19 Mbega ntimuzi ko imibiri yanyu ari insengero za Mpwemu Yera aba muri mwebwe, uwo mwahawe n’Imana? Erega ntimuciganza 20 kuko mwaguzwe igiciro kinini. Nuko rero mwubahishe Imana imibiri yanyu.

27 Ntoza indero umubiri wanje, nkawugira umuja wanje, kugira ngo maze kuvuga Ubutumwa Bwiza sinsange narushijwe mw’ihiganwa, nkabura impera.

3 Naho nofata ivyanje vyose nkabiha abakene, ndetse naho notanga umubiri wanje* kugira ngo ngire ico nirata ariko ntagira urukundo, vyoba ari ubusa.

13 Twese twabatijwe na Mpwemu umwe mu mubiri umwe: Abayuda, Abagiriki, abagurano, n’abidegemvya, kandi twese twahawe Mpwemu umwe.

4 Nk’uko iyi mibiri yacu ifise ibihimba bitandukanye kandi ivyo bihimba bigakora ibikorwa bitandukanye, 5 ni ko no mu mubiri wa Kristo bimeze: turi ibihimba vyinshi bigize umubiri umwe, kandi kuri wo, twese tuba dufatanye.

8 Ukwimenyereza kw’umubiri ni kwiza, ariko ukwimenyereza kwubaha Imana ni kwiza gusumba, kugira ikimazi muri ubu buzima no mu buzoza.

22 Umutima unezerewe ni umuti mwiza,

ariko umutima ubabaye umara inkomezi mu mubiri.

24 Amajambo meza ameze nk’ikimamara c’ubuki,

aryohera umutima, akavura amagufa.

7 Ntiwishimire ubwenge bwawe,

ahubwo wubahe Uhoraho kandi uve mu kibi.

8 Ivyo bizotuma umubiri wawe ugira amagara meza,

bitume n’amagufa yawe yoroherwa.

13 Kuko ari wewe waremye ibimbamwo vyose;

wanteranirije mu nda ya mama;

14 Ndaguhimbaza kuko naremwe mu buryo buteye ubwoba kandi butangaje;

ivyo ukora biratangaje,

ivyo ndabizi neza.

26 Umubiri wanje n’umutima wanje bishobora kugira intege nke,

ariko Imana ni yo nkomezi z’umutima wanje,

ni yo mugabane wanje ibihe bidashira.

1 Mana, ni wewe Mana yanje,

ndakuronderana umwete;

ndakunyotewe,

ibiri muri jewe vyose birakwipfuza,

ndi mu gihugu cumye kigadutse

kitagira amazi.

41 Nimube maso musenge kugira ngo ntimutsindwe n’ibibagerageza. Kuko umutima urabikunze ariko umubiri ufise intege nke."

29 Ijisho ryawe ry’i buryo niryatuma wipfuza, ukagwa mu caha, urikureyo urite kure yawe, kuko vyokubera vyiza kubura igihimba kimwe c’umubiri wawe hako umubiri wawe wose utabwa muri Gehinomu.

25 Ni co gituma ndababwira nti: ntimukiganyire kubera ivyo mukeneye kugira ngo mubeho; vyaba ivyokurya, ivyo kunywa, canke ivyo kwambara. Mbega ubuzima ntiburuta cane ivyokurya kandi umubiri nturuta cane ivyambarwa?

28 Ntimugatinye abashobora kwica umubiri ariko badashobora kwica ubugingo. Ahubwo, mutinye Imana, kuko yo ishobora guhonya ubugingo n’umubiri, ikabita muri Gehinomu.

