1 Uko ku muji gwa Ikoniyo ndongwa tsikavaje kota fyo tsavaga kula ku Andiyochiya, Pawulo na Balinaba vakinjilaje hamwe mu nyumba ya kitang'anila Vayawudi kota fyo vaditaga. Vakavikulaje kwa wuvetso wukomi, mbaka Vayawudi wolofu na vanu wosi Vayawudi vakamutumbilaje Chilisito. 2 Lechelelo Vayawudi vanji wo valemile kumutumba Chilisito, vakavakokaje vanu wosi Vayawudi na kuvadita vasumane na vanu vala wo vamutumbye Chilisito. 3 Hamwe na kuvipilwa uko, Pawulo na Balinaba vakikalaje kuko kwa luvala lutali. Valongaga Ndongwa tsa Mutwa bila kuwona muloto, nayo Mutwa akawugubulaje wukweli kwa ndongwa tsake kwa kuvapela wuvetso iwo vatumi, nawo vakaditaje miwujitsa na mitinuso. 4 Lechelelo vanu va muji gula vakabagukaje, vamwe vakavaje lubali lwa Vayawudi na vamwe lubali lwa vatumi. 5 Vanu vatunga Vayawudi na wosi Vayawudi vakihantsaje na filongotsi vatunga, nawo vakalaganaje kuvaditila vatumi chitika na kuvatova kwa maganga. 6 Vatumi hovavaga kulutsela lulongwa ulo, vakabilimilaje ku miji ja Lisitila na Delibe, na ku muji gwa Likawoniya na ku miji ja habehi na hono iho, 7 na kuko vavaga vanguvavikulila vanu Ndongwa Nofu tsa Mulungu.

8 Mu muji gwa Lisitila kwavaga na munu yumwe mulume chiteve siavaga ajentsile nambe siku yimwe luhuma kuleleka. 9 Munu uyo amuhulikitsaga Pawulo hoavaga anvikula Ndongwa tsa Mutwa Yesu. Pawulo hoavaga kumukangatsila miho, akatselaje kuta ana litumbilo lya kuponetswa, 10 akamulonjelaje fikami, "Wime kwa magulu gako!" Luvala lulo munu yula chiteve akinukaje na kwantsa kujenda. 11 Lilugu lya vanu hovavaga kuchiwona chila cho adisile Pawulo, vakantsaje kuyova kwa kabila ya Chilikawoniya, "Mihoka jiveye kota vanu na kutwichila hetwe!" 12 Vanu iwo vakamuchemaje Balinaba litawa lya Tsewu litawa lya lilungu lyawo likomi na Pawulo vakamuchemaje Helime litawa lya lilungu linji, kwasawuli uyo Pawulo yo avaga mulongontsi va ndonga. 13 Mutawula nambiko va lilungu lya Tsewu hono hawo ha kusalila ho havaga habehi na muji, akaletaje misenga milume na fitsanga fya wuluva ha lwitsi lwa muji, ili mwene na lila lilugu lya vanu vatawule sadaka kwa vatumi. 14 Lechelelo Balinaba na Pawulo hovavaga kuhulika ndongwa itso, vakalalatulaje myenda jawo ili kulajila kuta valulema lulongwa ulo, vakabilimaje hagatinagati ha lilugu lya vanu na kulonga fikami kuta, 15 "Nye vanyalukolo kwasawuli yachi mun'dita ndongwa tsino? Hetwe natwe tuli vanu hela kota henye! Tuli hono hano kuvalonjela Ndongwa Nofu ili mupituche kuhuma mu ndongwa tsino tsa wudesi na muleche kujifugamila misanamu na mumufwate Mulungu yo mumi, yo awumbite Kilanga na Inyi na bahali na finu fyeka fyofyofili. 16 Iho hakatali Mulungu avalesile vanu veka wosi Vayawudi vadite kota fyo van'gana vene. 17 Lechelelo Mulungu ilajilaga kwa vanu kwa ndongwa nofu tso avaditilaga. Avaditye wuwuya wake kwa kuvapela ndonya kuhuma kilanga na kuvapela fibetwa kwa luvala lo lwaganikaga, na kuvagutitsa filyo na kuvapela wusangalafu." 18 Kwa kulonga ndongwa itso Pawulo na Balinaba vavetsitse kuvalemetsa kwa kunanahitsa ndalahela vanu vala valeche kuvatawulila sadaka ihyo.

19 Hambele Vayawudi vanji wo vahumye ku muji gwa Andiyochiya na ku muji gwa Ikoniyo vakavakokaje vanu vala, vakamutovaje Pawulo kwa maganga na kumubuluna mbaka kivala kwa muji, vatyaga kuta mwanga afweye. 20 Lechelelo vadahitswa hovavaga vamupilime chila lubali, akinukaje na kuwuya ku mujini. Hamilawu iyage mwene Pawulo na Balinaba vakawukaje na kubita mbaka ku Delibe.

21 Pawulo na Balinaba vakavikulaje Ndongwa Nofu ha muji ugo gwa Delibe na kupata vadahitswa wolofu. Ihyo vakapilukaje na kukolela kaha ku muji gwa Lisitila na Ikoniyo mbaka ku muji gwa Andiyochiya ya Pisidiya, 22 vakavakangatsaje vadahitswa na kuvalonjela kuta vendelelaje kikala mu litumbilo na kuta, "Vanu vakutukoda ho tukuva tun'gacha kwinjila ku wuntsajila wa Mulungu." 23 Pawulo na Balinaba hovavaga kuvahagula filongotsi ha chila ho chavaga chikundi cha vanya litumbilo lya Chilisito, na kusuka hamwe na kuleka kulya kwasawuli ya Mulungu, ili vimililwe na Mutwa yo vamutumbye.

24 Hovavaga kuvikula uko, vakakolelaje ku mukova gwa Pisidiya na kufika ku mukova gwa Pamufiliya. 25 Hovavaga kuvikula ndongwa tsa Mulungu ku Pelije, vakabitaje mbaka ku Hataliya. 26 Kuhuma uko vakajendaje kwa meli na kuwuya ku Andiyochiya, uko ko hamutalo vanu wo vamutumbye Chilisito vavaga vavasuchye kwa kuvavichila mawoko na ili vapelwe wuwuya wa Mulungu kwasawuli ya katsi iyo yo vavaga vachemilwe na Mulungu. 27 Hovavaga kufika uko ku Andiochiya vakavikaje chikalo na chikundi cha vanya litumbilo lya Chilisito cha hono iho, na kuvalonjela ndongwa tseka tso adisile Mulungu kukolela kwa vene na hila Mulungu fyo avadichye vanu wosi Vayawudi kumutumbila Chilisito. 28 Pawulo na Balinaba vakikalaje ku Andiyochiya hamwe na vadahitswa kwa siku ntsolofu.