1 Mafwalisayo vakahulikaje kuta Yesu avaga avadisile vanu wolofu kuva vadahitswa na kuvabatitsa kulutila Yohana. 2 Yesu mwene siavabatitsaga, ila vadahitswa vake wo vabatitsaga. 3 Ihyo Yesu hoavaga kuhulika ndongwa itso, akawukaje ku inyi ya Yudeya akawuyaje kanji ku Galilaya. 4 Luvala ulu aganikaga akolele hagati ha Samaliya. 5 Akafikaje ha muji gumwe gwa Samaliya gogunchemwa Sikali, habehi na gula mugunda go Yakobo amupelye Yusufu mwanage. 6 Hono iho havaga na chisima cha Yakobo, nayo Yesu avaga ichite hala kwasawuli avaga afuluje kwa lujendo, akatambalitsaje halubali ha chisima. Yavaga kota sa sita ya hamunyi. 7 Akatsaje mudala yumwe va inyi ya Samaliya kudeha malenga, na Yesu akamulonjelaje, "Ntsisuka malenga ntsing'we." 8 Luvala ulo vadahitswa vake vavaga vahele ku mujini kugula filyo. 9 Mudala yula akamupitulaje, "Heve uli Muyawudi na heni ntsili mu Samaliya! Yiveye ndawuli heve unsuka kwa heni malenga ga kung'wa?" Vayawudi si vitangaga kwa chinu chochive na hetwe Vasamaliya. 10 Yesu akamupitulaje, "Manyi ukautsele fifunje fyo atawulaga Mulungu, nayo yo nani yo angukusuka, umele malenga ntsing'we. Ukakumusuka mwene nayo akakukupela malenga ganya wumi wo wugaya wudugo." 11 Yula mu mudala akamupitulaje, Mutwa, heve ulihela chinejelo cha malenga na chisima chino chitali, ukupata kwiya malenga ganya wumi wo wugaya wudugo? 12 Mbe, heve uli muvina kulutila dada vetu Yakobo, yo atupelye hetwe chisima chino, na mwene hamwe na vanage na fidimwa fyake vang'waga malenga gano? 13 Yesu akamupitulaje, "Chila yo akung'wa malenga gano akuwona ng'alu kanji, 14 lechelelo vanu veka yo akung'wa malenga go ngumupela heni si akuwona ng'alu kanji. Malenga go ngumupela gakuva ntsasa ya wumi wowugaya wudugo mugati mwawo."

15 Yula mudala akamulonjelaje Yesu kuta, "Mutwa ntsisuka umele malenga igo ili ndeche kuwona ng'alu kanji, na ndekaje kutsa hano kunega malenga."

16 Yesu akamulonjelaje yula mudala, "Ubite ukamucheme mulume vako, mutsase hano." 17 Yula mudala akamupitulaje, "Heni ntsilihela mulume," Yesu akamulonjelaje, "Ulontsile wukweli kuta ulihela mulume. 18 Kwasawuli mwanga uka utoliche na valume vahanu, nayo yo mungikalasa sambi uyo nayo siyo mulume vako, ihyo ulontsile wukweli." 19 Yula mudala akamulonjelaje Yesu kuta, "Mutwa, ntsin'wona heve uli muloli va Mulungu. 20 Vakukwetu Vasamaliya vafugamaga mu chidunda chino, lechelelo henye Vayawudi mulongaga kuta tun'ganika tukafugame uko ku Yelusalemu." 21 Yesu akamulonjelaje, "Heve yuva un'ganika unumbile, kuna luvala lo lukutsa henye simukuganika kumusuka Dada mu chidunda chino awu kula ku Yelusalemu. 22 Henye Vasamaliya munfugamila chinu cho simuchitsele, lechelelo hetwe Vayawudi tungumufugamila Mulungu yo tumutsele, kwasawuli wukuluso wunhuma kwa Vayawudi. 23 Lechelelo luvala lunkutsa, nalo mwanga lufisile na vanu vakweli, na wo vakumufugamila Mulungu kwa kulongontswa na Muhe va Mulungu na wukweli. Kwasawuli vanu wo vangumufugamila chinya hino wo iwo Dada yo anguvagana. 24 Mulungu yo Muhe, na vala ng'ani wo vangumufugamila, iwo van'ganika kumufugamila kwa Muhe va Mulungu na wukweli." 25 Yula mudala akamupitulaje Yesu, "Ntsitsela kuta Masiya yo anchemwa Chilisito, an'kutsa. Manyi atse akutulonjela ndogwa tseka." 26 Yesu akamulonjelaje, "Heni yo ntsinlonga na heve, yo heni." 27 Luvala ulo vadahitswa vake vakawuyaje, vakatinukaje ndalahela kumuwona an'longana na yula mudala. Lechelelo kuduhu yo amuputsitse, "Un'gana chichi kwake?" Awu "Kwasawuli yachi un'longana nayo?" 28 Ihyo mudala yula akachilekaje chitsilo chake, na akawuyaje ku mujini na kuvalonjela vanu kuta, 29 "Mutse tubite mukamulole munu yo andonje chila chinu cho ntsadisile! Mbe, si yifuluche uyu ave yo Chilisito?"

