1 Luvala lulula Sawuli avaga ankwendelela kulutitsa ng'abuso tsa kuvakopola vadahitswa va Mutwa, akabitaje kwa muvina va vatawula nambiko, 2 nayo akamusukaje muvina va vatawula nambiko amupele baluva tsa kumutambutsa ku nyumba tsa kitang'anila Vayawudi tso tsili ku muji gwa Damesichi, ili manyi amufiche munu yoyuve ave mulume awu mudala yo amutumbye Chilisito, amubate na kumuleta ku Yelusalemu. 3 Lechelelo Sawuli hoavaga ang'acha mulujendo akavaje habehi na kufika ku Damesichi, simusika lukahumilaje lwenje kuhuma kilanga lukamwangatsilaje mbali tseka. 4 Akagwaje hasi na kuhulika litsi, "Sawuli, Sawuli, mbona ung'oda?" 5 Sawuli akamupitulaje, "Heve uli nani, Mutwa?" Nayo akamujibulaje, "Heni yo Yesu yo ung'oda." 6 Ihyo lelo wime, winjile ku mujini, na heve ukulonjelwa cho un'ganika kudita. 7 Vanu wo vavaga hamwe na Sawuli mulujendo, vakimaje myee, vangulihulika litsi, na kuno nambe vamuwone munu yo alongaga. 8 Sawuli akinukaje, na hoavaga kujela kulola, akalemwaje. Ihyo vayage vakamubatilitsaje liwoko na vakamulongotsaje mbaka ku Damesichi. 9 Sawuli akavaje chibofu na kaha sialyeye nambe kung'wa chinu chochive kwa siku tsidatu.

10 Kuko ku Damesichi kwavaga na mufwasi va Yesu litawa lyake Hananiya. Mutwa akamulonjelaje kukolela mu nduntsuchilo, "Hananiya!" Nayo akamupitulaje,

"Yoo, Mutwa!"

11 Mutwa akamulonjelaje kuta, "Ubite ku ng'asi yo yinchemwa ngolofu, ukaputse mu nyumba ya Yuda munu va kuhuma ku Taliso yo anchemwa Sawuli, kwasawuli sambi hano ansuka, 12 na mu nduntsuchilo amuwene munu yo anchemwa Hananiya, ankwinjila mugati na kumuvichila mawoko mwilanga mwake ili avetse kulola kaha."

13 Lechelelo Hananiya akamupitulaje, "Mutwa, nyuliche ndongwa tsa munu uyo kuhuma kwa vanu wolofu, hila fyo avaditye finu fibi vanu wo vakutumbye wo vali ku Yelusalemu. 14 Nayo atsitse hano Damesichi kuno ana mamulaka kuhuma kwa vatawula nambiko vavina, ili avabate veka wo vakutumbye heve."

15 Lechelelo Mutwa akamulonjelaje Hananiya, "Ubite hela! Kwasawuli ntsimuhagwe ave mutantsi vangu ili avikule ndongwa tsangu kwa vanu wosi Vayawudi, na kwa vantsajila na kwa vanu va Isilaheli. 16 Heni ngumulajila ndongwa ntsolofu hila fyo akuganika akodeche kwasawuli ya heni."

17 Ihyo Hananiya akabitaje na kwinjila mu nyumba yila na akamusuchilaje kwa kumuvichila mawoko Sawuli na kumulonjela, "Mung'olotsangu Sawuli, Mutwa Yesu yo akuhumye ku ng'asi anumile kwa heve ili uvetse kulola kaha na kulongotswa na wuvetso na Muhe va Mulungu." 18 Luvala lulo finu fyo finakota fibadu fikagwaje kuhuma mu miho ga Sawuli, akavetsaje kulola kaha. Ihyo akimaje na kubatitswa. 19 Sawuli hoavaga kulya, akapataje ludali kaha.

20 Luvala lulo Sawuli akantsaje kuvikula mu nyumba tsa kitang'anila Vayawudi kuta, "Yesu yo Mwana va Mulungu."

21 Vanu veka wo vamuhuliche Sawuli vakalemwaje kutsela na vakalongaje, "Mbe, munu yuno si yoyuyulaga yo avakopwe vanu vala wo vangumutumba Chilisito kula ku Yelusalemu? Nambe kutsa kwake hano aganaga kuvabata vanu iwo na kuvasindika kwa vatawula nambiko!"

22 Sawuli akalutilaje kuva na wuvetso wa kuvikula, na hila fyo avalajilaga vanu kuta Yesu yo Chilisito. Nawo Vayawudi wo vikalaga ku Damesichi vakatifikaje.

