1 Iho ha Chikundi cha vanya litumbilo lya Chilisito cha ku Andiyochiya kwavaga na valoli va Mulungu na vadahitsi. Nawo wo Balinaba na Simoni yo achemwaga Mutitu, na Luchiyo va ku Chilene, na Manayeni yo avaga vakalagise hamwe na Helode Andipasi na Sawuli. 2 Hovavaga vangumusuka Mutwa na kuleka kulya kwasawuli ya Mulungu, Muhe va Mulungu akalongaje, "Mumbagulile Balinaba na Sawuli kwa katsi yila yo ntsivachemye." 3 Hovavaga kusinda kumusuka Mutwa na kuleka kulya kwasawuli ya Mulungu, vakavavichilaje mawoko Balinaba na Sawuli kwa kuvasuchila na vakavalekaje vabite.

4 Balinaba na Sawuli kwa kutumwa na Muhe va Mulungu, vakawukaje na kubita ku inyi ya Selewuchiya, na kuhuma uko vakakolelaje mu bahali mbaka hono hakafu hohapilimwe na malenga ho hachemwaga Chipulo. 5 Hovavaga kufika ha muji gwa Salami, vakavikulaje Ndongwa tsa Mulungu mu nyumba tsa kitang'anila Vayawudi. Kaha vavaga hamwe na Yohana yoachemwaga litawa linji Maliko yo avaga anguvatanga katsi tsawo.

6 Hovavaga kulutila mu inyi itso tseka vakafikaje mbaka ku muji gwa Pafwo hono hakafu hohavaga hapilimwe na malenga, hono iho vakitang'anaje na munu yumwe muhavi na muloli va wudesi yo achemwaga litawa lyake Bali Yesu va kuhuma ku inyi ya Yudeya. 7 Munu uyo avaga hamwe na Selijiyo Pawulo, yo avaga munu muvina va hono hala hakafu hohapilimwe na malenga na avaga na nyala ndalahela. Ihyo Selijiyo Pawulo akavalibulitsaje Sawuli na Balinaba ili ahulikitse Ndongwa tsa Mulungu. 8 Lechelelo yula muhavi yo achemwaga litawa lyake Elima kwa Chijilichi, akajelaje kusumana na Balinaba na Sawuli ili amuyatse yula muvina ili aleche kumutumba Chilisito. 9 Iho Sawuli yo avaga anchemwa litawa linji Pawulo kuno anlongotswa na Muhe va Mulungu, akamufwalanulilaje miho uyo muhavi, 10 na kumulonjela, "Heve yo umemile wudesi na wubunganyisi! Heve ulimwana va lilungu! Kaha uli mutelani va chila munu yo an'dita kota fyo an'gana Mulungu. Mbe, ukuleka hanili kutsibibinda ng'asi tsa Mutwa tso tsigolwiche? 11 Lelo wuvetso wa Mutwa wukukutova heve! Nave ukuva chibofu na siukuguwona mwangatsa gwa litsuva kwa luvala lutunga."

Luvala lulo Elima uyo muhavi akabofolaje na akantsaje kubita kuno na kuno angumusaka munu va kumubata liwoko na kumulajila koyili ng'asi. 12 Yula muvina va hono hala hoavaga kuwona chila chochihumye akamutumbaje Mutwa Yesu, nayo apomwitswe na madahitso gala ga Mutwa.

13 Duve Pawulo na vayage vakawukaje kuhuma ku Pafwo na kufika ku Pelije, mu muji gula gwa Pamufiliya. Yohana yo achemwaga Maliko akavalekaje vayage kuko na kuwuya ku Yelusalemu. 14 Lechelelo Pawulo na Balinaba vakendelelaje na lujendo kuhuma ku muji gwa Pelije vakabitaje mbaka ku muji gwa Andiyochiya gogwavaga ku mukova gwa Pisidiya. Siku ya Kwesela vakinjilaje mu nyumba ya kitang'anila Vayawudi na kikalisa. 15 Hogavaga kusila kusomwa mandiko ga malajitso ga Musa na ga valoli va Mulungu, vavina va nyumba ya kitang'anila Vayawudi vakavatumilaje wujumbe Pawulo na Balinaba kuvalonjela, "Nye vayetu manyi munalo lulongwa lo lufuluche luvakangatse vanu vano muvalonjele."