30 Ihyo vanu vakawukaje kuhuma ku mujini, na kubita koali Yesu. 31 Luvala ulo vadahitswa vake vavaga vangumugongoletsa Yesu kuta, "Mudahitsi ulye nambe chochive!" 32 Lechelelo Yesu akavapitulaje, "Heni ntsinacho chilyo cho simuchitsele henye." 33 Vadahitswa vake vakiputsaje vene kwa vene, "Mbe, kuna munu yo amuletye chilyo?" 34 Yesu akavalonjelaje, "Chilyo changu cho ichi, ntsin'ganika kudita choan'gana yula yo anumile na kukwitsa kantsi yake. 35 Henye simulongaga kuta, jisije myentsi jitayi duve kufika luvala lwa kubeta! Lechelelo mulave hila filyo fya kumigunda fili chang'ani kwa kubetwa! 36 Mubetaji akwanuchila wuhombo wake nayo ankong'asaga filyo kwasawuli ya wumi wugaya wudugo, ili munu yo apandite na yo am'beta veka vahechelele hohamwe. 37 Hoihyo lulongwa lwa kuta, yumwe apandaga na yunji abetaga, lulongwa ulo lwa wukweli vaya. 38 Heni ntsivatumile mukabete filyo fyo simupandite, vamwe vadisile kantsi nalamu, lechelelo henye mufwahilwe kukolela kantsi ntsawo nalamu."

39 Vasamaliya wolofu kuhuma ku muji gula vamutumbye Yesu kwasawuli ya ndogwa tso alontsile yula mudala yo alontsile kuta, "Andonje ndogwa tseka ntsontsadisile." 40 Ihyo Vasamaliya vakabitaje kwa Yesu vaka musukaje ikale navo, nayo akikaleje kuko siku tsivili. 41 Vanu wolofu ndalahela vakamutumbaje Yesu kwasawuli ya lulogwa ulo. 42 Vanu vakamulonjelaje yula mudala kuta, "Hetwe tuntumba siyo kwasawuli ya ndogwa tsako hela, ila hetwe tuvene tuhuliche na tuntsela nachene kuta yuno yo mukulusi va inyi tseka."

43 Hotsaveye kulutila siku tsivili Yesu akawukaje hono iho na kubita ku Galilaya. 44 Kwasawuli Yesu mwene alontsile kuta, muloli va mulungu siahesimilwaga mu inyi yake mwene. 45 Hoavaga kufika ku Galilaya, na Vagalilaya vamulibulitse, kwasawuli nawo vavaga ku Liwungo lya Pasaka, na vatsiwene ndongwa tseka tso adisile Yesu kuko ku Yelusalemu luvala lwa Liwungo ilyo.

46 Kaha Yesu akapilukaje ku muji gwa Kana ya ku Galilaya, kula ko adisile malenga gave difwayi. Kwavaga na chilongotsi yumwe yo ali na mwana mutamwa uko ku Kapelinawumu. 47 Chilongotsi uyo avaga kuhulika kuta Yesu ali awusile ku Galilaya kuhuma ku Yudeya, akabitaje na kumusuka abite akamuponetse mwanage yo ali mutamwa tabani. 48 Yesu akalongaje, "Heve manyi uleche kutsiwona ndajilo na mitinuso siukutumba ndaya!" 49 Yula chilongotsi akamulonjelaje, "Muvina dedede tubite mwanangu ho ang'acha ang'ali kutajika" 50 Yesu akamulonjelaje, "Ubite hela, mwanago aponile!" Yula chilongotsi akatsitumbaje ndongwa ntsila ntsa Yesu, akawukaje. 51 Hoavaga ang'ali mungasi, vatantsi vake vakitang'anaje nayo na kumulonjela kuta mwanago aponile. 52 Nayo akavaputsaje luvala lo antsitse kuva mumi, nawo vakamulonjelaje "Higolo saa saba hamunyi iho ho akaponile wutamwa." 53 Yula dada va yula mwana akiwukaje kuta lo luvala lululaga lo amulonje Yesu kuta, "Ubite mwanago akuva mumi!" Kwasawuli ya lulongwa ulo, mwene na vanu veka va mukaye yake vakamutumbilaje Yesu. 54 Iyi yo ndajilo ya kavili yo adisile Yesu hoavaga kuwuya Kugalilaya kuhuma ku Yudeya.