1 Kwavaga na munu yumwe yo avaga mutamwa yo achemwaga Latsalo. Munu uyo ikalaga ku muji gwa Betsaniya, vikalasaga hamwe na vahatsave wo vachemwaga Maliyamu na Malita. 2 Uyo Maliyamu yo yuyula yo amubasile Mutwa mafuta go gapuchilila ga galama ngomi, na kugapata magulu kwa fwili tsake. 3 Ihyo Vahatsave iwo vakavatumaje vanu kwa Yesu vamulonjele kuta, "Mutwa, yula muyago antamika." 4 Yesu hoavaga kuhulika ihyo, akalongaje, "Latsalo siakufwa kwa wutamwa wuno, ila uwu wukulajila wumelemo wa Mulungu, na kaha wukudita Mwana va Mulungu atsumitswe." 5 Nayo Yesu viyendaga ndalahela na Malita, na Maliyamu na Latsalo muhatsa vawo. 6 Lechelelo Yesu hoavaga kuhulika kuta Latsalo antamika, akendelelaje kuhava kono kuko nayo ichite siku tsinji tsivili. 7 Hambele hotsavaga kulutila siku itso akavalonjelaje vadahitswa vake, "Lelo tuwuye kaha ku Yudeya." 8 Vadahitswa vake vakamulonjelaje, "Mudahitsi, hitsutsitsutsi hela baha Vayawudi vaganaga kukupola kwa maganga kuko, nave un'gana kaha kuwuya kuko?" 9 Yesu akavapitulaje kuta, "Mbe, sikuna masala kumi na gavili ga hamunyi kwa siku yimwe? Ihyo vanu vala veka wo vajendaga hamunyi sivikuvalaga kwasawuli vanguguwona mwangatsa gwa inyi. 10 Lechelelo vanu wo van'jenda hachilo vikuvalaga kwasawuli valihela mwangatsa gwa kuvatanga kulola." 11 Yesu avaga kulonga ndongwa itso akawilaje kaha kuvalonjela, "Muyetu Latsalo avasise tulo, lechelelo heni ntsim'bita ngamulamuse." 12 Vadahitswa vake vakamulonjelaje, bee Mutwa, manyi avasise tulo hela akulamuka. 13 Lechelelo Yesu avaga anlonga kwajili ya chifo cha Latsalo, ila vala vadahitswa vake sivatselaga, vatyaga anlonga kuta Latsalo avasise tulo hela. 14 Ihyo Yesu akavalonjelaje bila kuvafiha kuta, "Latsalo afweye, 15 lechelelo ntsinhechelela kwakuva sintsika kuko Latsalo hoavaga ang'ali kufwa, ili munumbe. Lelo tubite kwake." 16 Tomasi yo achemwaga Mubasa, akavalonjelaje vadahitswa vayage, "Hetwe natwe tubitase na Mudahitsi, manyi kufwa tukafwe hamwe na Mutwa!"

17 Yesu hoavaga kufika uko afisile muvili gwa Latsalo mwanga gutsisilwe, na guna siku tsitayi kuhuma gutsikwe. 18 Chijiji cha Betsaniya chavaga habehi na Yelusalemu, wutali wake wavaga kota chilomita tsidatu hino. 19 Vayawudi wolofu vavaga vatsitse kuvahongetsa Malita na Maliyamu kwa chivembo cha mung'olotsawo. 20 Nayo Malita hoavaga kuhulika kuta Yesu ankutsa, akabitaje kumutang'anitsa, ila Maliyamu akasigalaje munyumba. 21 Malita akamulonjelaje Yesu, "Bee Mutwa uka uve ulibaha, muhatsa vangu si akakufwa. 22 Lechelelo nambe sambi ntsin'tsela kuta chochive cho ukumusuka Mulungu, akukupela." 23 Yesu akamulonjelaje "Muhatsawo akutsilipuka." 24 Malita akamujibulajekuts ntsin'tsela kuta akutsilipuka ha luvala lwa wutsilipuko ha siku ya wudugo. 25 Yesu akamulonjelaje "Heni yo wutsilipuko na wumi. Mwene yo an'numba heni, na yivaje akufwa akuva mumi, 26 na munu yoyuve yo alimumi na an'numba heni, uyo si akufwa nachene. Mbe, ungulutumba lulongwa ulu?" 27 Malita akamulonjelaje, "Ena Mutwa! Ntsintumba kuta heve yo Chilisito muhagulwa na Mulungu, Mwana va Mulungu yula yo ankutsa mu inyi."

