1 Ko Gbotuse wa ko kyogwu kpotu oye kponu ikweyi koza ni oyiyi tagye ni, ko kyogwu kpoza ni iyi ma lo ni otu oye kponu. 2 Bwebe kotuse pini ase nekye sho Owuso otu la.

3 Bwebe ko otuse ahagye mo Owuso yese bwebe kela koka nu, oza ni ama ni ke bose bwebe koza ni aba gege ba ma lo ni. 4 Bwebe ko otuse Abila opeshi neshi nu ni shoshi shako Okayinu ni do Owuso. Bwebe ko otuse nu Owuso zo wase neshi, koni Owuso zeshi nu ni. Bwebe ko otuse ka Abila okela, koni ogekwu ni.

5 Bwebe ko otuse Owuso ze Enok giso, ogekwu lo. Amo lo, ikweyi koni Owuso yo bize giso. Okpa ko Owuso kamo ime anga nu giso, ayo olobene ikweyi nu mo oyo oza ni sho Owuso otu. 6 Owo otuse lalo, ashishe ya yoza ni sho Owuso otu ni lo, ikweyi koni kpiri kase ni webe ko Owuso, owotiri shini ona gbotuse mo Owuso yaba kweyi oya da awase ni ba labo nu abola.

7 Bwebe ko otuse, Onuhu pwa akpaha pyopyi ko Owuso ikweyi ko oza ni wa gbodagye ohobu ni iyi nu ma wa lo ni. Ogeyagye do Owuso ogbo owu ni anu kpi ipwoma nu gipu nu kweyi agekwu lo. Bwebe koni, ayese kpo, kweyi Onuhu wa ase neshi ebe ko Owuso bwebe ko otuse.

8 Bwebe ko otuse, Ibirayi kyogwu ko geyagye do Owuso ishini mo ona go okpagye ni oshokoyi ko danu ni. Osho okpagye nu bita go okpagye ni ogye lo ni. 9 Bwebe ko otuse oyagye okpagye ni owo ogboga ni Owuso shokoyi danu ni. Oyagye adaba anu byi Ishaku kpo Oyakubu, ni nyo okoyi oye kponu ni Owuso she danu ni. 10 Ibirayi ya gbeyi ko ogya nyakwu ni Owuso myoyi kweyi ma ni, ogya nyakwu ni otu nu wa ko gbogbo ni.

11 Bwebe ko otuse pini Ibirayi wa ada la, koni osawukye kweyi Osera wo odoma ni. Ototuso Owuso mo oya byo okoyi nu. 12 Koni Ibirayi lema byo okwu ni, ongo oye mani mayi nwashika byi inyiwo ni ba akpa ni, anwashika byi ikpo ki isisagye ke ega ki ishu.

13 Kpiri kase mani gekwu ipu ko otuse. Onyoza ni Owuso shokoyi ni lo, ake moma bwebe lenu kweyi yuwo omaba, agye mawa wo ogboga kpawo gbese la. 14 Awase ni kela mani gye mawa ba tikpo ko okpagye ka abiyiwa. 15 Owoni otu wa bi yebebe ko okpagye ni ashibita ni la, abi ba pyo owe ko kwikye. 16 Ake ba tikpo ko okpagye ni shoshi she ni la, ole kiso. Ni olemani oni, Owuso ya yiweyi ni aba yogwu mo Owuso wa ni lo, koni okyo ogya nyakwu tu dawa ni.

17 Bwebe ko otuse, Ibirayi yo oyi nu ki Ishaku yi peshi ishini Owuso moma ni. Ibirayi pini Owuso shokoyi danu la, kwikyikyeni okyogwu ko yo oyi nu oye kpokponu peshi. 18 Owuso ka danu mo, <<Bwebe ki Ishaku pini oya gbi ipwoma ni nshokoyi dawo ni la.>> 19 Ibirayi kyogwu mo Owuso ya gege ya shi Ishaku iyi bwikwu, na kamo, Ibirayi nyi Ishaku ni nyiso bwikwu ni.

