1 Yesu akavalonjelaje, "Ntsinguvalonjela wukweli kuta, munu yoyuve yo ankwinjila mu ligagala lya ng'olo kukolela mu lwitsi, lechelelo ankwinjila mugati kwa kukola hono hanji, uyo muhitsi na muwumiyani. 2 Mwene yo ankwinjila kwa kukolela ha lwitsi uyo yo mudimi va ng'olo. 3 Mwimilitsi umudindulilaga lwitsi, na ng'olo yihulikaga litsi lyake. Nayo atsichemaga ng'olo tsake kwa matawa gawo na kutsisindika kivala. 4 Manyi atsihumye kivala, atsilongolaga kulutalo natso ng'olo tsimufwataga kwasawuli tsilitsele litsi lyake. 5 Ng'olo itso sitsikumufwata mujentsi, ila tsikumubilima, kwasawuli sitsilitsele litsi lya mujentsi." 6 Yesu avalonje kwa muhwano ugo, lechelelo vene sivavaga vantsela chila cho avalonjelaga.

7 Ihyo Yesu akavalonjelaje kaha, ntsinguvalonjela wukweli kuta heni ntsi lwitsi lwa ng'olo. 8 Veka wo vandongwe iwo vahitsi na vawumiyani, lechelelo ng'olo sitsikavahuliche. 9 Heni ntsi lwitsi munu yoyuve yo akwinjila kwa kukolela kwa heni akukuluka, akwinjila na kuhuma kivala, natso tsikupata hono ho tsikulya. 10 Muhitsi atsaga ili kuhitsa, kukopola na kwananga. Heni tsatsitse ili vave na wumi, kaha vave nawo wumi wo wukwilye. 11 Heni ntsi mudimi muwuya. Mudimi muwuya atawulaga wumi wake kwasawuli ya ng'olo. 12 Mudimi va kuhombwa yula yo ng'olo siyo tsake, hala manyi ayiwone ngwami yinkutsa, abilimaga na kutsileka ng'olo, na ngwami tsitsibataga na kutsitagalitsa. 13 Abilimaga kwasawuli mwene yo mudimi va kuhombwa, na ndongwa tsa ng'olo kwake si chinu ndaya. 14 Heni tsi mudimi muwuya. Ntsitsitsele ng'olo tso tsangu na ng'olo tsangu tsintsele heni, 15 kota hila Dada fyo an'ngana heni, na heni fyo ntsingumugana Dada vangu. Hihyo na heni ntsilichang'ani kutawula wumi wangu kwajili ya ng'olo tsangu. 16 Ntsinatso ng'olo tsinji tsositsa mwigagala lino, natso ntsin'ganika ntsitsilete hotsili. Natso tsikutsela litsi lyangu, na ihyo kukuva na chipinga chimwe na mudimi yumwe. 17 Chinu cho an'ganila Dada vangu cho ichi, ntsinguwutawula wumi wangu ili ntsiwutegule kanji. 18 Kuduhu munu yo akunyetsela wumi wangu, ila ntsinguwutawula kwakugana ntsimwene. Ntsina wuvetso wa kuwutawula na kaha ntsinawo wuvetso wa kuwutegula kanji. Lilajitso lino ntsanuchye kuhuma kwa Dada vangu. 19 Vayawudi hovavaga kuhulika ndongwa itso tsa Yesu vakatelanaje. 20 Vamwinga vakalongaje, uyuno ana lisoka na kanji ana lukwale! Kwasawuli yachi mungumuhulikitsa? 21 Vamwe vakalongaje, "Ndongwa tsa ihyo siafuluche alonje munu munya lihoka. Mbe, lisoka lifuluche limuponetse miho munu chibofu?"

22 Lulavala ulo kuko Yelusalemu kwavaga na liwungo lya kuyivika kaha chang'ani Nyumba ya Mulungu kwasawuli ya Mulungu. Nalo lwavaga luvala lwa chisisima. 23 Nayo Yesu avaga an'jenda mugati mwa Nyumba ya Mulungu, mulidama lya Selemani. 24 Vayawudi vakamukong'anilaje na kumuputsa kuta, "Ukutuvika mu mahotso na kiputsa munumbula tsetu mbaka hanili? Manyi heve yo Chilisito, chiba utulonjele bila kufiha." 25 Yesu akavapitulaje, "Mwanga ntsivalonje lechechelo henye sinambe munumbe. Katsi tsino tso ntsin'dita kwa mamulaka ga Dada vangu, itso tsin'ndajila kuta heni yo nani. 26 Lechelelo henye sinambe munumbe heni, kwasawuli henye simuli ng'olo tsangu. 27 Kota hila ng'olo fyo tsilihulikaga litsi lya mudimi vawo, na vanu vangu vanguchitsela cho ntsinlonga. Ntsinguvatsela nawo vaveye vadahitswa vangu, 28 na heni ntsinguvapela wumi wo wugaya wudugo, na sivakuhogola kulekana na Mulungu. Kaha kuduhu munu yo akuvasukula mu mawoko gangu. 29 Dada vangu yo amelye vanu iwo, nayo yo muvina kulutila veka, na kaha kuduhu munu yo akuvetsa kuvasukula kuhuma mu mawoko gake. 30 Heni na Dada vangu tuli chinu chimwe." 31 Ihyo Vayawudi vakaholaje kaha maganga ili vamutove Yesu. 32 Lechelelo Yesu akavalonjelaje, "Ntsivalaje ndajilo ntsolofu na ngomi kuhuma kwa Dada. Ino lelo mundonjele, kwasawuli ya ndajilo yachi hagati ha itso mun'gana munove kwa maganga?" 33 Vayawudi vakamupitulaje, "Situngukutova na maganga kwasawuli ya katsi nofu tso udisile, ila tungukutova kwasawuli ya kumuliga Mulungu! Heve uli munu hela ila ungidita kuta unakota Mulungu." 34 Yesu akavapitulaje, "Mbe, siyandikwe mu Mandiko ga Mulungu kuta, henye munakota Mulungu? 35 Manyi vanu vala wo va pelitwe Mandiko ga Mulungu vihwana na mwene, lulongwa ulo luli hihyo kuta Mandiko ga Mulungu ga wukweli siku tseka. 36 Mbe, mufuluche muvetse ndawuli kumulonjela yula yo atawulwe na Dada kwa katsi yake na kumutuma ku inyi, kuta anliga kwasawuli ndontsile, heni yo Mwana va Mulungu? 37 Manyi nambe ng'ole katsi tsa Dada, muleche kunumba. 38 Lechelelo manyi yive ntsinkola katsi tsa Dada, na muvaje mulema kunumba heni duve mutsitumbe itso katsi, ili mutsele kuta Dada ali mugati mwangu na heni ntsili mugati mwa Dada." 39 Vakajelaje kaha kumubata, lechelelo Yesu akavapulusukaje mumawoko gako. 40 Yesu akalowaje kaha mwambu gwa lulenga lwa Yolidani, hono hala ho Yohana avaga am'batitsa vanu na kikala kuko. 41 Vanu wolofu vakabitaje kwa Yesu, na vakavaje vanlonga kuta wukweli Yohana siadisile nambe ndajilo yimwe, lechelelo chila ndongwa tso alontsile kwajili ya munu yuno tsavaga wukweli. 42 Kuko vanu wolofu vakamutumbaje Yesu.