1 Kwavaga na munu yumwe litawa lyake Hananiya na mudala vake yo achemwaga Safwila, vene nawo vakagutsaje mugunda gwawo. 2 Hananiya akagavasaje magobole go avaga apasile, na kuno mudala vake alutselaga lulongwa ulo, na gogasije akasindikaje kwa vatumi. 3 Petulo akamuputsaje Hananiya, mbe ndawuli Lihoka likubite numbula yako mbaka likudisile umudeteletse Muhe va Mulungu, kwa kufiha magobole gamwe go ugutsitse mugunda? 4 Hala houka ung'acha sulagutsa mugunda siguka mali yako, na houvije kugutsa igo magobole si gaka mu mamulaka gako? Lelo luveye ndawuli mbaka uhotse lulongwa luno mu numbula yako kwa kufiha magobole? Ihyo si umudetelitse munu ndaya, ila umudetelitse Mulungu. 5 Hananiya hoavaga kuhulika ihyo, akagwaje hasi na kufwa. Vanu veka wo vavaga vahuliche lulongwa ulo lo luhumye vakavaje na muloto ndalahela. 6 Vakwamitsi vakatsaje, vakaguwopaje muvili gwake mu sanda na kuguhumya kivala na kugutsika. 7 Holwavaga kulutila luvala lwa kota masala gadatu hino, mudala vake nayo akinjilaje mugati, kuno nambe atsele chochihumye. 8 Petulo akamuputsaje, "Undonjele! Mbe, chiyasi chino cha magobole cho chichinago cho mupasile kwa kugutsa mugunda gwenyu?" Safwila akamujibulaje Petulo kuta ena, gogago hela. 9 Kaha Petulo akamulonjelaje, "Yiveye ndawuli mbaka heve na mulume vako mulagine kumujela Muhe va Mutwa? Hulikitse! Vakwamitsi wo vaka vahele kumutsika mulume vako vali ha lwitsi, na heve nave vakukutegula mbaka kivala." 10 Luvala lululaga Safwila akagwaje ha magulu ga Petulo, akafwaje. Vala vakwamitsi hovavaga kwinjila, vakamufikaje mwanga afweye, nawo vakamutegulaje na kumutsika halubali ho vamutsisile mulume vake. 11 Muhwehwe mukomi gukavabataje vanu veka wovamutumbye Chilisito, na veka wo vahuliche chila chochihumye.

12 Vatumi vadisile miwujitsa myolofu hagati ha vanu. Vanu vanya litumbilo lya Chilisito vitang'anilaga ha lidama lya Selemani. 13 Vanu vavatsumilaga, nambe ihyo kuduhu munu yoyuve yo avaga yo siamutumbye Chilisito yo ajelaga kihantsa nawo. 14 Lechelelo vanu wo vavaga vangumutumba Mutwa, vakongetsekaje ndalahela valume kwa vadala. 15 Nawo vanu vavategulaga vatamwa mu saga na micheka na kuvasindika mung'asi na kuvalambalika, vaganaga Petulo hoakuva anlutila nambe mujiji gwake hela guvafichile ili vapone. 16 Kaha vanu vanji vakakong'anaje kuhuma ku miji ja mulubali lwa Yelusalemu, na kuvaleta vatamwa vawo na vala wo vakodwaga na misoka na iwo veka vakaponetswaje.

17 Ihyo muvina va vatawula nambiko na vayage wo vavaga va chikundi cha Masadukayo va hono iho, vakavawonelaje mbafya vatumi. 18 Ihyo lelo vakavabataje vatumi na kuvawopa mu nyumba ya vawopwa. 19 Lechelelo hachilo mutantsi va kilanga va Mulungu akadindulaje ntsitsi tsa nyumba ya vawopwa, akavahumyaje kivala. Akavalonjelaje, 20 "Mubite mukime ha Nyumba ya Mulungu mukavalonjele vanu ndongwa tseka tsa wumi wa kihantsa na Chilisito." 21 Vatumi vakamudikitsaje, na hamilawu yiyage kung'acha hamitondo, vakinjilaje ha Nyumba ya Mulungu na kwantsa kuvadahitsa vanu.