20 Bwebe kotuse pini Ishaku so Oyakubu kpi Isuwa aboneshi koza ni aba wa we ohobu ni la.

21 Bwebe kotuse pini Oyakubu sayi nongo ki Isu aboneshi ome ogekwu la. Oyikweyi kwo okposhi nu kweyi ogeyagye do Owuso.

22 Bwebe kotuse ishini Isu yo okwunu ki ikwu ni, okela ikweyi ko bose kayi ki Izrayila sho okpagye ki Ijip, kweyi oki kadawa oza ni aba ya kpo okwu nu ni.

23 Bwebe kotuse ene kpa ada ko Omusa yo teba koya eta bwishi ni amo ni. Amo woyi kyarigada, kweyi ayoshi ko yono no Ose kwu ni kyigbo lo.

24 Bwebe kotuse ishini Omusa gye ni, otanu shini ana yo ogwu mo oyi ko oyi ko ose. 25 Okyogwu ko mowe kpase ko Owuso sho oni oya monye ko ozalabi kishi gbayayi ni. 26 Omamo owoni ogbowuru ikweyi ko Okristi oya shoshi sho odu ki Ijip kpiri, oyiyitagye ko ma abola ni ya wa ohobu ni. 27 Bwebe ko otuse pini Omusa shi Ijip bita la, oyoshi kanya ko ose lo. Otela ko kwikye itikpi byo omo Owuso ni iyi ya gege ya ma lo ni. 28 Bwebe kotuse okwi Imya ko Sheyi kweyi oka dawa mo ana myoyi ofunu, shini Oyoleho ki Ikwu naka wa ngmayi nongo kikyikyo ki Izrayila lo.

29 Bwebe ko otuse pini ayi ki Izrayila sheyi ki Ishu Nowa byaba yawu agye shishi ni; ishini ase ki Ijip ke takirikwu ko ya mamani, inyo yuwa re.

30 Bwebe kotuse pini oba ko ogya nyakwu ko Ojeriko kye shonu ishini ayi ki Izrayila gyehe to ke eno ahapa ni la.

31 Bwebe kotuse ayo Orahab ni wa agbaza ni ngmo kpa awino zakpaha lo, ikweyi koni oya agyama ki Izrayila omaba neshi ni.

32 Oji ni ngbo koka ke? Ishi yaba dami ko kela ikweyi ko Ogidiyo, kpo Obarak, kpo Osamsi, kpo Ojefta, kpo Odawuda, kpo Osamuwe kpa awobane kelo. 33 Bwebe kotuse akpe efu kpo okpagye nwashika kweyi yuwa re. Ayoza neshi kweyi anyoza ni Owuso shokoyi dawa ni. Aya awabaga okwunu gwu, 34 amyola ni ya kye kotata, kweyi abose shi ikwu ke ewakpa. Ikpiye shosha wa pya wikpiye loshu, aloshu ogo kefu kweyi ya adakare ka awogboga gwagye. 35 Bwebe kotuse anya nyase wa ni ashuwiyi bwikwu ni.

Ashini kase ni tela ko ominyo ni, agekwu ipu kowe moma shini ana shuwi iyi bwi ikwu wipu ko olayi ni shoshi she ni. 36 Agbashini wa owuru kweyi ayuwa aboshi, ashini ashuwa ashirika kweyi byuwa go oruduru. 37 Atuwakyo, ayuwa shigbo wepa, ayuwa ngmo kpe ewakpa. Oshiye ko okpa ko otukpo kpi ikpowu pini aba shoko la. Awa awoleha, adawowe, kweyi ayuwono. 38 Ese tuwanyi. Aba gyehe byawo gbese ipu ko ododa kpe efu, kpo owu ka akyo kpo ogo.

39 Kpiri wa adawa abokpa ikweyi ko otuse wa! Kwikyikyeni ashishe wa nyo oza ni Owuso shokoyi dawa ni lo, 40 ikweyi koni Owuso gboza ni shoshi she ni daha shini ana yuwa na gya dudu kpaha.