1 Tsavaga kulutila ndongwa itso, Yesu akabitaje mwambu gwa Bahali ya Galilaya, kwa litawa linji yachemwaga Bahali ya Tibeliya. 2 Lilugu lya vanu lyamufwataga kwasawuli vavaga vatsiwene ndajilo ntsolofu tso avaga avaditye vatamwa. 3 Kaha Yesu akakwinaje kuchidunda, akikalaje kuko hamwe na vadahitswa vake. 4 Liwungo lya Pasaka ya Vayawudi lyavaga habehi. 5 Yesu hoavaga kuvawona lilugu lya vanu linkutsa kwake, akamulonjelaje Fwilipo, "Tukugula kwiya mabumunda ili vanu vano valye?" 6 Yesu amuputsitse ihyo ili amujele Fwilipo, kwasawuli mwene atselaga cho akudita. 7 Fwilipo akamupitulaje, "Nambe tuka tuve na magobole bwelele, sigafuluche gakwile kugula filyo fya kuvakwila vanu vano veka." 8 Mudahitswa vake yumwe yo achemwaga Andeleya, yoavaga mung'olotse na Simoni Petulo akamulonjelaje Yesu kuta, 9 "Hano tunayo mukwamitsi ana mabumunda gahanu ga sayili na somba tsivili. Lechelelo sigakukwila kwa vanu vano veka." 10 Yesu akalongaje, "Muvalonjele vanu vikalise hasi." Hono hala havaga na misoli mifupi. Nawo vanu vakikalisaje, valume vavaga elufu tsihanu. 11 Ihyo Yesu akategulaje mabumunda gala, akamulumbaje Mulungu na kuvagavasila vanu wovavaga vichite hono hala mbaka vakakwilaje, na hihila akavagavilaje na somba tsila, chila munu kota fyo akiguta. 12 Vanu veka vavaga kulya na kiguta, akavalonjelaje vadahitswa vake, "Mutole fipande fya mabumunda fyo fisije ili fileche kuyaga nambe chimwe." 13 Ihyo vakakong'asaje fila fipande fyeka fyofisije na kumemetsa fitangula kumi na fivili kuhuma mu fipande fila fihanu na somba tsivili. 14 Vanu vavaga kuyiwona iyo ndajilo yo adisile Yesu, vakantsaje kulonga kuta, "Nachene uyuno yo Muloli va Mulungu yo akutsa mu inyi!" 15 Yesu hoavaga kutsela kuta vanu van'gana vatse vamuviche kwa ludali ili ave muntsajila vawo, akibagulaje na kubita kahi kuchidunda aliyena.

16 Holyavaga kusota litsuva, vadahitswa vake vakikaje na kubita kulilamba, 17 vakakwinaje mu mutumbwi vakantsaje kulowoka mubahali kubita Kapelinawumu. Luvala ulo mwanga kwavaga na jitsa, na Yesu avaga ang'ali kufika. 18 Lilamba likatigukaje kwasawuli kwavaga na ng'ala ngomi yo yawugaga. 19 Vadahitswa hovavaga vahele lujendo lwa kota chilomita tsihanu awu sita hino, vakamuwonaje Yesu an'jenda mwilanga mululenga alibehi na kufika hamutumbwi, na ihyo vakogopaje. 20 Lechelelo Yesu akavalonjelaje, "Muleche kuva na muloto. Yo heni!" 21 Ihyo vakalamulaje injile mu mutumbwi, na simusika mutumbwi gukafikaje kuinyi ng'afu kovabitaga.

22 Siku ya kavili lila lilugu lya vanu wovavaga vasije mwambu gwa kavili gwa lilamba, vakatselaje kuta hono iho gusije mutumbwi gumwe hela! Nawo vakatselaje kuta na Yesu siavaga ahele hamwe na vadahitswa vake, kwasawuli vadahitswa vake vavaga vahele valiyena. 23 Lechelelo jikatsaje mitumbwi jinji kuhuma ku Tibeliya jikafikaje habehi na hala hovalyeye mabumunda, hono hala Yesu ho avaga kumulumba Mulungu. 24 Ihyo lilugu lila lya vanu holyavaga kutsela kuta Yesu hamwe na vadahitswa vake valihaduhu, vakakwinaje mu mitumbwi ijo vakabitaje ku Kapelanawumu kumusaka Yesu.

