1 Chitika chila cha ku muji gwa Efweso ho chavaga kusila, Pawulo akavachemelaje hono hamwe vanu wo vamutumbye Chilisito na kuvakangatsa numbula tsawo, hambele akavalagaje na kwantsa lujendo lwa kubita ku Machedoniya. 2 Pawulo akakwetelaje mu mikova na kuvakangatsa numbula vanu wo vamutumbye Chilisito kwa ndongwa ntsolofu. Hambele akafikaje ku Wujilichi, 3 uko ichite kwa myetsi jidatu. Hoavaga angivika chang'ani kukwina meli na kwantsa lujendo lwa kuwuya ku Siliya, akatselaje kuta Vayawudi valagine kumuditila lulongwa lubi, ihyo akalamulaje kuwuya kwa kukolela ng'asi ya ku Machedoniya. 4 Pawulo avaga ajendise hamwe na Sopatulo mwana va Pilo va kuhuma ku Beloya. Kaha avaga ajendise na Alisitako na Sekundo munu va kuhuma ku Tesaloniche, na Gayo munu va ku Delibe, na Timoseyo hamwe na Tichiko na Tulofimo va kuhuma ku Asiya. 5 Vanu iwo vakatulongolaje na vakatutsindilaje ku Tulova. 6 Lechelelo ho lyavaga kulutila Liwungo lya Mikate jo Sijilasopwa Hamila, tukantsaje lujendo lwa siku tsihanu mu meli kuhuma ku Fwilipi. Tukafikaje ku Tulova na kihantsa na vayetu na tukikalaje uko kwa wichi yimwe.

7 Siku ndongola ya wichi, tukakong'anaje hohamwe ili tulye chilyo. Pawulo akendelelaje kudahitsa vanu mbaka hachilo nagati, kwasawuli avaga an'gana kuwuka hamilawu iyage. 8 Mu ligolofwa lila mo twavaga, kwavaga na koloboyi ntsolofu tso ntsinkwaka. 9 Mu lidilisa limwe lya chumba cho twavaga, kwali na mukwamitsi yumwe litawa lyake Awutiko na Pawulo hoavaga ankwendelela kudahitsa kwa luvala lutali, mukwamitsi uyo akasintsilaje na kugwa kuhuma ku ligolofwa lya kadatu mbaka hasi, hovavaga kubita kumwinula avaga mwanga afweye. 10 Pawulo akikaje hasi ha ligolofwa lila, akahonamaje na kumukumbanitsa mukwamitsi uyo na kulonga, "Muleche kuvemba munu yuno mumi." 11 Ihyo Pawulo akakwinaje kaha kugolofwa yila na kulya. Akadahitsaje kwa luvala lutali mbaka kunkwela na hambele akawukaje. 12 Vanu vakamupilulaje Awutiko kukaye kuno mumi na kusangalala ndalahela.

13 Hetwe tukalongolaje kukwina mu meli, tukajendaje mbaka hono hanchemwa Aso uko kotwataga kuta tukumutegula na Pawulo. Avaga atulonje tudite ihyo kwasawuli mwene abitaga uko kwa ligulu. 14 Pawulo hoavaga kutufika kuko Aso, akakwinaje mu meli tukajendasaje hamwe mbaka ku Mitulene. 15 Kuhuma uko tukajendaje, hamilawu iyage tukafikaje habehi na hono hakafu hohapilimwe na malenga ho hanchemwa Chiyo. Siku yinji tukalowokaje tukafikaje ha inyi ya Samo yo yili mubahali, na siku yinji tukafikaje hono hanchemwa Mileto. 16 Pawulo avaga alamwe kwendelela na lujendo kwa meli bila kukolela ku Efweso ili aleche kuhava ndalahela uko ku Asia, kwasawuli aganaga manyi akuvetsa afiche ku Yelusalemu siku ya liwungo lya Pendekosite.

