1 Hala Apolo hoavaga ku Kolindo, Pawulo akalutilaje ha miji ja mufidunda na kufika ku muji gwa Efweso. Kuko akavafikaje vadahitswa vatunga, 2 akavaputsaje, "Mbe, henye homwavaga kumutumba Yesu, mwamwanuche Muhe va Mulungu?" Vene vakamupitulaje, "Ndaya, tung'ali nambe kuhulika hela kuta kwave na Muhe va Mulungu." 3 Nayo Pawulo akavaputsaje, "Mbe, mwabatitswe kwa wubatitso wachi?" Vakamupitulaje, "Twabatitswe kwa wubatitso wa Yohana." 4 Pawulo akalongaje, "Wubatitso wa Yohana wavaga wa kulajila kuta vanu vamupituchilye Mulungu na kuleka ndongwa tsawo ntsibi na kuvalonjela vanu va Isilaheli vamutumbe mwene yo akutsa halutalo hake, nayo yo Yesu." 5 Hovavaga kuhulika ihyo, vakabatitswaje kwa litawa lya Mutwa Yesu. 6 Ihyo Pawulo akavavichilaje mawoko, nawo vakalongotswaje na Muhe va Mulungu na kwantsa kulonga kwa kabila tsinji na kuvikula ndongwa tsa Mulungu. 7 Vanu veka iwo vavaga valume kota kumi na vavili hino.

8 Chipindi cha myetsi jidatu Pawulo abitaga mu nyumba ya kitang'anila Vayawudi, na kuvadahitsa vanu bila moloto, alonganaga nawo na kuvakwega mu ndongwa tsa wuntsajila wa Mulungu. 9 Lechelelo vamwinga vakalemaje kutumba Mutwa Yesu, vakantsaje kumuliga Mutwa Yesu. Ihyo Pawulo akavabagulaje vala wovavaga vadahitswa, nayo akavaje anlongana nawo chila siku mu wukumbi wa munu yumwe litawa lyake Tilano. 10 Pawulo endelye kudita ihyo kwa luvala lwa myaka jivili, mbaka Vayawudi na wosi Vayawudi wovikalaga ku Asiya vakavaje vahuliche ndongwa tsa Mutwa.

11 Mulungu adisile miwujitsa mikomi kukolela kwa Pawulo. 12 Vanu vatamwa vatolaga nambe fitambala awu myenda ja mu muvili gwa Pawulo, vakaponaje namwa tsawo na misoka jikavalechelaje. 13 Vayawudi vamwe wo vajendaga jendaga kwa katsi tsa kuhetsa misoka kwa wuganga, vakajelaje kujihetsa misoka kwa vanu kwa litawa lya Mutwa Yesu, vakalongaje hino, tunguvang'anulila mumuhume kwa litawa lya Yesu yula yo anvikulwa na Pawulo. 14 Vanu wo vadisile ihyo vavaga vana saba vakwamitsi va munu yumwe Muyawudi yo achemwaga Sicheva, yo avaga chilongotsi va vatawula nambiko. 15 Lechelelo lila lisoka likavajibulaje, "Yesu ntsimutsele na Pawulo ntsimutsele, lelo henye muli vanani?" 16 Ihyo yula munu yo avaga na lisoka avaga na ludali, akavadibuchilaje veka akavatovaje na kuvasuma. Nawo vakabilimaje kuhuma mu nyumba yila kuno vali mwatsi na vatetsiche. 17 Lulongwa ulo lolwahumye uko ku Efweso lukahulikwaje na Vayawudi veka na wosi Vayawudi, vakinjilwaje na muhwehwe nalyo litawa lya Mutwa Yesu likahesimilwaje ndalahela. 18 Vanu vala veka wovavaga mwanga vamutumbye Chilisito vakatsaje na kihala halutalo ha vanu ndongwa tsawo tseka ntsibi tso vavaga vadisile. 19 Kaha na vanu wolofu wovaditaga ndongwa tsa wuhavi iho hamutalo, vakafitegulaje fitabu fyawo fya wuhavi vakafinyanyaje mu moto halutalo ha vanu. Hovavaga kuvalila galama tsa fitabu fyo finyanyilwe yavaga kota fipande hamusini elufu fya madini ga fwetsa. 20 Lulongwa ulo lukaditaje Ndongwa tsa Mutwa tsilutile kutagalila na kuva na wuvetso ndalahela.

21 Hotsavaga kulutila ndongwa itso tseka, Pawulo akalamulaje kubita ku Yelusalemu, akakolelaje ku Machedoniya na Akaya. Avaga kufika kuko akalongaje, "Hihilaga ntsin'ganika mbite kaha na ku Lumi nako." 22 Ihyo Pawulo akavatumaje vanu vavili wo vavaga vatantsi vake, Timoseyo na Elasito vamulongole kubita ku Machedoniya, lechelelo mwene akasigalaje kuko ku Asiya kwa luvala ludodo.

