1 Yesu hoavaga kusinda kulonga ndongwa itso, akagalamilaje Kilanga kwa Mulungu na kulonga kuta, Dada luvala mwanga lufisile. Umutsumitse mwanago ili mwanago nayo akutsumitse. 2 Kwasawuli wamupelye mwanago mamulaka kwa vanu veka, ili avepele wumi wo wugaya wudugo, vala veka wo umupelye. 3 Wumi wo wugaya wudugo wo uwu, vakutsele heve va wiyena Mulungu va wukweli, na vamutsele Yesu Chilisito yo wamutumile. 4 Heni ngutsumitse heve muinyi kwa kukwitsa katsi yila yowamelye ntsiyidite. 5 Lelo Dada untumitse halutalo hako kwa wula wumelemo wontsali nawo hamwe na heve hoyavaga inyi ying'acha kuwumbwa.

6 Ngudisile utambulwe kwa vanu vala wo wamelye kuhuma ku inyi. Vavaga vanu vako nave ukamelaje vave vangu, nawo vatsidiche ndongwa tsako. 7 Lelo sambi vangulukagula kuta fyeka fyo wamelye fyahumye kwako. 8 Heni ntsavadahitse ndongwa tsila tso wamelye, nawo vatsanuche na vakalukagulaje nachene kuta heni ntsahumye kwa heve, na kaha vitumbye kuta heve yo wanumile. 9 "Ntsinguvasuchila iwo, nambe ntsivasuchile vanu va inyi tseka, ila ntsiguvasuchila vala ng'ani yo wamelye kwasawuli iva wo vako. 10 Vanu vangu veka wo vako, na vanu vako veka wo vangu, na wuvina wangu wugubulwe mugati mwa vanu iwo wo umelye. 11 Lelo heni ntsin'wuka muinyi na ntsinkutsa kwa heve, lechelelo vene vang'acha vali muinyi. Dada va wiyeka, dedede ntsinsuka uvadite vave kota heve fyo uli, na kaha vave na wumwe kota hetwe fyotuli na wumwe. 12 Hontsavaga nawo heni, ntsavimililaga na kuvavika vikale finofu kota fyo un'gana heve. Heni ntsavimilye na kuduhu nambe yumwe yo ayatsile ila yula yo aganikaga kuyaga, ili Mandiko gako gakwile. 13 Lechelelo ntsinkutsa kwa heve, heni ntsavalonje ndongwa itso luvala hontsavaga ntsing'acha ntsing'ali muinyi, ili vave na wuhechelelo wangu wowukwilye mugati mwawo. 14 Ntsivapelye lulogwa lwako, nawo vanu va muinyi vavavipye kwasawuli vene siyo va muinyi, kota hila heni si ntsili va muinyi. 15 Sintsinsuka kuta uvahetse muinyi, ila ntsinsuka uvamile na lila Linya wubi. 16 Vene siyo va muinyi yino, kota heni fyo sintsiva muinyi yino. 17 Uvadite chang'ani ili vave vako, kwasawuli lulongwa lwako lwa wukweli. 18 Kota hila fyo wanumile heni muinyi, na heni ntsinguvatuma vene muinyi. 19 Ntsingitawula ntsimwene kwa heve, ili nawo vapate fwayida. Vaditwe vave vako kwa wula wukweli wako.

20 "Sintsinguvasuchila vene ng'ani, ila ntsinguvasuchila na vala veka wo vakunumba kwa kuluhulika lulogwa lwawo, 21 ili vave vamwe kota hila heve Dada fyo uli mugati mwangu na heni fyontsili mugati mwako, nawo vave mugati mwetu, ili inyi yidahe na kitumba kuta heve yo wanumile heni. 22 Wutsumitso wula wo wamelye na heni ntsivapelye vene, ili vave vamwe kota hetwe fyo tuli vamwe. 23 Heni ngikala mugati mwawo na heve ukikala mugati mwangu, ili vave vakwitswe nachene kwa kuva vamwe, ili vanu va inyi vatsele kuta heve wanumile heni, kaha unguvagana vene kota fyo ukanganile heni.

24 "Dada! Vanu veka wo umelye heni ntsin'gana vave hamwe na heni hono hala hontsili, ili vavetse kuwuwona wuvina wangu wo wamelye, kwasawuli wanganile hala ho ying'acha kuwumbwa inyi. 25 Bee, Dada yo uditaga ndongwa tsa wuwuya luvala lweka! Vanu va muinyi sivakutsele, lechelelo heni ngutsele nawo vatselye kuta heve yo wanumile. 26 Heni ntsavadisile vakutsele heve, na kaha ngwendelela kuvadita vakutsele, ili wugano wula wo wanganile heni wuve mugati mwawo, na heni ntsive mugati mwawo."