1 Siku ya kadatu kwavaga na lintsenjele ku muji gwa Kana, kumukova gwa Galilaya. Nayo yuve va Yesu avaga kuko, 2 nayo Yesu hamwe na vadahitswa vake vavaga valibulitswe mwitsenjele ilyo. 3 Difwayi hoyavaga kusila, yuve va Yesu akamulonjelaje Yesu kuta, "Difwayi yisisile!" 4 Yesu akamupitulaje yuve kuta, "Uleche kundonjela chinu cho ntsin'ganika kudita, luvala lwangu lwa kuludita lulongwa ulo lung'ali kufika." 5 Ihyo yuve va Yesu akavalonjelaje vala vatantsi va hala haliwungo, "Chinu chochive cho akuvalonjela henye muditaje." 6 Kuko kwavaga na fitsilo sita fya kuvichila malenga fyo fyali fiwuyipwe kwa maganga kwasawuli kukalavila Vayawudi, ili kivika chang'ani kwa kumufugamila Mulungu kwa ntsovelo tsawo, chila chimwe chavaga chifuluche chimeme madebe gahanu ga malenga. 7 Yesu akavalonjelaje vala vatantsi, "Mufimemye malenga fitsilo ifyo." Nawo vakafimemyaje malenga fitsilo fila mbaka mwilanga. 8 Kaha akavalonjelaje, "Lelo muneje mumusindichile muvina va litsenjele." Ihyo vakanegaje na kumusindichila. 9 Muvina va liwungo lila avaga kuwontsa malenga akatselaje kuta gagaluche na kuva difwayi. Mwene bila kutsela koyihumye difwayi iyo, ila vala vatantsi wovanetsile malenga gala vatselaga. Muvina va litsenjele akamuchemelaje halubali yula mukweli, 10 na akamulonjelaje kuta, "Chila munu alongolaga kuleta difwayi nofu, lechelelo manyi awone vanu vang'weye ndalahela, hawudugo aletaga yila yoyitsolwiche. Lechelelo heve uvisile difwayi nofu mbaka sambi!" 11 Iyino yo ndajilo ndongola yo adisile Yesu uko ku muji gwa Kana ya Galilaya, akalajilaje wuvetso wake nawo vadahitswa vake vakamutumbaje. 12 Hotsavaga kulutila ndongwa itso, Yesu akikaje hamwe na yuve, na vang'olotse, na vadahitswa vake mbaka ku Kapelinawumu vakikalaje kuko kwa siku nunga.

13 Liwungo lya Pasaka ya Vayawudi holyavaga kuva habehi, ihyo Yesu akakwinaje kubita ku Yelusalemu. 14 Hala ha Nyumba ya Mulungu akavafikaje vanu van'gutsa senga, na ng'olo, na ng'unda, na vanji vavaga vichite mumetsa vanfutsa magobole. 15 Akabotaje mukotya gwa ndejehe, akavavingaje vabite kivala hamwe na senga ng'ambaku na ng'olo tsawo. Akatsibindulangaje metsa tsawo vala wovabadilasaga magobole ha Nyumba ya Mulungu, na kuboholanga magobole gawo. 16 Akavalonjelaje vala wovagutsaga ng'unda kuta, "Muhetse finu fino hono hano! Muleche kuyidita Nyumba ya Dada vangu kuva hono ha kugutsila finu?" 17 Vadahitswa vake vakiwukaje kuta yandikwe mu Mandiko ga Mulungu hino, "Wugano wa Nyumba yako wukunetsa." 18 Vayawudi vamwe vakamuputsaje Yesu, "Mbe, ufuluche udite ndajilo yachi yo yikutulajila kuta heve unago mamulaka ga kudita ndogwa tsino?" 19 Yesu akavapitulaje, "Muyigwise Nyumba yino ya Mulungu, na heni nguyitsenga kwa siku tsidatu!" 20 Vala Vayawudi vakamulonjelaje Yesu, "Nyumba yino ya Mulungu yatsentsilwe kwa myaka alubayini na sita. Lechelelo heve unlonga ndawuli kuta ukuyitsenga kwa siku tsidatu?"

21 Yesu alontsile ihyo siyo kwasawuli ya Nyumba ya Mulungu, ila alongaga kwasawuli ya muvili gwake. 22 Yesu hoavaga kutsilipulwa, vadahitswa vake vakiwukaje kuta mwanga avaga alontsile ndongwa itso, ihyo vakagatumbaje ndongwa tsake na Mandiko ga Mulungu.

23 Yesu hoavaga ku Yelusalemu kuliwungo lya Pasaka, vanu wolofu hovavaga kutsiwona ndajilo na mitinuso jo aditaga, vakamutumbaje. 24 Lechelelo Yesu siavahuvye litumbilo lyawo kwa mwene, kwasawuli avatselaga veka hila fyovali munumbula tsawo. 25 Siyaganikaga vanu vamulonjele Yesu lulongwa loluve lwa munu, kwasawuli atselaga ndongwa tseka tsotsili mu numbula tsa vanu.