25 Vala vanu hovavaga kumuwona Yesu mwambu gula gwa kavili vakamuputsaje, "Bee, Mudahitsi! Ufisile hanili kuno?" 26 Yesu akavapitulaje kuta, ntsinguvalonjela wukweli kuta henye munsaka heni siyo kwasawuli mwawene ndajilo yila, ila kwasawuli mwalyeye mabumunda gala na kiguta. 27 Mulekaje kuchigatsichila chilyo cho chiwolaga, ila muchigatsichilaje chilyo chila cho sichiwolaga mbaka ku wumi wo wugaya wudugo, chilyo cho akuvapela Mwana va Munu yo idichilwe na Dada yo Mulungu. 28 Ihyo vakamuputsaje Yesu, "Tun'ganika tudite ndawuli ili tuyikole katsi ya Mulungu?" 29 Yesu akavapitulaje, "Katsi ya Mulungu yo yino, mumutumbe mwene yo atumilwe na Mulungu." 30 Ihyo vanu vala vakamuputsaje, "Ukutuditila ndajilo yachi ili tuyiwone na kukutumba? Mbe, ukudita lulongwa lwachi? 31 Vakukwetu valyeye chilyo cho chinchemwa mana kula kumbuga, kota fyo yandikwe mu Mandiko ga Mulungu kuta, avapelye chilyo cho chinhuma Kilanga ili valye."

32 Ihyo Yesu akavalonjelaje, "Ntsinguvalonjela wukweli, siyo Musa yo avapelye mabumunda kuhuma Kilanga, ila Dada vangu yo anguvapela henye mabumunda ga kweli kuhuma Kilanga. 33 Kwasawuli libumunda lya Mulungu yo yula yo ankwika kuhuma Kilanga na kuvapela wumi vanu va mu inyi." 34 Vakamulonjelaje Yesu, "Mutwa, kuhuma sambi utupele libumunda ilyo." 35 Yesu akavalonjelaje, heni yo libumunda lya wumi. Mwene yo ankutsa kwa heni si akuwona ntsala, nayo yo an'numba heni si akuwona ng'alu. 36 Lechelelo kota fyo ntsavalonje henye kuta na muvaje mumbwene, ila sinambe munumbe. 37 Vanu vala veka yo akumela Dada vakuva vafwasi vangu, na yoyuve yo ankutsa kwangu singujela kumulema. 38 Kwakuva sintsisile kuhuma Kilanga ili kudita cho ntsin'gana heni, ila kudita cho an'gana mwene yo anumile. 39 Chila cho an'gana yula yo anumile cho ichino kuta, vala vanu veka wo amelye ndekaje kumuyatsa nambe yumwe, ila ntsivatsilipule veka ha siku ya wudugo. 40 Kwakuva chinu chikomi cho anguchigana Dada vangu cho ichi, chila munu yo angumulola na kumutumba Mwana ave na wumi wo wugaya wudugo, na heni nguvatsilipula ha siku ya wudugo. 41 Ihyo Vayawudi vakantsaje kukalala kwasawuli Yesu alontsile kuta, "Heni yo ntsili libumunda kuhuma Kilanga." 42 Vakavaje vanlonga kuta mbe! Uyuno si Yesu Mwana va Yosefu ndaa! Yuve na dade situvatsele ndaa? Yiveye ndawuli anlonga kuta ntisile kuhuma Kilanga? 43 Ihyo Yesu akavalonjelaje, "Mulekaje kikalalila henye kwa henye. 44 Kuduhu munu yo afuluche atse kwa heni, manyi ave siakwetsilwe na Dada yo anumile, na munu uyo heni ngumutsilipula ha siku ya wudugo. 45 Valoli va Mulungu vandiche kuta, vanu veka vakudahitswa na Dada. Munu yoyuve yo akumuhulikitsa Dada na kutsela hila fyo an'dahitsa, uyo atsaga kwa heni. 46 Kuduhu munu yo yuve yamuwene Dada, ila munu yula yoahumye kwa Mulungu, uyo yo amuwene Dada. 47 Ntsinguvalonjela wukweli, yo an'numba heni uyo anawo wumi wo wugaya wudugo. 48 Heni yo libumunda lya wumi. 49 Vakukwenyu valyeye chilyo cho chinchemwa mana kumbuga, na vakafwaje. 50 Lechelelo ihano hana libumunda lyo lihumye Kilanga, ili chila munu yoyuve yo akulya aleche kufwa. 51 Heni yo ntsili libumunda lyo linya wumi lyo lihumye Kilanga. Munu yoyuve yo akulya libumunda ili akikala bila wudugo. Libumunda lyo ntsinguvapela go muvili gwangu, go ntsingugutawula kwajili ya wumi wa vanu veka va mu inyi tseka." 52 Vayawudi vakantsaje kulongana vene kwa vene, "Munu yuno akuvetsa ndawuli kutupela hetwe muvili gwake ili tulye?" 53 Kaha Yesu akavalonjelaje, "Ntsinguvalonjelani wukweli kuta, manyi muleche kulya muvili gwa Mwana va Munu na kung'wa danda yake, simukuva na wumi mugati mwenyu. 54 Chila munu yo ankulya muvili gwangu na kung'wa danda yangu, uyo anawo wumi wo wugaya wudugo, na heni ngumutsilipula siku ya wudugo. 55 Kwasawuli muvili gwangu cho chilyo cha wukweli, na danda yangu yo chinu cha kung'wa cha wukweli. 56 Munu yo ankulya muvili gwangu na kung'wa danda yangu, akikala mugati mwangu na heni ngikala mugati mwake. 57 Kota hila Dada yo mumi fyo anumile, na heni ntsi mumi kukolela kwa mwene, hohihyo munu yo akuntsilya akuva mumi kukolela kwa heni. 58 Ili lyo libumunda lyolisile kuhuma Kilanga, siyo kota mana yila yo valyeye vakukwenyu na hambele vakafwaje. Munu yo akulya libumunda ili akuva na wumi wo wugaya wudugo." 59 Yesu alontsile ndongwa intso hala ho avadahitsaga umo mu nyumba ya kitang'anila Vayawudi uko ku Kapelinawumu.