23 Luvala ulo kwahumye chitika chikomi kuko Efweso kwasawuli ya ndongwa tsa Mutwa. 24 Kwavaga na munu yumwe yo achemwaga Demetiliyo, yo avaga mupontsi va finu fya madini ga fetsa, na mugutsi va fisanamu fya tunyumba twa lilungu lyawo lidala lyo lyachemwaga Atemi, nayo munu uyo avaletelaga fwayida ngomi vapontsi vayage. 25 Demetiliyo akavachemelaje hono hamwe iwo vapontsi vayage wo vakolaga katsi kota yake na kuvalonjela, "Nyee vayangu, mun'tsela kuta wufuchifu wetu wuhumye mu katsi yino. 26 Lelo mufuluche muhuliche na kilolela vene ndongwa ntsila tso an'dita Pawulo si hano ha Efweso ng'ani ila mbaka ku Asiya yeka. Munu uyo anguvakoka na kuvakwega vanu wolofu na kuvapitula nyala tsawo nayo anlonga kuta ifi fyo tun'dita kwa mawoko getu siyo mihoka ndaya. 27 Ihyo katsi yetu yifuluche yibedalwe na yikulongwa fibi, nalo lulongwa ulo lukwambutsa finyumba fya lilungu lidala lya Atemi lyo livina lyo linfugamilwa ku Asiya yeka na ku inyi tseka likubedalwa. Siyo ihyo ng'ani, nawo wuvina wa lilungu lyetu wukuyaga." 28 Vapontsi iwo hovavaga kuhulika ndongwa itso vakavipaje ndalahela na kwantsa kuyova fikami, "Lihoka lya Atemi va Vaefweso lyo livina!" 29 Muji gweka gukavaje na chitika. Vanu wolofu vakakong'anaje na kuvabata Gayo na Alisitako wo vavaga vanyakaye va ku Machedoniya, wovali vajendise hamwe na Pawulo na vanu vakabitaje nawo luvilo kota munu yumwe hono ho vitang'anaga vanu va muji. 30 Nayo Pawulo aganaga injile hagati ya halilugu lya vanu, lechelelo vanu wo vamutumbye Yesu vakamulemetsaje aleche kwinjila. 31 Vavina vamwe va mukova gwa Asiya, wo vavaga vanu va habehi na Pawulo, vakavasukaje vanu vakamugongoletse Pawulo aleche kwinjila hono iho. 32 Nago mukong'ano gula gukavaje na chitika chikomi kwasawuli vanu wolofu sivakatselaga chambutso cha mukong'ano gula na luvala ulo chila munu akolaga chinya lwake, vamwe vakolaga hino na vanji vakolaga hila. 33 Vayawudi vakamusindikaje Alechitsanda kwalatsima halutalo ha lilugu lya vanu, nawo vanu vamwe vakamulonjelaje cho an'ganika kulonga. Nayo Alechitsanda akavakatukitsaje kwa kuhunga mawoko ili vanu vamuhulikitse fyo angiyamila. 34 Lechelelo vanu hovavaga kutsela kuta Alechitsanda nayo avaga Muyawudi, veka vakakolaje kwa litsi limwe kwa luvala kota lwa masala gavili kuta, "Atemi va Vaefweso yo muvina!"

35 Hambele muvina yumwe va muji akavetsaje kuvakatukitsa vanu. Akavalonjelaje, Nyee vanu va Efweso, munu vachi yo sinambe atsele kuta vanu veka va muji gwa Efweso wo vimilitsi va tunyumba twa lilungu lidala lya Atemi na yila sanamu yake yo yagweye kuhuma kilanga? 36 Kuduhu munu yoyuve yo afuluche akane ndongwa itso. Ihyo lelo mun'ganika mukatuche na muleche kudita chinu chochive kwa kusupanitsa hela. 37 Ino lelo muvaletite hano vanu vano wo sivamulitsile awu kuhitsa finu fya nyumba ya Atemi mulungu vetu mudala. 38 Manyi Demetiliyo na vapontsi vayage vana nongwa na munu yoyuve, balatsa tsa kuhijila hotsili na vahigaji hovali, nawo vafuluche vabite vakavahije kuko. 39 Lechelelo manyi henye munayo nongwa yinji yoyive yo an'gana kuleta, mulete ha libalatsa lyo lin'tselanika. 40 Manyi tuleche kiyangalila tufuluche tuhigwe kwasawuli ya chitika cho chihumye munyiguno. Chitika chino chilihela chambutso cha kweli na kwa chitika chino tulihela lulongwa lwa kiyamila ha mukong'ano guno. 41 Muvina yula va muji hoavaga kulonga ihyo, akavalonjelaje vanu wovali mu mukong'ano gula vawuche.