1 Muri ako kanya nyene, abantu ibihumbi n’ibihumbi bariko baragwirirana, gushika aho ata waronka aho ahonyora. Maze Yesu atangura kubigisha ahereye ku bigishwa biwe, abagabisha ati: "Mwirinde umwambiro w’Abafarisayo, ari bwo buryarya. 2 Nta cagizwe ibanga kitazomenyekana, kandi nta canyegejwe kitazoshirwa ahabona. 3 Ivyo mwavugiye ahatabona bizokwumvikanira ahabona, kandi ivyo mwongoreraniye mu vyumba abantu bazobivugira hejuru ku mazu basemerera.

4 Bagenzi banje, umve ndababwire: ntimugatinye abica umubiri ariko inyuma y’ivyo ata kindi bashobora kubagira. 5 Ariko ngira ndababwire uwo mukwiye gutinya: mutinye Imana yo ishobora kwica umubiri, ikagira n’ububasha bwo kuwuta mu muriro wa Gehinomu. Ndababwiye ukuri, abe ari yo mutinya. 6 Mbega utunyoni dutanu ntitugurwa ubusa bw’amahera? Ariko Imana ntiyibagira na kamwe muri two. 7 Mbere n’imishatsi yo ku mitwe yanyu yaraharuwe yose. Nuko rero ntimutinye, kuko musumvya agaciro utunyoni twinshi.

8 Ndababwire ukuri, umuntu wese azonyemanga imbere y’abantu, Umwana w’Umuntu na we azomwemanga imbere y’abamarayika b’Imana. 9 Ariko uwuzonyihakana imbere y’abantu, nanje nzomwihakana imbere y’abamarayika b’Imana. 10 Kandi umuntu wese atuka Umwana w’Umuntu azobiharirwa, ariko uwutuka Mpwemu Yera ntazobiharirwa.

11 Nibabashengeza mu masinagogi, imbere y’abatware n’abategetsi, ntimuze muhagarikwe imitima n’ivyo muzokwireguza canke muzovuga. 12 Mpwemu Yera azobigisha ivyo mukwiye kuvuga ako kanya nyene."

13 Umwe mu bari ngaho abwira Yesu ati: "Mwigisha, mbwirira uwo tuvukana yemere tugabure ivyo twarazwe."

14 Yesu aramwishura ati: "Ni nde yangize umucamanza wanyu n’umuhagarikizi wo kubagaburira ivyanyu?" 15 Aca ababwira ati: "Mube maso, mwirinde guhahamira ivy’isi, kuko ubuzima bw’umuntu ntibuhagaze kw’itunga ryinshi afise."

16 Aca abacira umugani ati: "Habaye umugabo w’umutunzi yarimye itongo ryiwe aronka umwimbu mwinshi cane. 17 Aribwira ati: ‘Mbega nkore iki ko mbuze aho nkwiza umwimbu wanje?’

18 Aca yigira inama ati: ‘Reka ndabigenze gutya: nsambure ibigega vyanje hanyuma nubake ibibiruta. Gutyo nzoronka aho mbika ingano zanje n’ubundi butunzi. 19 Hanyuma mpeze mbwire umutima wanje nti: "Mutima wanje, icara uruhuke, urye, unywe, unezerererwe ubuzima, kuko ufise ibizogutunga imyaka myinshi." ’

20 Ariko Imana iramubarira iti: ‘Wa gipfu we, iri joro nyene ubuzima bwawe urabwakwa. None ivyo waruhiye bizoba ivya nde?’

21 Uko ni ko bizogenda kuri abo bose biyegeraniriza ubutunzi bwabo ariko badatunze mu buryo bw’Imana."

22 Yesu aca abwira abigishwa biwe ati: "Ni co gituma ndababwira nti: ntimukiganyire kubera ivyo mukeneye kugira ngo mubeho, vyaba ivyokurya canke ivyo kwambara. 23 Ubuzima buraruta cane ivyokurya, kandi umubiri uraruta cane ivyambarwa. 24 Nimwitegereze ibikona: ntibibiba kandi ntivyimbura, ntibigira n’ububiko canke ibigega, ariko Imana irabigaburira. None mwebwe ntimuruta inyoni kure n’iyo? 25 Ni nde muri mwebwe yoshobora kwiyongera akanya na gatoya ko kubaho kubera kwiganyira? 26 Nimba mutishoboza ikintu gito nk’ico, ni kuki mwiganyira ku bindi?