23 Hotsavaga kulutila siku ntsolofu, Vayawudi vakakong'anaje na kulagana vamukopole, 24 Sawuli akalutselaje lulongwa ulo. Nawo Vayawudi hamunyi na hachilo vavaga vankwimilila mu ntsitsi tseka tsa muji ili vamukopole. 25 Lechelelo hachilo vadahitswa vake Sawuli vakamutegulaje na kumuvika mu litangula likomi na kumwisa mu lukantsi lwa muji gula.

26 Sawuli hoavaga kufika ku Yelusalemu akajelaje kihantsa na vala vadahitswa va Yesu. Lechelelo vadahitswa veka vakamwogopaje, kwasawuli sivamutumbye kuta kweli mwene nayo aveye mudahitswa. 27 Hambele Balinaba akatsaje na kumutegula Sawuli, nayo akamusindikaje kwa vatumi na kuvalonjela hila Sawuli fyo amuwene Mutwa hoavaga mung'asi, na hila Mutwa fyo alontsile nayo na Sawuli fyo avikwe kwa mamulaka ndongwa tsa Yesu kula ku Damesichi. 28 Ihyo Sawuli akikalaje hamwe nawo na kujenda chila hono uko ku Yelusalemu, avikulaga ndongwa tsa Mulungu bila kuva na muloto. 29 Kahi alonganaga na kusumana na Vayawudi wo valongaga Chijilichi, lechelelo vene vajelaga kumukopola. 30 Hala vala wo vamutumbye Chilisito hovavaga kulutsela lulongwa ulo, vakamusindikitsaje Sawuli mbaka ku Kayisaliya, nayo Sawuli akabitaje ku muji gwa Taliso.

31 Ihyo vanu wo vamutumbye Chilisito va ku Yudeya yeka, na va ku Galilaya na va ku Samaliya vakikalaje kwa wusichimafu. Vakapataje wukangatso na wuhongetso wa Muhe va Mulungu, vala wo vamutumbaga Mulungu vakongetsekaje na kwendelela kudita kota fyo an'gana.

32 Petulo hoavaga an'jendajenda kubita chila hono, akabitaje kuvajendela vanu wo vaditaga kota fyo an'gana Mulungu wo vikalaga ku muji gwa Lida. 33 Kuko akamuwonaje munu yumwe yo achemwaga Ayineya, yo atamikaga namwa ya kupola kwa myaka nane, avaga avasise mulusaga. 34 Ihyo Petulo akamulonjelaje, "Ayineya, Yesu Chilisito akuponitse. Winuche upetase lusaga lwako." Luvala lulo Ayineya akinukaje. 35 Vanu veka wo vikalaga ku muji gwa Lida na livindi lya Saloni hovavaga kumuwona Ayineya an'jenda vakamutumbaje Mutwa.

36 Kuko ku muji gwa Yafwa kwavaga na mudahitswa yumwe litawa lyake Tabita, na kwa Chijilichi achemwaga Dolikasi lyo lina mana ya ntsolimba. Mudala uyo avaga mulibulitsi na muwuya ndalahela, avatangaga vanu kwa sadaka tso atawulaga. 37 Luvala ulo akatamikaje na kufwa, hovavaga kuguhofuga muvili gwake, vakaguvikaje mu chumba cha ku golofwa. 38 Ugo muji gwa Yafwa sigwavaga kutali na muji gwa Lida, nawo vadahitswa vavaga kuhulika kuta Petulo ali kuko vakavatumaje vanu vavili vabite vakamucheme, nawo hovavaga kufika vakamugongolaje na kumulonjela kuta, "Ulekaje kuhava kutsa kwetu." 39 Petulo akawukaje na kubitasa nawo, nayo ho avaga kufika vakamusindikaje mbaka ku chumba cho chili ku golofwa ko vavaga vagulambaliche muvili gwa Dolikasi. Vafwile wolofu vavembaga na kumulajila myenda na makoti gala go ahonaga Dolikasi hoavaga ang'acha mumi. 40 Petulo akavahumyaje kivala vanu veka, na kumusuka Mulungu kuno imile habehi na muvili akalongaje, "Tabita, lamuche." Tabita akagubulaje miho gake na hoavaga kumuwona Petulo, akinukaje na kikalisa. 41 Petulo akamutangaje kwima, hambele akavachemaje vala vanu vahagulwa na vala vafwile akamukabitsaje kwawo kuno ali mumi. 42 Ndongwa itso tsikatagalilaje chila hono mu muji gwa Yafwa, na vanu wolofu vakamutumbaje Mutwa. 43 Petulo akikalaje Yafwa kwa siku ntsolofu, na ikalaga hamwe na Simoni muwuyapi va finu fya nyingo.