1 Byoni agba awolobene nwashika shogba taha ni, ahan sho oza kpiri ni ya saha enu kpo ozalabi ni yaha bi piya ni bita, kweyi ahan nyinya ni yohobu kaha ni kpo otu zoze. 2 Ahan kpiyi kwo Oyesu ni wo okwotu kpo ongmeyi kotuse ka ni. Ikweyi ko otushosha ni ya gbeyi nu ni, ozotu ko owe ni oma ikweyi ko oshi ni, ozo owuru gbogbo mani wojije lo, oyagye abore ke ebe ko Owuso. 3 Ala rela ko owe ni oma ni; ni ogbotu kpa awinozalabi ni yanya nu ni! Mani oni ala ka nwa kweyi gbo otu lo.

4 Onu ni ala ba nu kpo ozalabi ni fu koni aba yala ngmo ni walo. 5 Kwe ala nwanyi kpe ela ko otugbagba ni Owuso kadala koni ala wa ayi nu ni la?

<<Oyi hin, ka zo okyatu ka Adole wo oza yeye lo,

ishini ogba apwo oka byotu lo.

6 Ikweyi koni Adole ya kyawase ni oya yimu ni kpiri ya tu,

kweyi ase kpiri ni ozo wo oyi nu oya gbogo agye.>>

7 Ala zotu kpo owe ni ala ba ma ni byo okyatu, Owuso ya ya mani koni ala wa ayi nu ni la. Oyi wonya ni adanu ya gbogo agye lo? 8 Owoni ogbalogo agye bya ashini kayi nu lo, olema byala wayi nu kokwokwoshi lo oma, ala wayi ni gba ada lo ni. 9 Aha gba awada kaha ki ikpiye, aba gbahogo agye kweyi aha ki ba geyagye dawa. Oya shoshi shini ahan ziyika da Ada kaha ko omaku shini ahan gbo olayi! 10 Awada kaha kikpiye gbahogo agye kishi gbayayi ni ama mo oshoshi ni, Owuso ke ya gbahogo agye shini ona shoshi daha, shini ahan wase neshi byanu. 11 Ishini agbahogo agye, oya yotu kaha ya bya, aba shotunehe lo. Itikpi nu ke awase ni agbuwogo agye ni ba wa pya abola komene koyagye kase neshi.

12 Ni olemani oni, ala nata kabo kala ni nwa ni kweyi yo okinafu kala ni ya wode ni na loshu!* 13 Ala gohobu ko yawu owe tiriri shini ikpo kala ni winyi ni naka ngmonyodu lo, oke na pyo ogege.

14 Ala takirikwu shini ala bagye ko omene kpa ananoho, kweyi ala bagye neshi, ikweyi koni ashishe ya ma Adole lo owoni oyagye neshi lo. 15 Ala hagye loshu shini eshi ko Owuso naka nya ashishe kala lo. Ala gbera shini ogba koza lono naka bwu ipu kala ko byela wipu kala ko wa yase lewa yishi lo. 16 Ashishe ipu kala naka wine ko beba kwe ino gyela ko Owuso lo byi Isuwa lo, anu ni shawu ko ozarore owatu oye yo ogwu nu ko oyi kikyikyo yi ra ni. 17 Byoni ala gye ni, itikpi owa yimu shini ada nu na saboneshi; oke tela ko saboneshi, ikweyi koni opyo owe oyoye ko kyoza ni oya ni pya kelo, koni otikpo ka aboneshi kpi ize iyi ni.

18 Ala wa byoni ase ki Izrayila wa ni walo, ebe ke efu ni aba gege ko gabo anu ni, efu ko Osinayi ni ola ya yikweyi nu ni; ni dibu tiri kweyi owu ya ta anu, 19 kpe eya ka ajigwo, kpo oko kela. Ishini ase pwoko oni ni, aba mo ona ka kela kpawa kelo, 20 ikweyi koni odawo ono ni shuwoshu ni mo, <<Ko owo obize pini gabo efu mani la, ana takyo gbishini ona gekwu.>> * 21 Oza ni ama ni tuwoshi kotata, gbishini Omusa kamo, <<Nyya wode kikpiye kpo oshi yoya!>>

22 Abishi koni, ala wikweyi ke Efu ko Osiyona wa kpo Ojerusele ki iso, ogya nyakwu ko Owuso ni yiyi ni, kpa ayoleho nu ni go okpakwu nwashika ni. 23 Ala wo ogbayi kotushosha ka ayi kikyikyo ko Owuso wa, ni ayiye wa ta ipu ki iso ni. Ala webe ko Owuso wa, ni wino kepwo kase kpiri ni, kpo omaku kase neshi ni ayuwa gya ni. 24 Ala webe ko Oyesu ni kwotu ko okoyi pepe ni wa, kpo oyi ni myi kweyi ya kela neshi sho oyi ka Abila ni.

25 Mani oni, ala gbera shini ala zakpaha danu ni ya kela ni. Owoni awase ni tela ko pwela kase ni ya pyuwa akpaha ese mani, oshoshi dawa lo, oya lemoji daha owoni aha tela kase ni ya kela bwi iso ni! 26 Oko kela nu yese ja ishi oni, anani ke oshokoyi mo, <<Anani nki ya je ese kin lalo nyya ji iso mamani.>> 27 Ela ni oka mo anani nki ya sayi mo, Owuso ya yawoza ni oya ni kpiri ba ja kweyi ba shu, shini oza ni ba ja lo ni na hagye.

28 Mani oni, ahan shotunehe ikweyi koni aba nyo obula ni ya ja lo ni. Ahan shotunehe kweyi geyagye do Owuso owe ni ya shotu ni, ipu ko mo gyiyi kweyi yoshi nu; 29 ikweyi koni Owuso kaha wola ni ya yoza ni la.