16 Pawulo akimaje akavapunjilaje liwoko na kwantsa kuvalonjela kuta,

Henye va Isilaheli vayangu na henye nyeka wosi Vayawudi wo mungumufugamila Mulungu munyulikitse! 17 Mulungu va vanu va Isilaheli avahagwe vakukwetu, na kuvadita vave kabila ngomi hovavaga ku inyi ya Misili. Mulungu kwa wuvetso wukomi avalongwitse na kuvahumya mu inyi yila, 18 na kwa myaka alubayini avafumilye ng'olwa tsawo tsa wutimbing'afu tso vaditaga ku mbuga. 19 Mulungu avakopwe vanu va kabila tsila saba wo vikalaga mu inyi ya Kanani, akavapelaje Vaisilaheli inyi iyo ili yive yawo. 20 Ndongwa itsi tseka tsahumye kwa myaka kota miya ine na hamusini hino.

Hotsavaga kulutila ndongwa itso tseka, Mulungu akavapelaje valamutsi vavalongotse vanu mbaka ha chipindi cha Samweli muloli va Mulungu. 21 Hambele vanu vakasukaje vapelwe muntsajila, ihyo Mulungu akavapelaje Sawuli mwana va Chisi va likabila lya Benjamini ili ave muntsajila vawo. Nayo akavaje muntsajila kwa myaka alubayini. 22 Mulungu hoavaga kumuhetsa Sawuli mu wuntsajila, akamuhagulaje Dawudi ave muntsajila vawo. Mulungu akalongaje kuta ntsimuwene Dawudi mwana va Yese, munu yo akudita kota fyo tsin'gana heni, nayo yo akudita finu fyeka fyo ntsin'gana heni. 23 Kukolela ku chilelo cha uyo Dawudi, Mulungu kota fyo avaga alontsile luhuma katali, akavasindichilaje vanu va Isilaheli, Yesu Mukulusi. 24 Yesu hoavaga ang'acha ang'ali kwantsa katsi yake, Yohana Mubatitsi amulongwe na kuvavikulila vanu veka va Isilaheli kuta vamupituchile Mulungu na kubatitswa. 25 Yohana hoavaga ansinda katsi ya kuvikula wujumbe wake akavalonjelaje vanu kuta, henye munkuta heni ntsili nani? Heni siyo Chilisito yo mungumutsindila. Lechelelo mwene yo ankutsa mumbele mwangu, uyo heni sifuluche njele kuwopola nambe ndejesi tsa ndatu tsake.

26 Vang'olotsangu Vaisilaeli, henye yo muli vana va lukolo lwa Ibulahimu, na henye vanu wosi Vayawudi yo mungumufumila Mulungu, ndongwa tsino tsa wukuluso tsitsitse kwasawuli ya hetwe tweka! 27 Vanu veka wo vangikala ku Yelusalemu hamwe na vavina vawo sivakamutselye kuta Yesu yo Mukulusi, kaha sivakatseliwe ndongwa tsa valoli va Mulungu tso ntsasomwaga chila Siku ya Kwesela, ila vakatsikwitsaje ndongwa itso tsa valoli va Mulungu kwa kumuhiga Yesu akopolwe. 28 Nayivaje sivayipasile nongwa yoyive yo yikumwambutsa ahigwe kukopolwa. Vamususile Pilato amuhije chifo. 29 Hovavaga kumuditila chila chinu cho chandikwe kwasawuli ya mwene, hovavaga kumukopola kwa kumuvamba mumusalaba, vakamwisaje na kumuvika mu kabuli yo yihongulwe mumalika. 30 Lechelelo Mulungu akamutsilipulaje, 31 na kwa siku ntsolofu akavahumilaje vala wo avavaga an'jendasa hamwe nawo kwantsila ku muji Galilaya mbaka ku muji gwa Yelusalemu. Nawo lelo wo vanlonga kwa vanu veka chila chovachiwene na cho vakahuliche. 32 Hetwe natwe tuli hano tuvaletye Ndongwa Nofu tso Mulungu avaga alontsile na vakukwetu. 33 Ino lelo Mulungu atsikwitsitse kwa hetwe yo tuli vatsukulu vawo kwa kumutsilipula Yesu. Kota hila fyo yandikwe mu chitabu cha Tsabuli ya kavili kuta,

Heve yo uli Mwanangu,

heni munyiguno mbeye Dado.