27 Nimwitegereze ingene amashurwe yo ku misozi akura. Ntakora kandi ntajisha impuzu. Ariko ndababwira ko na Salomo ubwiwe mu cubahiro ciwe cose atigeze ashaza nka rimwe muri yo. 28 Nimba Imana yambika gutyo ivyatsi vyo ku misozi, biriho uno musi ariko ejo bikazotererwa mu ziko, mbega ntizorushirizaho kubambika, yemwe ab’ukwizera guke? 29 Kandi ntimugashire umutima ku vyo muzorya canke muzonywa; ntimukiganyire kuri ivyo. 30 Kuko n’abantu bo mu mahanga yose yo kw’isi na bo ivyo ni vyo birukira ubudasiba, ariko mweho So wo mw’ijuru arazi ko ivyo vyose mubikeneye. 31 Ahubwo nimubanze mwitwararike Ubwami bw’Imana, ivyo na vyo izobibaha nk’inyongera.

32 Yewe busho buto, ntutinye kuko So wo mw’ijuru bimuhimbara kuguha Ubwami. 33 Nimugurishe ivyo mutunze, mubihe aboro. Mwironderere imifuko ibika amahera itazoshira, n’ubutunzi budahera bwo mw’ijuru, aho abasuma badashika, n’imiswa itazobwonona. 34 Kuko aho ubutunzi bwanyu buri ari ho imitima yanyu izoba.

35 Mwame mukenyeye kandi amatara yanyu yame yaka, 36 mumere nk’abanyarugo barindiriye ko shebuja ava mu bukwe kugira ngo bace bamwugururira niyashika akadodora. 37 Hahiriwe abo bakozi shebuja azosanga bagiteramye bamurindiriye. Ndababwije ukuri ko na we azokenyera akabicarika, hanyuma akabagaburira. 38 Hahiriwe abo bakozi shebuja azosanga bagiteramye bamurindiriye, naho yoza mu gicugu canke bugiye guca. 39 Mutahure ibi: iyaba nyene inzu yomenye isaha igisuma kizirako, ntiyokwemera ko kimena inzu yiwe. 40 Namwe mukwiye kwama mugavye, kuko Umwana w’Umuntu azoza mu gihe mutamwiteze."

41 Petero aramubaza ati: "Mwami, uwu mugani uwuciriye twebwe gusa, canke uwuciriye bose?"

42 Umwami Yesu aramwishura ati: "Mbega umunyabigega w’umwizigirwa kandi w’umunyabwenge ni nde? Ni uwo shebuja ashobora guha ubukuru bwo kuganza abandi bakozi no kubagaburira mu gihe gikwiye. 43 Azoba ahiriwe uwo mukozi shebuja azosanga akora gutyo niyagaruka. 44 Ndababwire ukuri, azoshika amuzeza ivyo atunze vyose. 45 Ariko vyogenda gute hamwe uwo mukozi yokwibwira mu mutima ati: ‘Databuja yatevye kugaruka,’ hanyuma agatangura gukubita abandi bakozi, akirira, akinywera, akiborererwa? 46 Shebuja azoshika umusi uwo mukozi atari yiteze ko ashikirako, no kw’isaha atazi. Azomuhimbagura hanyuma amusangize ikibanza n’abatizera.

47 Uwo mukozi yari asanzwe azi ivyo shebuja agomba hanyuma ntavyitegurire ngo abikore, azohanwa bikomeye. 48 Ariko uwutazi ivyo shebuja agomba, hanyuma agakora ibitari vyo, azohanwa buhoro. Uwahawe vyinshi azosabwa vyinshi, kandi uwajwe vyinshi azobazwa vyinshi.