28 Malita hoavaga kulonga ndongwa itso, akabitaje akamuchemelaje halubali Maliyamu mung'olotse na kumulonjela kuta, "Mudahitsi alibaha angukuchema." 29 Nayo Maliyamu avaga kuhulika ihyo, akasupanitsaje kuwuka na kubita ko ali Yesu. 30 Yesu avaga ang'ali kufika mu chijiji, ila avaga ang'acha hono hala ho itang'ine na Malita. 31 Vala Vayawudi wo vavaga hamwe na Maliyamu munyumba vangumuhongetsa, hovavaga kuwona hila fyo awusile kwa kusupanitsa, vakamufwataje vahotsaga kuta am'bita kukabuli akalomboketse kuko. 32 Maliyamu avaga kufika hono hala ho avaga Yesu, akafugamaje hamagulu gake, na kumulonjela kuta, "Mutwa, uka uve iha muhatsavangu si akakufwa!" 33 Yesu avaga kumuwona Maliyamu anvemba na vala Vayawudi wo vamusindikitse nawo vanvemba, Yesu akawonaje wusungu munumbula yake. 34 Akavaputsaje, "Mumutsisile kwiya?" Vakamupitulaje kuta, "Mutwa, utse uhawone hotumutsisile!" 35 Yesu akavembaje. 36 Ihyo Vayawudi vakalongaje, "Mulave hila fyo amuganaga Latsalo!" 37 Lechelelo vanu vamwe vakalongaje, "Mbe, yuno yo amuponitse yula chibofu, akakulemwa kumuponetsa Latsalo?"

38 Kaha Yesu hoavaga na wusungu munumbula yake, akafikaje hala ha kabuli. Kabuli yene yavaga malika, na liganga lyavaga ligubikwe ha winjililo. 39 Yesu akalongaje, "Mulihetse ilyo liganga!" Malita muhatsave va yula yo atajiche akamulonjelaje, "Mutwa, antsitse kunung'a, kwakuva ichite siku tsitayi mukabuli!" 40 Yesu akamulonjelaje Malita, "Mbe, singulonje kuta manyi unumbe ukuwuwona wumelemo wa Mulungu?" 41 Ihyo vakalihetsaje lila liganga. Yesu akinulaje miho gake Kilanga kwa Mulungu akusukaje akalongaje, "Dada vangu ntsingukulumba, kwasawuli heve un'nyulika. 42 Ntsin'tsela kuta heve unyulikaga siku tseka, lechelelo ndontsile hino ili vanu vano wolofu wo vimile hano, ili vitumbe kuta heve yo unumile." 43 Hoavaga kulonga ndongwa itso, Yesu akachemaje kwa litsi likomi kuta, "Heve Latsalo, utse kuno kivala!" 44 Yula yo avaga afweye akahumaje kivala, kuno apilingitswe sanda mawoko na magulu gake, na kaha avaga awopitwe chitambala kumiho. Yesu akavalonjelaje, mumuwopole na kumuleka abite.

45 Ihyo vala Vayawudi wolofu wovavaga vatsitse kumuhongetsa Maliyamu, hovavaga kuwona ndongwa tsila, vakamutumbaje Yesu. 46 Lechelelo vanji vakabitaje kwa Mafwalisayo na kuvalonjela ndongwa itso tso adisile Yesu. 47 Ihyo vavina va vatawula nambiko hamwe na Mafwalisayo, vakavikaje chikalo mulibalatsa na kiputsa kuta, "Tun'dita chichi? Munu yuno an'dita ndajilo ntsolofu. 48 Manyi tumuleche endelele hihinago kudita ndajilo, chila munu akumutumba, na vatavala va ku Lumi vakutsa na kutuhetsela mamulaka getu ga Nyumba ya Mulungu na inyi yetu!" 49 Munu yumwe hagati hawo yo achemwaga Kayafwa, yo avaga muvina vatawula nambiko mwaka gula, akavalonjelaje, "Henye nambe mutsele chinu chochive! 50 Mbe, henye simun'tsela kuta chiba munu yumwe afwe kwasawuli ya vanu, kuliko kwananjika kwa inyi yeka?" 51 Lulongwa ulo si alontsile kwa mahotso gake mwene, ila kwakuva avaga Muvina va Vatawula nambiko mwaka ugo, alontsile ndongwa tsa kulutalo kuta Yesu akufwa kwasawuli ya inyi ya Vayawudi. 52 Wala siyo kuta akufwa kwasawuli ya inyi iyo ya Vayawudi ng'ani, ila kwasawuli ya kuvakong'asa vana va Mulungu wo vatagalye vave wovamwe. 53 Ihyo kuhuma chimunyi icho vakantsaje kusaka hila fyo vafuluche vamukopole Yesu. 54 Yesu akalekaje kujenda kanji hono helu hagati ha Vayawudi, ila akibagulaje na kubita hono ho halihabehi na kumbuga, mbaka ku chijiji cho chinchemwa Efulahimu, akikalaje kuko hamwe na vadahitswa vake. 55 Luvala lwa Liwungo lya Pasaka ya Vayawudi lyavaga habehi kufika, na vanu wolofu vavaga vahumye ku fijiji na kubita ku Yelusalemu, ili liwungo lya Pasaka holikuva ling'acha kufika vave vivisile chang'ani kwasawuli ya Mulungu. 56 Vanu vavaga vangumusaka Yesu, nawo hovavaga vimile mu Nyumba ya Mulungu vakalonganaje na kiputsa kuta, "Mbe, munu yula siafuluche atse ha Liwungo lino?" 57 Vavina va vatawula nambiko na Mafwalisayo vavaga valajitse kuta, manyi munu yoyuve manyi atsele hoali Yesu, avalonjele ili vakamubate.