34 Mulungu amutsilipwe Yesu ili muvili gwake guleche kuwola kota hila Mulungu fyo avaga amulonje,

Nachene ngukupela heve fichililo nyagulwa

kota tso ntsamulonje Dawudi.

35 Kota fyo yandikwe hono hanji muchitabu cha Tsabuli,

Siukumuleka Muhagulwa vako awole.

36 Dawudi hoavaga kudita chila cho aganaga Mulungu ha chilelo chake, akafwaje na akatsikwaje habehi na hovavaga vatsisilwe vakukwe, na muvili gwake gukawolelaje mukabuli. 37 Lechelelo yula yo atsilipulwe na Mulungu, uyo yo muvili gwake sigwawotsile.

38 Ihyo lelo vang'olotsangu Vaisilaheli ntsin'gana mutsele kuta kwa kukolela uyo Yesu kuhulumilwa kwa ndongwa ntsibi kunvikulwa kwenyu. 39 Munu yoave yo angumutumba Yesu akuhulumilwa ndongwa tsake ntsibi na kidichilwa halutalo ha Mulungu, lulongwa lo silufuluche luve kwa kugahulikitsa malajitso ga Musa. 40 Ihyo lelo mwiyangalile ili ndongwa tsila tso tsalontsilwe na valoli va Mulungu tsileche kuvapata na henye,

41 Muhulikitse henye mu vanya mbedatsi,

mutinuche na kuyaga

kwasawuli chinu cho ngudita sambi, ha siku tsenyu cho simufuluche muchidichile,

nambe munu avalonjele.

42 Pawulo na Balinaba hovavaga vanhuma mu nyumba yila ya kitang'anila Vayawudi, vala vanu vakavasukaje vabite vakavalonjele kanji ndongwa itso ha Siku yinji ya Kwesela. 43 Vanu hovavaga kuwuka kuhuma hono hala hovavaga vakong'ine, Vayawudi na vanji wosi Vayawudi wo vayitumbye dini ya Chiyawudi, vakavafwataje Pawulo na Balinaba, nawo Pawulo na Balinaba vakalonganaje nawo na kuvakangatsa numbula tsawo kuta vikale kwa kihuvila wuwuya wa Mulungu.

44 Hoyavaga kufika Siku yinji ya Kwesela, vanu wolofu va mu muji gula vakatsaje kuhulikitsa Ndongwa Nofu tsa Yesu. 45 Vayawudi hovavaga kuliwona lilugu ilyo lya vanu, vakawonaje mbafya na kudana ndongwa tso avaga an'vikula Pawulo na kumuliga. 46 Lechelelo Pawulo na Balinaba vakalonganaje nawo hilo bila muloto goguve kuta, yiganikije tandi kuvalonjela henye Ndongwa tsa Mulungu. Lechelelo mutsilemile, na ihyo mwihitsile muvene kuta henye sinambe muganiche ku wumi wa siku tseka, lelo hetwe tunguvaleka na kubita kwa vanu wosi Vayawudi.

47 Igano go malajitso go atulajitse Mutwa,

Ntsivahagwe henye muve mwangatsa kwa vanu wosi Vayawudi,

ili muve chambutso cha wukuluso wa vanu mbaka ku inyi tseka.

48 Vala vanu wosi Vayawudi hovavaga kuhulika lulongwa ulo, vakahechelelaje ndalahela na vakatsitsumitsaje Ndongwa tsa Mutwa. Nawo vanu veka wo vahagulwe na Mulungu mu wumi wa siku tseka vakamutumbaje Mutwa Yesu. 49 Ndongwa tsa Mutwa tsikatagalilaje chila hono mu inyi yila yeka. 50 Lechelelo vavina va Vayawudi vakavakokaje vadala vanya fyewo, na vavina va muji hamwe na valume vatambulwa va muji ugo. Ihyo vakantsaje kuvakoda Pawulo na Balinaba na kuvavinga vahume mu inyi yawo. 51 Ihyo Pawulo na Balinaba vakakung'unaje mingundi jo javaga mumagulu gawo kuvalajila kuta vene valimuduhu kwa wubi wo wukuvapata vanu iwo na kuwuka kubita ku muji gwa Ikoniyo. 52 Vadahitswa va ku muji gwa Antiyochiya vakavaje na wusangalo na vakalongotswaje na Muhe va Mulungu.