1 Lechelelo Yesu akabitaje kuchidunda cha Mitseyituni. 2 Hamitondo iyage hamilawu Yesu akatsaje kaha Munyumba ya kitang'anila Vayawudi, na vanu veka vakamupilimaje, akikalisaje na kwantsa kuvadahitsa. 3 Vadahitsi va malajitso ga Musa na Mafwalisayo vakamuletaje mudala yumwe yoali ibatiche an'dita waafu, vakamuvikaje hagatinagati ha vanu veka. 4 Iho vakamuputsaje, mudahitsi, Mudala yuno tumwibite an'dita waafu. 5 Malajitso ga Musa gatulajitsaga kuta vadala kota vano tuvatove na maganga mbaka vafwe, ino lelo heve unlonga ndawuli? 6 Valongaga ihyo kwa kumujela, ili vapate chambutso cha kumuhiga. Lechelelo Yesu akahonamaje hasi, na kwantsa kwandika hasi kwa chala chake. 7 Hovavaga kwendelela kumuputsaputsa, Yesu akinukaje akavalonjelaje, "Manyi hana munu yoyuve hagati henyu yo angiwona alihela ndongwa ntsibi, alongole kumutova na maganga." 8 Akahonamaje kaha na kwantsa kwandika hasi. 9 Vavaga kuhulika lulongwa ulo, vakantsaje kuwuka yumwe yumwe, kwantsila vagogolo mbaka akasigalaje Yesu aliyena, na yula mudala yo avaga imile halutalo hake. 10 Yesu ho avaga kwinula mutwi siamuwene munu yunyi, ila yula mudala ng'ani, ihyo akamuputsaje, Bee, mudala! Valikwiya vala vanu wovakuhigije kuta una nongwa? 11 Mudala yula akamupitulaje, "Muvina haduhu nambe yumwe." Nayo Yesu akamulonjelaje, "Na heni singukuhiga. Duve ubite, ulekaje kudita ndongwa ntsibi kanji."

12 Ihyo Yesu akavalonjelaje kaha, "Heni yo mwangatsa gwa vanu va inyi tseka, munu yoyuve yo akufwata heni siakujenda mujitsa, lechelelo akuva na mwangatsa gwa wumi." 13 Mafwalisayo vakamulonjelaje, "Ndongwa itso tso ungutulonjela kwajili ya heve, ndonga iyo siyikudichilwa." 14 Yesu akavapitulaje, "Heni nambaje ntsingilonjela ntsimwene, ndonga yangu ya wukweli, kwakuva heni ntsin'tsela konyumye na kontsimbita. Lechelelo henye simukutsele konyumye wala kontsim'bita. 15 Henye munhiga kota vanu fyo vahigaga, lechelelo heni sintsimuhigaga munu yoyuve. 16 Lechelelo nambaje ntsingumuhiga munu, wuhigo wangu wa wuwuya, sinambe nyije ntsiliyena, ila nyigaga hamwe Dada yo anumile. 17 Kaha mu malajitso ga Musa yandikwe kuta, cho vanlongaga vanu vavili tsivaga tsa wukweli. 18 Heni ntsingilonjela ntsimwene, nayo Dada vangu yo anumile nayo fyo anlonga." 19 Ihyo vakamuputsaje, "Yuyo Dada vako alikwiya?" Yesu akavajibulaje, "Henye simuntsele heni kuta ntsi nani, na kaha simumutsele Dada vangu. Mukamuntsele heni, muka kumutsela na Dada vangu." 20 Yesu alontsile ndongwa itso hoavaga an'dahitsa mu Nyumba ya Mulungu, habehi na chumba cho chavaga na sandiko ya kuvichila magobole. Lechelelo kuduhu munu yoyuve yo avetsitse kumubata kwasawuli luvala lwake lwavaga lung'ali kufika.

21 Yesu akavalonjelaje kaha, "Heni ntsim'mbita na henye mukusaka, na henye mukufwa mu ndongwa tsenyu ntsibi. Kontsim'bita heni henye simukuvetsa kufika." 22 Ihyo vavina va Vayawudi vakalongaje "Mbee akikopola? Kwasawuli yachi alontsile kuta kontsim'bita heni henye simukuvetsa kufika?" 23 Yesu akavalonjelaje, "Henye munhumila bahanago hasi, heni nyumye Kilanga kwa Mulungu. Henye yo muva mu inyi, heni sintsili va mu inyi yino. 24 Hamutalo ntsali ntsivalonje kuta mukufwa mu ndongwa tsenyu ntsibi. Kwakuva manyi muleche kitumba kuta heni yo ntsimwene, mukufwa mu ndongwa tsenyu ntsibi." 25 Nawo vakamuputsaje, "Heve uli nani?" Nayo Yesu akavapitulaje, "Heni yo yula yo mbeye ntsinguvalonjela kuhuma hamutalo."

26 "Ntsinatso ndongwa ntsolofu tsa kuvalonjela na tsa kuvahiga henye. Lechelelo mwene yo anumile yo va wukweli, na heni ntsinlonga na vanu va inyi tseka ndongwa tsila tso ntsahuliche kuhuma kwake." 27 Vene sivakatselaga kuta Yesu avaga anlongana nawo ndongwa tsa Dada vake. 28 Kaha Yesu akavalonjelaje, "Hala homukuva mumwinwe Mwana va Munu muchanya mwa mubichi, iho homukutsela kuta, heni yo yula, ngalontsile hino heni sinditaga chinu kota fyo ntsin'gana, ila nditaga kota fyo andahitse Dada vangu. 29 Mwene yula yo anumile alihamwe na heni, siandesile ntsiyena, kwakuva siku tseka nditaga ndongwa tsila tso tsingumugan'ya." 30 Vanu wolofu wovamuhuliche Yesu ho alongaga ndongwa itso, vakamutumbaje.

