1 Muntsajila Ajilipa akamulonjelaje Pawulo, "Lelo ufuluche wantse kipamanila." Ihyo Pawulo akagololaje liwoko lyake ili vantse kumuhulikitsa, nayo akalongaje.

2 Muntsajila Ajilipa! Ntsin'wona finofu munyiguno kwima halutalo hako kiyamila kwasawuli ya ndongwa tseka tso vanyijite Vayawudi, 3 kwasawuli heve ungutsitsela ndalahela ntsovelo tseka na ndongwa tso tunsumanila na Vayawudi, kwasawuli iyo ntsingukusuka unyulikitse kwa wusichimafu. 4 Vayawudi veka van'tsela ndongwa tsangu kuhuma ha wana wangu kuhuma mwantso mwa wumi wangu na hila fyo ntsichite mu inyi yangu, kanji hila fyo ntsichite uko ku Yelusalemu. 5 Nawo kwa luvala lutali vantsela na manyi vagane vafuluche valonje chila cho vachitsele, kuta luhuma hamutalo ntsavaga mufwasi munanahitsi va chikundi cha Mafwalisayo na ntsovelo tseka tsa malajitso geka ga Musa. 6 Ino lelo sambi ntsimile hano kwa kuhigwa kwasawuli ya kihuvila chila cho Mulungu avaga alontsile kuta akuvapela vadada vetu. 7 Chinu chino cho chila Mulungu avaga alontsile kuta akuvapela vadada vetu na cho vangihuvila vanu va kabila tsetu kumi na tsivili van'tsinda chikwile, nawo vangumutumichila Mulungu lwa hihyo hamunyi na hachilo. Enaa, muntsajila muvina! Heni ntsinhigwa na Vayawudi vano kwasawuli ya lihuvilo ilyo. 8 Kwasawuli yachi munu yoyuve hagati henyu an'wona wutalamu ndalahela kutumba kuta Mulungu avatsilipulaga vanu?

9 Kaha na heni mwene iho hamutalo ntsitumbaga na kudita fyeka fyo fyaganikaga kwa kulemetsa ndongwa tsa Yesu va ku Natsaleti. 10 Ihyo fyo ntsadisile uko ku Yelusalemu. Vavina va vatawula nambiko vamelye mamulaka ga kuvahiga na kuvasindika vanya litumbilo wolofu mu nyumba tsa vawopwa. Nawo vamwe hovavaga vankopolwa heni ntsatofile kula kuludikitsaga lulongwa ulo. 11 Mala tsolofu ntsabitaga mu nyumba tsa kitang'anila Vayawudi na kuvatova, kaha ntsavalatsimitsaga vamulije Mulungu, ntsavavipilaga kota ntsina lukwale na kuvafwata nambe ku miji ja kuwujentsi.

12 Siku yimwe ho ntsavaga mu njendo itso ntsim'bita ku Damesichi kwa mamulaka na kuno ntsina malajitso kuhuma kwa vatawula nambiko vavina, 13 enaa, muntsajila. Hontsavaga mung'asi hamunyi, ntsaguwene mwangatsa kuhuma Kilanga go gwavaga gummelema kulutila litsuva, gukang'alichilaje heni na vala vanu wo vavaga hamwe na heni. 14 Tweka tukagwaje hasi, na heni ngahulikaje litsi lo lyalongaga na heni kwa Chiebulaniya kuta, Sawuli, Sawuli kwasawuli yachi ung'oda? Kwakudita ihyo ungigatsa hela, kwasawuli unkuva kota senga fyo yimpana lugoda lwa mudimi vake. 15 Ngamuputsaje, Heve uli nani Mutwa? Nayo Mutwa akamitulaje kuta, Heni Yesu yo ung'oda. 16 Lelo winuche wime. Kwasawuli nguhumye ili nguhagule uve mutantsi vangu, na uve munu yo ukuvalonjela vanu ndongwa tso utsiwene munyi guno na tsila tso ngukulajila hambele. 17 Ngukukulusa kuhuma kwa Vayawudi vayago na kwa vanu wosi Vayawudi wo ntsingukutuma kwawo, 18 ili uvadite vantsele heni na kuhuma mu jitsa na kutsa mu mwangatsa, vahume mu mamulaka ga Lihoka na kwinjila mu wuntsajila wa Mulungu, ili vahulumilwe ndongwa tsawo ntsibi, ili vave hamwe na vanu wo vangunumbila heni.

19 "Ihyo muntsajila Ajilipa, ngalemwaje kutsilema nduntsuchilo tsila tso tsihumye Kilanga. 20 Ihyo ngantsaje kuvikula kwa vanu va ku Damesichi na va ku Yelusalemu na ku Wuyawudi kweka na kwa vanu wosi Vayawudi, kuta veka van'ganika kihala ndongwa tsawo ntsibi na kumupituchila Mulungu, na kwa ng'olwa tsawo valajile kuta vamupituchilye mwene. 21 Kwasawuli iyo iwo Vayawudi ho vakimbataje ho ntsavaga mu Nyumba ya Mulungu na kugana kung'okopola. 22 Lechelelo Mulungu antsimilye mbaka munyiguno ntsili halutalo ha vatavala na wosi vatavala wo ntsinguvalonjela chila cho chanyumye. Singulonga chinu chochive kulutila fila fyo alontsile Musa na valoli va Mulungu kuta fikuhumila, 23 kuta Chilisito akukodwa na akuva mulongola va kutsilipuka, akuvang'alichila vanu mwangatsa gwa wukuluso wake kwa vanu vake Vayawudi na wosi Vayawudi."

24 Pawulo ho avaga anlonga ihyo, Fesito akalongaje fikami kuta, "Pawulo! Una lukwale! Kusoma kwako kolofu kukupelye lukwale!"

25 Lechelelo Pawulo akamulonjelaje, Enaa muvina Fesito, heni ntsihela lukwale ila heni ntsina nyala na ntsinlonga ndongwa tsa wukweli ng'ani na tso tsin'tselanika.

26 Nayo Muntsajila Ajilipa atsitsele finofu ndongwa tsino tseka tso ntsinlonga, na heni fuluche ndonje halutalo hake bila muloto. Ntsin'tsela kuta ndongwa tseka tso tsihumye mwene atsitsele, kwasawuli lulongwa ulo silukakoliche hono halufiho.

27 Ena muntsajila Ajilipa, mbe, unguvatumba valoli va Mulungu? Ntsin'tsela kuta unguvatumba.

28 Ajilipa akamulonjelaje Pawulo kuta, "Untijila kuta kwa luvala ludodo ufuluche undite na heni ntsimutumbe Chilisito?"

29 Pawulo akamupitulaje kuta, "Ntsingumusuka Mulungu kuta luve luvala ludodo awu lutali siyo heve ng'ani uliyeka, ila hamwe na vala veka wova n'nyulikitsa munyiguno vave kota heni fyontsili, ila valeche kuwopwa kota heni."

30 Pawulo hoavaga kulonga ihyo muntsajila Ajilipa akinukaje hamwe na Fesito muvina va mukova na Beniche na vala wo vavaga vichite hamwe nawo. 31 Hovavaga van'huma hono iho vakalonganaje, Munu yuno sinambe adite lulongwa lo lufuluche lumudite awopwe awu kukopolwa. 32 Nayo muntsajila Ajilipa akamulonjelaje Fesito kuta, "Munu yuno akakuwopolwa manyi aka ave si asusile asindikwe kwa Kayisali muntsajila muvina va inyi ya Lumi."