwa chilomita yimwe kuhuma ku muji gwa Yelusalemu. 13 Vala vatumi hovavaga kufika ku mujini vakinjilaje mu chumba cha mwilanga chovikalaga, vatumi ivo vavaga Petulo, na Yohana, na Yakobo, na Andeleya, na Fwilipi, na Tomasi, na Batulomayo, na Matayo, na Yakobo mwana va Alufwayo, Simoni yo atovanilaga inyi yake, na Yuda mwana va Yakobo. 14 Vanu iwo veka vavaga vankong'ana hamwe kumusuka Mulungu, vavaga hamwe na Maliyamu yuve va Yesu na vadala vatunga na vadodove va Yesu. 15 Siku tsila vanu wo vavaga vamutumbye Chilisito vavaga kota miya na isilini, Petulo akimaje hagati hawo akalongaje kuta, 16 "Henye vang'olotsangu, yiganikije Mandiko ga Mulungu gakwile gala go alontsile Muhe va Mulungu kukolela kwa Dawudi, kwa ndongwa tsa Yuda yo avalongwitse vala vanu vamubate Yesu. 17 Yuda avaga muyetu, kwasawuli na mwene avaga ahagulwe ave muyetu mu katsi yino ya wutumi." 18 Yuda avaga agutsile mugunda kwa magobole gala go avaga ahombitwe kwa kumupituka Yesu, hoavaga kumugunda akagwaje hasi akatulikaje lileme na lutumbu lwake lweka lukahumaje kivala. 19 Lulongwa ulo lukatagalilaje kwa vanu veka wo vikalaga ku Yelusalemu, ihyo hono hala vakahatambulilaje litawa "Achedama" chinya kutijila, "Mugunda gwa Danda."

20 Petulo akawilaje kulonga, "Hihilaga yandikwe mu chitabu cha Tsabuli kuta,

Hawukalo wake havaje mahame,

na kaha halekaje kuva na munu va kikala hono iho na kaha yandikwe kuta,

munu yunji ahategule hono hake ha wutantsi."

21 Ihyo tun'ganika tumuhagule munu yunji kuhuma hagati ha valume vala wo vavaga hamwe na hetwe luvala lweka, hala Mutwa Yesu hoavaga an'jendasa hamwe na hetwe, 22 ili alonje ndongwa tso atsiwene na kutsihulika kuhuma siku yila Yohana ho amubatitse Yesu, mbaka siku yila Yesu ho atsilipulwe kuhuma kwetu kubita Kilanga. 23 Ihyo vakahagulaje matawa ga vanu vavili, mulongola Josefu yo achemwaga Balisaba litawa linji Yusiti, na va kavili achemwaga Matyasi. 24 Kaha vakamusukaje Mulungu vakalongaje hino, "Heve Mutwa, yo utsitsele numbula tsa vanu veka, utulajile hagati ha vanu vano vavili nani yo umuhagwe, 25 ili ategule katsi ya wutumi yo ayilesile Yuda na kubita hono ho ahahagwe mwene." 26 Ihyo vakavatovelaje simbi ili vamuhagule, na wuhagulo wukamugwilaje Matyasi, uyo akavalilwaje ave hamwe na vala vatumi kumi na yumwe.