31 Ihyo Yesu akavalonjelaje vala Vayawudi wovavaga vamutumbye, "Manyi mukalalile kutsidita ndongwa tsangu, mukuva vadahitswa vangu kweli kweli. 32 Kahi mukuwutsela wukweli nawo wukweli wukuvadita mulechelwe." 33 Vene vakamupitulaje, "Hetwe tuli lulelo lwa Ibulahimu, sitwali tuva vapogotsi va munu luvala loluve, nave unlonga ndawuli kuta, mukulechelwa?" 34 Yesu akavalonjelaje, "Ntsinguvalonjela wukweli kuta chila munu yo an'dita ndongwa ntsibi akuva mupogotsi va ndongwa ntsibi. 35 Mupogotsi saikalaga hakaye lwahisho, lechelelo mwana munyakaye yo ikalaga mukaye lwahisho. 36 Ihyo manyi Mwana avadite mulechelwe, mukulechelwa nachene. 37 Ntsin'tsela kuta henye yo muli lulelo lwa Ibulahimu. Nambe isho mun'gana kung'opola kwasawuli ndongwa tsangu tsilimuduhu munumbula tsenyu. 38 Heni ntsinguvalonjela ndongwa tsila tso ntsatsiwene hala hontsavaga na Dada, hihyo na henye mun'dita ndongwa tsila tso muhuliche kuhuma kwa dada venyu."

39 Vene vakamupitulaje, "Dada vetu yo Ibulahimu." Yesu akavajibulaje, muka muve muli vana va Ibulahimu, muka kuditaga ndongwa tso aditaga Ibulahimu. 40 Lechelelo henye sambi mun'gana kung'opola heni yo ntsivalonje wukweli, wo nyuliche kwa Mulungu. Ibulahimu siadisile lulongwa kota ulo! 41 Henye mun'dita ndongwa tsila tso an'dita dada venyu. Vakamupitulaje, "Hetwe si tuli vana wotwaleliche mu waafu, tunayo Dada vetu yumwe duve, nayo yo Mulungu." 42 Yesu akavalonjelaje, "Manyi Mulungu aka ave yo Dada venyu mukakungana, kwakuva ntsahumye kwa Mulungu na sambi ntsili hano. Heni sintsatsitse kwa kiganila ntsimwene, ila kwajili ya mwene yo anumile. 43 Sinambe mwelewe madahitso gangu, kwasawuli sinambe muvetse kuhulika chontsinlonga. 44 Henye muli vana va dada venyu Lisoka, nanye mun'gana kukwitsa mbiniwo tsa dadenyu. Mwene uyo akopolaga kuhuma hamutalo, sinambe imilile wukweli, kwakuva alihela wukweli mugati mwake. Ho anlonga wudesi, alongaga kota fyoali mwene, kwasawuli mwene yo mudesi na yo dada va uwo wudesi. 45 Heni ntsinlonga wukweli, henye mulema kunumba. 46 Mbe, hagati henyu hoyoli munu yoyuve yo afuluche alonje kuta heni ntsimunu munya ndongwa ntsibi? Manyi ntsinguvalonjela ndongwa tsa wukweli, kwasawuli yachi mulema kunumbila? 47 Munu yoyuve yo anhuma kwa Mulungu ahulikaga chila cho anlonga Mulungu. Henye sinambe muhulikitse ndongwa tsa Mulungu, kwasawuli henye si munhuma kwa Mulungu."

48 Vayawudi vakamupitulaje Yesu, "Mbe, hetwe situnlonga wukweli kuta heve uli munu va ku Samaliya na kaha kuta heve una lihoka?" 49 Yesu akavapitulaje kuta, "Heni ntsihela lihoka, ila ntsingumuhesimila Dada vangu, lechelelo henye sinambe mumuhesimile. 50 Lechelelo heni sintsinsaka wuvina wangu, ila koyoli yo ansachila heni wuvina, nayo yo mulamutsi. 51 Ntsinguvalonjela wukweli, munu yoyuve yo akudita ndongwa tsangu si akufwa siku tseka." 52 Ihyo, Vayawudi vakamulonjelaje Yesu, "Lelo tutselye kuta una lihoka! Manyi Ibulahimu afweeye na valoli va Mulungu nawo vafweye, lechelelo yiveye ndawuli heve unlonga, munu yoyuve yo akudita ndongwa tsangu si akufwa siku tseka? 53 Mbe, heve uli muvina kulutila dada vetu Ibulahimu yo afweye na valoli va Mulungu nawo vafweye? Heve unhotsa kuta uli nani?" 54 Yesu akavapitulaje, "Manyi ntsidutse tsimwene wuvina wangu wukuva siyo chinu. Dada vangu yo antsumitsa, yoyuyo na henye yo munlonga kuta yo Mulungu vetu. 55 Henye simwamutselaga, lechelelo heni ntsimutsele. Manyi ndonje kuta sintsimutsele nguva tsimudesi kota henye. Lechelelo heni ntsimutsele na kutsidita cho anlonga. 56 Kukwenyu Ibulahimu ahechelye kwasawuli ya hila fyo ayiwene siku yangu, nayo akayiwene na akahechelelaje." 57 Vayawudi vakamuputsaje, "Heve siufisise nambe miyaka hamusini, nave unlonga kuta wamuwene Ibulahimu?" 58 Yesu akavalonjelaje, "Ntsinguvalonjela wukweli, Ibulahimu hoavaga ang'ali kuleleka, heni mwanga ntsali koyoli." 59 Ihyo vakaholaje maganga ili vamutove, lechelelo Yesu akafihamaje na akahumaje mula mu Nyumba ya Mulungu.