49 Naje kwatsa umuriro kw’isi; ese iyo uba umaze kwaka! 50 Hariho umubatizo w’imibabaro ntegerezwa kubatizwa, kandi urandemereye mu mutima kugeza ndawubatijwe. 51 Mbega mwiyumvira ko naje ngo nzane amahoro kw’isi? Haba na mba! Ahubwo naje gutuma abantu bacanamwo. 52 Uhereye ubu, mu muryango w’abantu batanu bazocanamwo, batatu bagwanye babiri, babiri bagwanye batatu. 53 Umugabo azogwanya umuhungu wiwe, umuhungu na we agwanye se; umugore azogwanya umukobwa wiwe, umukobwa na we agwanye nyina; umugore azogwanya umukazana wiwe, umukazana na we agwanye inabukwe."

54 Yongera abwira isinzi ry’abantu bari aho ati: "Iyo mubonye igicu kivuye mu burengero, muca muvuga muti: ‘Imvura igira igwe,’ kandi biba uko nyene. 55 Mubonye umuyaga uhuhuse uva mu bumanuko, mukavuga muti: ‘Hagira haze ubushuhe,’ kandi bica biba uko nyene. 56 Mwa ndyarya mwe, ko mushobora gutahura ibimenyetso vy’ibihe murabiye ku biba kw’isi no kw’ijuru, ni igiki kibabuza gutahura ivy’iki gihe?

57 Ni kuki mudashobora guca urubanza, mugahitamwo ikibereye? 58 Nihagira umuntu aja kukwitwarira ku mucamanza, wihutire kwiyuzuza na we mutarashikayo. Ahandi ho, azogushikana imbere y’umucamanza, hanyuma na we agutange ku mukuru w’ibohero, maze na we agute mw’ibohero. 59 Ndakubwire ukuri, ntuzovayo utarishe n’igiceri ca nyuma umuheraniye."

10 Nuko rero, irinde kugira amaganya mu mutima wawe

ushire kure y’umubiri wawe ikibi cose,

kuko ubuto no kugira inkomezi ari ubusa.

4 Hari umubiri umwe n’Impwemu imwe, nk’uko mwahamagariwe ivyizigiro bimwe vyo muri kazoza;

22 Bagore, mwumvire abagabo banyu nk’uko mwumvira Umwami Yesu. 23 Kuko umugabo ari we mutwe w’umugore nk’uko Kristo na we ari we mutwe w’ishengero ari ryo mubiri wiwe, na we akaba umukiza waryo.

15 Amahoro ya Kristo aganze mu mitima yanyu. Kuko nk’uko mugize ingingo z’umubiri umwe, mwahamagariwe kubana mu mahoro. Kandi mube abama bashima.

22 Maze Uhoraho Imana abumba umugore muri urwo rubavu, araheza amuzanira wa mugabo.

23 Wa mugabo aca aravuga ati:

"Iri ni igufa ryo mu magufa yanje,

ni agace k’umubiri wanje!

Azokwitwa ‘umugore’

kuko yakuwe mu mugabo."

24 Ni co gituma umugabo azosiga se na nyina akabana n’umugore wiwe ubutakivana, maze bakaba umubiri umwe.

16 Ni co gituma tudacika intege, naho imibiri yacu iriko irashira, umuntu wacu w’imbere aguma yiyubura ku musi ku musi.

24 Ku musaraba, Kristo ubwiwe yishizeko ivyaha vyacu,* kugira ngo kamere muntu kacu ko gukunda icaha gapfe, tubeho dukunda gukora ivyo kugororoka. Mu bikomere vyiwe ni ho dukura gukira ingwara.

2 Nk’uko bisanzwe, twese dukora ibibi mu buryo bwinshi. Nihaba hariho umuntu adacumura mu kuvuga kwiwe, uwo ni umuntu atunganye, ashobora no kuzigama umubiri wiwe wose.