60 Ihyo vafwasi wolofu va Yesu hovavaga kuhulika ihyo vakalongaje, "Ndongwa itsi nalamu hilo! Nani yo afuluche kutsihulukitsa?" 61 Yesu akatselaje mu numbula yake kuta vafwasi vake vakale kwasawuli ya lulongwa ulo, ihyo akavaputsaje, "Mbe, lulongwa ulu luvadisile mukalale? 62 Lelo yikuva ndawuli, ho mukumuwona Mwana va Munu ho akuva am'bita Kilanga uko koavaga iho hamutalo? 63 Muhe va Mulungu yo atawulaga wumi, muvili sigufwayaga chinu. Ndongwa itsi tso ntsivalonje go Muhe kaha tso wumi. 64 Hamwe na ihyo kovali vanu hagati henyu yo valihela litumbilo." Yesu alontsile ihyo kwakuva antselaga kuhuma hamutalo kuta vanani wo sinambe vamutumbe, nayo atselaga kuta nani yo akumupituka. 65 Kaha akavalonjelaje, kwasawuli ya iyo ntsavalonje kuta kuduhu munu yo akuventsa kutsa kwa heni manyi aleche kuchemwa na Dada vangu. 66 Kwasawuli ya ndongwa itso vafwasi vanji wolofu vapilwiche kumbele, vakamulekaje. 67 Yesu akavaputsaje vala vadahitswa kumi na vavili kuta Mbe, na henye mun'gana kuwuka? 68 Simoni Petulo akamupitulaje, "Mutwa Yesu, tuwuche tubite kwa nani? Heve unatso ndogwa ntsa wumi wo wugaya wudugo. 69 Hetwe tun'tumba, na kaha tutselite kuta heve yo Muhagulwa va Mulungu." 70 Yesu akavalonjelaje, "Mbe, singavahagwe henye kumi na vavili? Nambe ihyo yumwe venyu yo Lihoka!" 71 Yesu alontsile ihyo kwasawuli ya Yuda mwana va Simoni Isikaliote. Uyo yo akumupituka, nambe avaga muyawo va vadahitswa vala kumi na vavili.