17 Hotwavaga uko ku Mileto Pawulo akavatumilaje wujumbe vavina va chikundi cha vanya litumbilo lya Chilisito cha ku Efweso ili vitang'ane nayo. 18 Hovavaga kufika akavalonjelajekuta henye mun'tsela hila fyo ntsichite na henye siku tseka, kuhuma siku yila ndongola hontsafisile hano ha Asiya. 19 Mun'tsela hila fyo ntsamukolye katsi Mutwa kwa wudeche weka na kwa manyotsi, ntsikangatsaga mu ngudo na fikwatso fyo ntsapataga kwasawuli ya ndongwa ntsibi tso vanditye Vayawudi tsa kugana kung'opola. 20 Mun'tsela kuta ha malugu ga vanu na ha chila nyumba sintsalesile kuvavikulila vanu na kuvadahitsa chila chinu chochive cho ntsawene kuta chikuvafwaya. 21 Ntsavalonje vanu veka Vayawudi na wosi Vayawudi kuta van'ganika kumupituchila Mulungu kwa kutsileka ndongwa tsawo ntsibi na vamutumbe Mutwa vetu Yesu Chilisito. 22 Ino lelo ntsin'wuka kwa kulongotswa na Muhe va Mulungu kubita ku Yelusalemu, ila mu numbula yangu sinambe ntsele cho chikunyumila uko. 23 Ntsinguchitsela chinu chimwe hela, Muhe va Mulungu andonje kuta kuwopwa hamwe na ng'odeko fintsinda uko kontsim'bita. 24 Heni sinambe nyotse wumi wangu kuta wuli chinu, ila ntsinhotsa kusinda katsi ya kuvikula Ndongwa Nofu yo ntsanuchilye kwa Mutwa Yesu kwa wuwuya wake. 25 Heni ng'wetye kula na kuno kuvavikulila ndongwa tsa wuntsajila wa Mulungu, lechelelo luhuma sambi simufuluche mumbone kaha. 26 Ihyo munyiguno ntsinguvalonjela wukweli kuta manyi yumwe venyu yoyuve ayaje kwa kulileka litumbilo, heni ntsilimuduhu, 27 kwasawuli siku tseka ntsavalonje ndongwa tseka tso aganaga Mulungu. 28 Ihyo mwiyangalile muvene hamwe na chila chikundi cheka cha vanya litumbilo lya Chilisito na icho cho Muhe va Mulungu avavisile henye muchimilile. Muchidime chikundi icho cho akachigutsile Mulungu kwa nambiko ya chifo cha Mwanage. 29 Ntsin'tsela finofu kuta heni honguvambusile, vadahitsi va wudesi wo vanakota ngwami ng'ali vakutsa kwa henye, nawo sivakuva na lusungu na chikundi cha vanu wo vamutumbye Chilisito. 30 Kuhuma hagati henyu vakuhumila vanu wo vakulonga ndongwa tsa wudesi ili vavakwejele kwawo vanu vala wo vamutumbye Chilisito. 31 Ihyo mwiyangalilaje na mwiwukaje kuta kwa myaka jidatu hamunyi na hachilo ntsendelye kuvadahitsa chila munu kwa manyotsi.

32 Duve, lelo ntsinguvavika henye mu wimilitsi wa Mulungu na kwa lulongwa lwa wuwuya wa Mutwa, lo lufuluche luvakangatse na kuvapela henye chila cho alontsile Mulungu kuta akuvapela vanu vake wo avahagwe. 33 Heni sintsiviniwe magobole, wala madini ga tsahabu, wala myenda ja munu yoyuve. 34 Henye vene mun'tsela kuta ntsadisile katsi kwa mawoko gangu, ili ntsipatile cho ntsin'gana heni na vayangu wontsavaga nawo. 35 Siku tseka mbije ntsinguvalajila muhwano kuta kwa kukola katsi hino mun'ganika kuvatanga vanu wovalihela ludali. Mwiwukaje madahitso ga Mutwa vetu Yesu hila fyo ganlonga kuta, vatambichilwe wo vantawula kulutila wo vankwanuchila.

36 Pawulo hoavaga kusinda kulonga ndongwa itso akafugamaje hamwe nawo na kumusuka Mulungu. 37 Vanu veka vakavembaje ndalahela, vakamulagaje Pawulo kuno vangumunonela. 38 Lulongwa lo lukavavefitse ndalahela lwavaga lula lulongwa lo alontsile Pawulo kuta sivakumuwona kaha, ihyo vakamusindikitsaje mbaka mu meli.