Muvina va vatawula nambiko na vala vanu wo vavaga hamwe, vakakong'asaje libalatsa lyeka lya vavina va Isilaheli vakavatumaje vanu kula ku nyumba ya vawopwa ili vakavalete vala vatumi. 22 Lechelelo iwo vatantsi va Nyumba ya Mulungu hovavaga kufika kuko ku nyumba ya vawopwa sivakavafisile ndaya. Ihyo vakawuyaje na kulonga hala habalatsa chila chochihumye, 23 vakalongaje, "Hotuvije kufika ha nyumba ya vawopwa, tuyiwene ying'acha yidinditwe, na vimilitsi vankwimilila muntsitsi, lechelelo hotuvije kudindula ntsitsi si tumuwene munu yoyuve mugati." 24 Muvina va vimilitsi va nyumba ya vawopwa na vatawula nambiko vavina vavaga kuhulika ihyo vakavaje na muloto kwasawuli ya vanu iwo, luveje ndawuli lulongwa luno. 25 Akafikaje munu yumwe akavalonjelaje, "Muhulikitse, vala vanu wo mukavawopite mu nyumba ya vawopwa, sambi hano vali mu Nyumba ya Mulungu vanguvadahitsa vanu." 26 Iho muvina va wimilitsi va Nyumba ya Mulungu hamwe na vanu vake veka vakabitaje ha Nyumba ya Mulungu, vakavaletaje vatumi vala, lechelelo vakavategulaje bila chitika kwasawuli wogopaga kutowa maganga na vanu.

27 Hovavaga kuvaleta vatumi, vakavavikaje halutalo ha libalatsa. Muvina va vatawula nambiko akavalonjelaje, 28 "Twavaga tuvang'anulye kuta mulekaje kudahitsa kwa litawa lya munu yuno, lechelelo henye muyimemitse Yelusalemu yeka madahitso genyu, na kaha mun'gana na hetwe tuwoneche twambwitse kukopolwa kwa munu yuno." 29 Iho Petulo na vala vatumi vayage vakamujibulaje, "Tun'ganika kumuhulikitsa Mulungu ng'ani na siyo vanu ndaya. 30 Henye mwamukopwe Yesu kwa kumuvamba mu musalaba, lechelelo Mulungu va vakuku vetu amutsilipwe. 31 Uyuno yo yula Mulungu akamwinulaje mbaka lubali lwa hesima na kumuvika habehi na mwene, ihyo akavaje Muvina na Mukulusi ili avadite vanu va Isilaheli vihale na vapate wuleketso wa ndongwa tsawo ntsibi. 32 Hetwe tunlonga ndongwa tso twatsiwene na kutsihulika, nayo Muhe va Mulungu yo vapelwaga vala vanu wo vangumuhulikitsa Mulungu, alajilaga ndongwa tsitso."

33 Vajumbe veka va wovavaga mubalatsa yila, hovavaga kuhulika ihyo vakavipaje ndalahela, mbaka vakaganaje kuvakopola vala vatumi. 34 Lechelelo Mufwalisayo yumwe litawa lyake Gamaliyeli yo avaga mudahitsi va malajitso ga Musa na yo avaga munu va kuhesimilwa ndalahela kwa vanu veka, akimaje halutalo ha libalatsa akalajitsaje kuta vatumi veka vahume kivala kwa luvala tandi. 35 Ihyo akavalonjelaje, "Nye valume va Isilaheli mwiyangalile tandi, chila cho mun'gana kulamula kuvadita vanu vano. 36 Mwiwukaje kuta myaka jo jilutye kwavaga na munu litawa lyake Tewuda, idutsaga kuta mwene yo munu mutambulwa, akapataje vanu kota mya tsitayi, vakamufwataje na kumutumba. Lechelelo ho avaga kukopolwa, vala vanu veka wo vamufwataga vakatagalilaje na ndongwa tsake tsikasilaje. 37 Kaha hoavaga kulutila munu uyo, akahumilaje Yuda munu va ku Galilaya siku tsila tsa vanu kuvalilwa, akavakokaje na kuvalongotsa vanu wolofu kudita chitika, mwene nayo akakopolwaje na vala wo vamufwataga vakatagalilaje. 38 Ino lelo heni ntsinguvafunda kuta mwiyangalile na vanu vano. Muvaleche vabite! Kwasawuli manyi lulongwa luno na katsi yino yovan'dita yihumye kwa vanu, vankodeka hela. 39 Lechelelo manyi yive yihumye kwa Mulungu, simukuvetsa kusumana nawo, kwasawuli mukuva mungisumana na Mulungu."

Ihyo vanu vala vakidichilaje ndongwa tsila tso alontsile Gamaliyeli. 40 Vakavachemaje vala vatumi vinjile mu nyumba, vakalamulaje kuta vavakobe mikotya, kaha vakavalajitsaje valeche kudahitsa kanji kwa litawa lya Yesu, hambele vakavalekaje vabite. 41 Duve vala vatumi vakahumaje mu libalatsa lila kuno vasangale ndalahela, kwasawuli Mulungu avadisile vahesimilwe kwa kuvaleka vahonjelwe nyoni kwasawuli ya litawa lya Yesu. 42 Chila siku ha Nyumba ya Mulungu na mu nyumba tsa vanu, vatumi sivalesile kudahitsa na kuvikula Ndongwa Nofu kuta Yesu yo Chilisito.