1 Ntsinguvalonjela ndongwa tsino ili mwikangatse muleche kumukana Mulungu. 2 Vanu vakuvavinga mu nyumba ntsa kitang'anila Vayawudi. Kaha kuna luvala lukutsa hoihyo chila yo akuvawulaga henye akutijila ankola katsi ya Mulungu. 3 Vakuvaditila ndongwa itso kwasawuli sivamutsele Dada wala sivantsele heni. 4 Lelo ntsinguvalonjela henye ndongwa itsi, ili luvala holukuva kufika mwiwuche kuta ntsali ntsivalonje.

Sintsavalonje ndongwa itsi kuhuma hamutalo kwasawuli ntsali hamwe na henye. 5 "Lelo heni sogwe kwa mwene yo anumile, lechelelo kuduhu nambe yo amutsitse, usogwe kwiya? 6 Ntsivalonje ndongwa tsino, natso numbula tsenyu tsiveye na wususutalo. 7 Lechelelo ntsinguvalonjela wukweli, chiba heni mbuche, kwasawuli manyi heni ndeche kuwuka Mutantsi siakutsa kwenyu. Lechelelo manyi heni mbuche, iho ho ngumutuma kwenyu. 8 Nayo uyo Mutantsi ho akuva kutsa, akuvalajila vanu va inyi tseka kuta van'dita ndongwa ntsibi, na hila vanu fyo vakidichilwa na Mulungu, na hila vanu fyo vakuhingwa na Mulungu. 9 Vadisile ndongwa ntsibi kwasawuli sinambe vanumbile heni. 10 Muhe va Mulungu akuvalajila hila heni fyo ndichilwe na Mulungu, kwasawuli heni sogwe kwa Dada na henye simukumbona kaha. 11 Kwasawuli ya wuhigo, kuta Lihoka livina lya inyi tseka mwanga lihijitwe.

12 "Kaha ntsinatso ndongwa ntsolofu ntsa kuvalonjela, ila kwasawuli sambi simukuvetsa kikangatsa. 13 Hoakuva kutsa uyo Muhe va Mulungu yo agubulaga wukweli akuvalongotsa ku wukweli weka, kwasawuli siakulonga kwa kugana mwene, kwasawuli akulonga ndongwa tso ahuliche, na akuvalonjela ndongwa tsa kulutalo. 14 Mwene uyo akuntsumitsa heni, kwasawuli akutegula ndongwa tsangu na kuvalonjela henye. 15 Finu fyeka fyo anafyo Dada fyo fyangu. Icho cho chambutso cha heni kuvalonjela kuta Muhe va Mulungu akutegula ndongwa tsangu na kuvalonjela henye.

16 "Lusije luvala ludodo henye simukumbona kaha, lechelelo kaha luvala ludodo hambele mukumbona kaha!" 17 Ihyo vadahitswa vake vatunga vakiputsaje, "Anamana yachi ho angutulonjela kuta, lusije luvala ludodo henye simukumbona, na luvala ludodo hambele henye mukumbona kaha? Kaha anlonga kwasawuli heni sogwe kwa Dada." 18 Vakendelelaje kiputsa kuta, "Anamana yachi kulonga, lusije luvala ludodo? Sinambe twelewe choanlonga." 19 Yesu akantselage kuva vaganaga kumupuntsa, duve akavalonjelaje, "Mbe, mungiputsa fyo ndontsile, lusije luvala ludodo nanye simukumbona, na kaha lusije luvala ludodo hambele mukumbona kaha? 20 Ntsinguvalonjela wukweli kuta, henye mukuvemba na kukalala, lechelelo vanu va inyi vakuhechelela, kukalala kwenyu kukugaluka kuva wuhechelelo. 21 Luvala lwa mudala kulela mwana manyi luve habehi awonaga wuvafi kwasawuli luvala lwa kulela luvaga lufisile, lechelelo manyi mwanga ave aletsile mwana wuvafi wula wugalukaga kuva wuhechelelo kwasawuli amuletite mwana muinyi. 22 Henye sambi mun'wona wuvafi, lechelelo hongutsa kaha henye mukuva na wuhechelelo munumbula tsenyu, na wuhechelelo uwo kuduhu munu siakuvetsa kuwuhetsa. 23 Siku iyo simukusuka chinu chochive. Ntsinguvalonjela wukweli kuta chinu chochive cho mukusuka kwa Dada vangu kota fyo ntsin'gana heni, nayo akuvapela. 24 Nambe sambi mung'acha kusuka chinu chochive kwa mamulaka gangu. Musuche nanye mukupelwa ili wuhechelelo wenyu wukwile.

25 "Ntsivalonje ndongwa tsino kwa sembeletso. Lelo kuna luvala lunkutsa lo nguvalonjela bila sembeletso, ila nguvalonjela ndongwa tsa Dada vangu bila sembeletso. 26 Siku iyo mukusuka kota litumbilo lyenyu fyolili kwa heni, na sinambe ntsivalonjele kuta heni nguvasuchila kwa Dada, 27 kwasawuli mwene Dada avaganite henye kwakuva munganite na munumbye kuta heni ntsahumye kwa Mulungu. 28 Heni ntsahumye kwa Dada ngatsaje muinyi, lelo ntsinguyileka inyi na kupiluka kwa Dada." 29 Ihyo vadahitswa vake vakalongaje, ena! Lelo unlonga bila sembeletso yoyive. 30 Lelo tutselye kuta heve un'tsela chila chinu, siun'ganika kuputswa lulongwa loluve. Kwasawuli ya lulogwa ulu, lelo tungukutumba kuta wahumye kwa Mulungu. 31 Yesu akavapitulaje kuta, "Mbe, lelo mun'numbila? 32 Luvala lunkutsa, kaha mwanga lufisile, lwa henye nyeka mukupwiling'ana chila munu akubita kukaye kwake, na heni mukundeka ntsiyena, lechelelo heni sintsiyena ndaya, kwakuva Dada vangu alihamwe na heni. 33 Ntsivalonje ndongwa itsi ili muve na wusichimafu kwa kihantsa na heni. Mukukodeka mu inyi, lechelelo mwikangatsaje numbula tsenyu! Heni mwanga ntsitsisumile katsi ntsibi tsa muinyi!"