Família de Deus

15 Koni Omaku ni Owuso dala ni wako ki yala wawo oshe koshi yoya lalo, Omaku oni ke yala wayi ko Owuso. Kweyi bwebe koshu ko Omaku aba shogwu yo mo, <<Ada, Ada Ka.>> 16 Omaku abiyinu yolobene kpomaku ka mo awayi ko Owuso. 17 Anani owoni awayi, awawo rogwu oma-awawo rogwu ko Owuso dudu kpo Okristi, owoni amowe kpo Okristi, aki ba byigyashi kpanu mamani.

4 Ni ishi ke gye ni, Owuso to Oyi nu oleho. Omoma konya, ni amo ipu ko Ono ni, 5 shini na ngmase ni babo ko Ono ni, shini ahan wayi ko Owuso.

6 Ko sayi mala wayi, Owuso toleho kpo Omaku ko Oyi nu wipu ko otu kala, ya yogwu mo <<Ada, Ada hin.>> 7 Mani oni owo oshe kelo, owoyi la. Koni owoyi nu ni, Owuso ya dawojoji ni ogbo ko dayi nu ni.

26 Kpiri kala wayi ko Owuso dudu kpo Okristi Oyesu, bwebe kotuse. 27 Ayala obatisma dudu kpo Okristi, anani ala abiyikala shoshiye ko olayi ko Okristi. 28 Ni olemani oni kase ko Oyahuda kase ni wase ko Oyahuda lo ni, koshe kase ni yabo kiyinu, kanya kango; kpiri kala woye kponu ipu kema kpo Okristi Oyesu.

5 Owuso kwobonu gbo ko yaha wayi nu bwebe ko Oyesu Okristi, oza ni shotu ko yoya ni oma. 6 Ahan sho Owuso iye ikweyi koneshi ki igyashi nu, ikweyi ke eshi yeye ni odaha ipu ko Oyi nu moshi ni!

Imu ko Okristi

14 Ikweyi koni nkwagye obutu ka Ada, 15 ni ipwoma wonyonya iso kpe ese pyiye wa bwebe nu ni.

12 Kwikyikyeni kpiri kase ni zo ki kyogwu kpiye nu ni, odawoshu ko wayi ko Owuso. 13 Awayi moma kasuse kwe akimu kotu kasuse lalo, ke womoma ko Owuso la.

25 Ahan ka sho gbayi dudu bita lo, byoni ashini baya ni, ahan ke ta ananoho kaha otugbagba, koni ahan gye mo Eno kowowa ka Adole ya gbeji kelo.

7 Ala zotu kpo owe ni ala ba ma ni byo okyatu, Owuso ya ya mani koni ala wa ayi nu ni la. Oyi wonya ni adanu ya gbogo agye lo? 8 Owoni ogbalogo agye bya ashini kayi nu lo, olema byala wayi nu kokwokwoshi lo oma, ala wayi ni gba ada lo ni. 9 Aha gba awada kaha ki ikpiye, aba gbahogo agye kweyi aha ki ba geyagye dawa. Oya shoshi shini ahan ziyika da Ada kaha ko omaku shini ahan gbo olayi! 10 Awada kaha kikpiye gbahogo agye kishi gbayayi ni ama mo oshoshi ni, Owuso ke ya gbahogo agye shini ona shoshi daha, shini ahan wase neshi byanu.

5 Ni olemani, ipu ko Okristi, awani nwashika bwikpiye oye kponu ni, kweyi ananoho kase mani wakawase shishini kpiri la.

26 Owoni igo oye ya mowe, ashini kigo kpiri ba mowe kpanu dudu, kweyi owoni ashigo oye iye, igo wonyonya ya shotunehe kpanu.

19 Nabani ala ni wase ko Oyahuda lo ni ala wo ogboga ke lo; anani ala woye kponu kpase ko Owuso, kweyi wi ipwoma ko Owuso. 20 Amala mamani ikweyi kotu koda ni ayikoko ko Oyesu kpa awobane kwu ni, Okristi Oyesu abiyinu pini ke wikyikpo ni shoshi she ni la. 21 Anu pini byoda kpiri-kpiri la, kweyi yo gye wole ko Owuso sere. 22 Ipu kema kala kpo Okristi pini amala dudu kpase ashini kpiri ko webe ni Owuso ya yagye anu bwebe ko Omaku nu ni.

33 Oyesu duwoka mo, <<Anoho we ene hin kpa ayene hin?>>

34 Ebeni opyi iyi kweyi ma awase ni shogba to ni kweyi kamo, <<Awamani pini we ene hin kpa ayene hin la. 35 Kpiri kase ni yo oza ni sha Ada hin ni yi iso ni otu, anu pini we ene hin kpa ayene hin la.>>

35 Nabani oshe gbebe kiyinu ipu kipwoma lo, oyi ke yipu nu gbogbo-gbogbo.

42 Oyesu ka dawa mo, <<Owoni Owuso wa Ada kala, ala bya yimu hin, ikweyi koni nwebe kala bwebe ko Owuso la. Nbyiyun kin pini webe mani lalo, anu pini ke tumo oleho la.

Oko ni Oyaya Dawo ko Owuso ni

1 Kagba anyakwase apwolo, ke geyagye danu byo owa ada wo ni. Byi isongo kpiri bya ayene wo, 2 ma anyasawukye bye ene wo ni. Kweyi ma awisonya bya ayina wo kpotu oye kponu.

Ayi ko Owuso

1 Ala medo kimu ni Ada gbo daha ni! Imu nu sheyigagye ni kweyi aba yaha ogwu ma ayi ko Owuso awe kwokwoshi. Oza ni ya ni ese gyaha lo ni oma: ikweyi koni ese gyo Owuso lo. 2 Ayene hin moshi, anani awayi ko Owuso, oza ni aha ke we ashishe gye wa lo. Aha ke gye mo owoni Okristi bose aba lema byanu, koni aba mo byo ni owe ko kwokwoshi ni.

10 Ishini aha pyebe ko yoza, an yananoho oneshi, kayi ki ipwoma ko otuse na shoshe.