1 Hotsavaga kulutila ndongwa itso, Yesu akavahumilaje vadahitswa vake halubali lwa lilamba lya Tibeliya. Avahumye chinya ihi, 2 Simoni Petulo, na Tomasi yo achemwaga munya mbili, na Natsanaheli munyakaye va Kana ya ku Galilaya, na vana vavili va Tsebedayo na vadahitswa vanji vavili, vavaga veka hohamwe. 3 Simoni Petulo akavalonjelaje vayage, "Sogwe kulopa somba." Nawo vakamulonjelaje, "Tukubitasa hamwe na heve." Vakakwinaje mutumbwi, lechelelo hachilo icho sivapatite chinu chochive. 4 Hokwavaga kung'acha kutitutitu, Yesu akimaje halubali lwa lilamba, lechelelo vadahitswa vala sivamukagwe. 5 Yesu akavaputsaje, "Nyee! Vakwamitsi vangu muna somba yoyive?" Vene vakamupitulaje kuta, "Ndaya! Situpasile chochive." 6 Yesu akavalonjelaje, "Mwise nyafu ntsenyu lubali lwa iwoko ililo lya mutumbwi na henye mukupata somba." Duve vakisaje waafu mu lubali ulo nawo vakapataje somba ntsolofu ndalahela, mbaka vakalemwaje na kukwega mu mutumbwi gwawo. 7 Yula mudahitswa yo agan'waga ndalahela na Yesu akamulonjelaje Petulo kuta, "Hee! Uyo yo Mutwa!" Simoni Petulo hoavaga kuhulika ihyo, akafwalaje mwenda gwake kwasawuli avaga alihela myenda, nayo akitotsaje mu lilamba. 8 Lechelelo vala vadahitswa vanji yo vavaga mulubali lwa lila lilamba wutali kota hatuva mya moja, vakatsaje mu mutumbwi kuvatanga vayawo kukwega waafu wo wavaga wumemile somba. 9 Hovavaga kufika mulubali lwa lilamba vakaguwonaje moto gwa mukala, na muchanya mwake kwavaga na somba na libumunda. 10 Yesu akavalonjelaje, "Mulete hano somba tsimwe tso mupasile." 11 Simoni Petulo akakwinaje mutumbwi, na kukwega kivala wula waafu wowali wumemite somba ngomi mya moja hamusini na tsidatu. Nayivaje ntsavaga ntsolofu ndalahela, lechelelo waafu siwalalatuche. 12 Yesu akavalonjelaje, "Mutse mulye chilyo cha hamilawu." Kuduhu nambe yumwe yo ajetsile kumuputsa kuta, "Heve yo nani?" Kwasawuli vadahitswa veka vatselaga kuta avaga Mutwa. 13 Kaha Yesu akabitaje na kutegula libumunda na kuvapela, hohihyo akavapelaje na yila somba. 14 Ulo lwavaga luvala lwa kadatu lwa Yesu kuvahumila vadahintswa vake kuhuma atsilipuche.

15 Hovavaga kusinda kulya, Yesu akamuputsaje Simoni Petulo, "Simoni mwana va Yohana! Mbe, ungana heni kulutila vayago?" Nayo akamupitulaje, "Ena, Mutwa heve ungulukagula kuta heni ntsingukugana." Yesu akamulonjelaje, "Ulise chipinga changu cha ng'olo." 16 Kaha akamuputsaje lwa kavili, "Simoni mwana va Yohana! Mbe, un'ngana heni kulutila vayago?" Petulo akajibulaje "Ena Mutwa heve un'tsela kuta heni ntsingukugana." Yesu akamulonjelaje, "Wamile chipinga changu cha ng'olo." 17 Akamupuntsaje lwa kadatu kuta, Simoni mwana va Yohana! Mbe, ungana heni kulutila vayago? Ihyo Petulo akasusutalaje ndalahela kwasawuli ya kuputswa lwa kadatu, Simoni mwana va Yohana! Mbe, ungana heni kulutila vayago? Petulo akamulonjelaje Yesu kuta, Mutwa heve un'tsela ndongwa tseka, kaha un'tsela kuta heni ntsingukugana. Yesu akamulonjelaje, ulise chipinga changu cha ng'olo. 18 Yesu akamulonjelaje Simoni Petulo, ntsingulonjela wukweli kuta, howavaga ung'acha mukwamitsi wavavaga utsovye kiwopa musipi na kubita kokuve ko un'gana kubita. Lechelelo hala houkuva ugogwe ukugolola mawoko gako, na munu yunji akukuwopa na kukusindika ko siun'gana kubita. 19 Kwa kulonga ihyo, Yesu alajilaga Petulo fyo akufwa, ili Mulungu atsumitswe. Hambele akamulonjelaje, ufwate heni!

20 Petulo akapitukaje na kumuwona yula mudahitswa yo aganwaga Yesu, anguvafwata. Mudahitswa uyo yo yula yo amwegamye Yesu mu mambaga hala ho valyaga chilyo cha mumihe na kumuputsa kuta, Mutwa nani yo akukupituka? 21 Ihyo Petulo aveye kumuwona uyo mudahitswa, akamuputsaje Yesu, Mutwa na yuno nayo lukumuhumila lulongwa lwachi? 22 Yesu akamupitulaje kuta, manyi tsin'gana uyo ikale mbaka hongutsa heni, heve un'gana chichi? Heve ufwate heni. 23 Ihyo lulongwa ulo lukatagalilaje hagati ha vanu vanya litumbilo va Yesu kuta, mudahitswa yula siakufwa. Lechelelo Yesu sialontsile kuta mudahitswa uyo siakufwa, ila alontsile kuta, manyi ntsin'gana ikale mbaka hongutsa heni, heve un'gana chichi? Heve ufwate heni. 24 Mudahitswa uyo yo atsiwene ndongwa tsino na kutsandika, na hetwe tungulukagula kuta wusahidi wake wa wukweli.

25 Kuna ndongwa tsinji ntsolofu tso adisile Yesu, manyi tsika tsandikwe tseka, nambe inyi yene siyika kukwila kufivika vitabu fyeka fyo fwandikwe.